
Bawipa Aw A Ngaitu Kan Si Maw

Nihin kan Nu Bupi nih a kan timhpiak mi Luke 19:41-44 tiang kan rel lai.
“Khuapi cu a hei naih chin lengmang i a hei hmuh tikah a ṭah i; Nihin ahhin daihnak caah zeidah a herh ti kha hei hngal law cu mu. Sihmanhsehlaw cucu na hmu kho ṭung lo. Zeicahtiah na ral nih raltuknak chuntlung in an in kulh an in hren i a kenkip in an in luhhnawh caan kha a phan lai. Nangmah le na vamping kulhchung i a ummi minung hna cu an in hrawh dih cikcek hna lai. Pathian cu nangmah khamh awkah a rat caan kha na hngalh lo caah cuka hmun ahcun aa chonhmi lung pakhat hmanh leh loin an kaltak mi a um lai lo”.
Nihin ah Gospel chungah zeidah kan hmuh ti a si ahcun kan Bawipa Jesuh Khrih nih Jerusalem a ṭahnak kong hi ‘Luke’ thawngṭhabia chung lawngah hin kan hmuh khawh mi a si. Cucu zeiruang dah Jerusalem hi kan Bawipa Jesuh Khrih nih a ṭah ti a si ahcun; Jerusalem cu a thimmi miphun umnak, a thimmi khualipi aa dawh ngaimi a si. Asinain a minung hna nih an hngalh lo caah, an duhduh in an tuah caah Pa Pathian kha an hngalh lo caah Jesuh Khrih a ṭah hi a si. Cucaah kan Bawipa Jesuh Khrih nih Jerusalem kha a ṭah tikah a rawk lai timi zong kha a rak chim.
Cun AD 70 kum ahkhan Rome ralkap hna nih hi Jerusalem khuapi hi an hrawk taktak. Jerusalem khua cu kan Bawipa Jesuh Khrih nih a dawt ngaingai mi a si, Pathian sermi miphun, minung pakhat bantukin a dawt ngaingai mi a si. Daihnak ca zongah zeidah a herh ti kha na hngal lo cu mu a ti. Asinain cucu Maw Jerusalem, na hmu kho lo e a ti. Na ral hna nihin raltuknak chuntlung in an in kulh i a kenkip in an in luhhnawh caan a phan lai e a ti. Nangmah le na vamping kulhchung i a ummi minung hna cu an in hrawh dih cikcek hna lai e a ti. Kan Bawipa Jesuh Khrih nih Jerusalem a rawk lainak kong, Jerusalem a ṭahnak hi nihin ah Luke thawngṭhabia chungah kan hmuh khawh mi a si.
Cucu zeidah a chim duh ti a si ahcun dawtmi u le nau hna; nihin kan ral hna nih kan thlarau hrawk dingah khua an khaan lainak, kan thlarau hrawk dingah khua a khaangtu Satan pa, nang le kei kan nunnak cu Jerusalem bantukin a si i cu Jerusalem a rawk lainak kha kan Bawipa Jesuh Khrih nih a hmuh chung tikah a ṭahnak kha a si i cuve bantukin nang le kei rawk lai ding hi kan Bawipa Jesuh Khrih nih a kan siang lo. A dawtmi nang le kei kan thlarau rawk lai ding, kan thlarau nunnak sungh lai ding hi kan Bawipa Jesuh Khrih nih a kan siang hrimhrim lo. Kan thlarau hi thiang tein um le dai tein um hi kan Bawipa Pathian nih hin a kan duhpiak mi a si.
Cucaah kan Bawipa Jesuh Khrih nih zeitin a ti; Kan Bawipa Jesuh Khrih nunning le rianṭuannak hna hi Pathian pennak a langhnak a si ti kha Jerusalem khuami nih an hngalh lo caah Pathian cu nangmah khamh awkah a rat caan kha na hngal lo e tiah a chimmi a si. Nangmah khamh awkha a rat hi na hngal lo e a ti. Dawtmi u le nau hna; nangmah le keimah khamh awkah kan thlarau khamh awkah kan Bawipa Jesuh Khrih a rat hi kan hngalh lo sual a si ahcun kan Bawipa Jesuh Khrih a ngaihchiatter tu kan si lai, kan nunnak hi i chek usih.
Voikhat ah a zum lo ngaimi siibawi pakhat nih Siangbawipa sinah minung kan nunnak ah thlarau timi hi a um ti kha tehte langhter a duh. Father, thlarau hi na hmu kho maw, na thei kho maw, a thawtnam na tep kho maw, a rim tah na thei kho maw a ti. Thlarau a um timi hi na nunnak ah na ingtuar kho maw a ti. Siangbawi pa nih; Thlarau timi cu kan hmu kho lo, a theih zong kan thei kho lo, a thawtnam zong kan tep kho lo, a rim zong kan thei kho lo. Asinain thlarau timi cu a um hrimhrim ti kha kan hngalh a ti. Cucaah Siibawi pa nih zei a ti; (အင်္ဂါငါးပါး) timi nihin thlarau a um timi kha an theih khawh lo caah thlarau hi a um lo tiah kan chimh duh mi cu a si e tiah Siangbawipa cu a si.
Siangbawipa nih; a si ahcun nangmah hi siibawi pakhat na si ve bantukin fahnak timi hi na hmu kho maw, na thei kho maw, a thawtnam tah na tep kho maw, a rim tah na thei kho maw tiah a hal ṭhan. A um timi tah na hngal kho maw a ti. Siibawi pa nih; fahnak timi cu kan hmu kho lo, hna zongin kan thei kho lo, a thawtnam zong kan tep kho lo, a rim zong kan thei kho lo. Asinain a fak timi cu kan hngalh khawh e a ti. A fak timi fahnak a um a si ahcun thlarau timi zong hi a um hrimhrim ko e tiah Siangbawipa nihcun a ti.
Chim duh mi cu minung paohpaoh hi thlarau in a nungmi kan si i kan chungah thlarau nunnak a um caah a si. Cu kan thlarau nunnak cu sualnak chungah a tlaknak hnga lo, nifatin kan nunnak ah kha thlarau kha thiang tein ralring tein kan chiah awk le kan nun awk a si ti hi kan hmuh a mi a si. Cucaah kha kan thlarau nunnak kan sungh lo ding caah khan nifatin kan nunnak ah kan Bawipa Pathian aw kha kan ngaih peng ding a si.
Nihin Alleluia chungah zeidah kan hmuh ti a si ahcun; Nihin ah lunghak in nan um awk a si lo a ti, Bawipa Pathian bia ngai ulaw cu a bia cu nan nunnak ah i laak uh, lunghak in nan nun awk a si lo tiah a ti. Lunghak in um hlah, Bawipa Pathian bia kha ngai u a ti. Dawtmi u le nau hna, kan Bawipa Jesuh Khrih nih Jerusalem a ṭahnak cu zeiruang ah a si. Amah kha an hngal lo, an hlawt, an thah an nawn. Jerusalem cu Pathian thimmi, Pathian dawtmi khualipi a si ko nain Pathian duh lo ningin an um caah AD 70 kum ah Rome ralkap hna nih an hrawh taktak.
Dawtmi u le nau hna; nang le kei kan thlarau Satan pa nih a kan hrawh lo nak dingah kan Pathian bia hi ngai usihlaw kan sual kan palhnak vialte ngaihchih in amah hngalh in hmailei ah kar a hlangmi, kan sual kan palhnak vialte ngaihchih in kan thlarau nunnak thianghlim tein a chiami fanu fapa kan si khawhnak dingah i zuam usih.
Thazaang petu /- Saya William
