
Pathiang Thluachuah A Hmang Thiammi kan Si a Herh

Khrih ah dawtmi u le nau hna, Nov 18 ni caah thlarau thazaang i hrawm ṭhan hna usih.
Nov 18 ni caah kan nu Bupi nih a kan timhpiak mi kan Bible cathiang hna cu Biathlam 4:1-11; Luke 19:11-28 chung a si.
Voikhat Bible kan relnak ah ‘A thiang, a thiang, a thiang; Bawipa Pathian cu a thiang’ tiah Bawipa kha Vancungmi hna nih an thangṭhat nak kong a si. A thianghlim bik mi, zeizong vialte thil a tuah khotu, zeizong vialte cung zongah nawl ngeitu Pathian cu a thianghlim mi a si e tiah tehte an khaan, an thangṭhat, an phuannak kong a si.
Thawngṭhabia chungah mipa pakhat a umnak khua ram in a kal i cu hmun in cun a chuah lai ah sinum hna sinah tangka a pek taak hna. Chim duhnak cu an tuah hnga dingmi rian a pek taak hna. Mah mipa cu zei tuah dingah a kal? Siangpahrang luchin ngahnak hgna ding caah khua dang ah a kal e a ti. Cu tikah amah a nahchuah tu pawl nih a hnu in midang kha an thlah hna i, hi mipa cu kan Siangpahrang si dingin kan duh lo tiah doh dingin mi an thlah. Sihmanhsehlaw mah mipa kha a rak kir tikah Siangpahrang pakhat dirhmun in a rak kir tikah zei thil dah a cang ti kha nihin thawngṭhabia chungin kan relmi a si. Tangka a apmi hna, chawva a apmi hna tam chinchin in a karhter tu, thil a pekmi hna cungah zumhtlak tein fel tein rian a ṭuantu a zohkhenhtu sal hna kha a thangṭhat hna i an tuah man nak pinlei tiangin laksawng a pek hna. Zeihmanh a tuah lomi kha cu ‘sal chia’ tiah a ti hna i laksawng pek um lo, cun zeihmanh an tuah lo caah dandat tu an si e timi kha kan Bible thiang chungah kan hmuh mi cu a si.
Dawtmi u le nau hna; nihin nang le kei Khrih nih a kan zaangfah i minung pakhat dirhmun in kannih zong kan um kan kal, hi vawlei cungah kan rak chuak. Hi hmun ahhin midang hna pakhat cio i thluachuah chim khawhnak, hmuh khawhnak, thaw chuah khawhnak, theihhngalhnak, khua tuaktan thiamnak Bawipa nih thlua a kan chuah, damnak thlua a kan chuah. Hi thluachuah hna cungin hin Pathian kan hmu kho maw? Cun Pathian thluachuah veel kha kan langhter chinchin kho maw timi kha nihin ni ah kanmah le kanmah kan i hal ding a si.
Tahchunhnak ah Sianginn a kaimi Siangngakchia hmunkhat te ah ca an cawng ṭi hna, ca chimh ṭi an si. Mah tikah Saya Sayamah te nih an chimh mi hna kha ṭha tein a zulmi le ṭha tein a zul duh lomi, ca a zoh duh lomi tiin khan an um ṭhan hoi. Ca ṭha tein a zoh mi le Saya Sayamah te nawl ningin a zulmi hna cu ca an thiam, thangṭhat an si, cun camipuai an phit tikah teinak an hmu. Ca a zoh duh lomi, chimhhrinnak zong a zul duh lomi hna cu camipuai phit tikah hnu ah an taang, an sung tawn, khakha a si ko.
Cucaah Bawipa nih a thluachuah a kan pekmi theihhngalhnak le zumhnak thluachuah a kan pekmi kannih nih thil sining tak tein kan hman lo, kan hman thiam lo, kan chimphuan lo, pakhat le pakhat tu kan i nehsawh, chiatnak kan chim peng a si ahcun camipuai a phimi ngakchia hna bantuk kan si sual lai. Cucaah can a um lio te ah Bawipa nih a kan pekmi thluachuah pawl hi zeitindah kan hman, ṭhatnak ah kan hman a si ahcun Siangpahrang pa a rak tlun tikah zumhtlak sal ṭha a ti hna i an i ruahchan nak lengin laksawng a pek hna bantukin kannih zong Vanram nuam ah zungzal nunnak laksawng Bawipa nih thluachuah a kan pek ko lai. Zeihmanh tuah loin thluachuah cu kan co kan co i zeihmanh ah hmang loin lianh zong lianhter loin a lak kan siter sual ahcun sal chiahru tiah a kan ti sual lai i ṭhawl kan si sual lai.
Dawtmi u le nau hna; ruat hna usih. Nihin na dirhmun hi zei dirhmun dah a si. Bawipa thluachuah ṭha tein a hmangtu maw na si, asiloah a vaivuan ter tu maw, a chia sawhsawh ti maw, zei i a rel lo tu maw na si ti kha i ruat cio hna usih.
Thazaang petu /- Fr. Fidelis Maung Sein
