Hringtu nu hna an mitthli nih raltuknak hriamnam a daihter khawh nakhnga All Souls Day ah Pope nih thla a cam

Rome khua um Campo Verano thlanmual ah Pope Leo XIV nih All Souls Day Missa raithawinak a tuah. Mithi le minung karlak kan i pehtlaihnak cu a cat bal lo i Khrih kan zumhnak thawng in sining phunkhat ah aa thlengmi asi tiah a ti. November 1 ah tuahmi Mithiang Vialte Puai November 2 ah tuahmi Mithi vialte hna thlarau caah thlacam piakni an i pehtlaihnak kong kha a langhter. Thiannak le zungzal nunnuamnak hmun ah a um cangmi mithiang hna bang in hi ka ah daitein aa hngilhmi vialte nih Pathian ceunak nunnuamhnak in thuamh an si venak hngavancung kan Pa kha zoh u si law hal usi tiah Pope nih a ti. Khamnak a hmu cangmi hna an thlarau cu hremnak nih a tawng ti hna lai lo tiah cathiang chung nih a chimmi kha a langhter ṭhan.

Bawipa Jesuh nih tlangcung cawnpiaknak i a chimmi hna kha amah Bawipa hrimhrim asi nak kha a zultu hna sin ah a nunnak in a langhter. “A ṭap a hraammi cung lunglawmmi nan va si dah, Pathian nih an hnemh hna lai,” ti mi tlangcung cawnpiaknak kha ruahṭhan in, ral tuknak ruangah siseh, konglam a phunphun ruang ah thahnawnnak tuar in nunnak a liammi chungkhar hna caah thlacam piak ding in Pope nih forhfialnak a tuah. An mitthli nih raltukna hriamnam a sertu hna chiaṭha thleidannak lungthin kha tawng sehlaw daihnak a um khawhnak hnga caah thlacam usi tiah a ti. A donghnak ah, mithiang Francis of Assisi i hla asi mi, “Maw Bawipa, kan taksa nih thihnak a tuarnak thawng in na min thangṭhat si ko seh, zeicah tiah a hohmanh nih taksa thihnak in an luat kho lai lo. Zungzal a thi kho mi sualngan he thih hi ngaihchia asi. Na duhnak tuah buin a thi mi hna caah cung lunglawmh awk a va si dah, zeicah tiah an nih cu a voihnihnak thihnak nih fahnak a pe kho ti hna lai lo,” ti mi cacaang in Pope Leo nih thazaang peknak a ngei. Khrih kan zumhnak thawng in mithi le minung kan i pehtlaih tiah a ti.