Thianternak hmun A Ummi hna Caah Thlacampiaknak

Nihin cu a thi cang mi hna Thlarau caah thlacam piak nak ni tiin Bupi nih a kan tuah piak. Kan relmi thawngṭhabia chung in zei ruangah dah mithi hna caah thlacamnak kan tuah timi kha ruat ṭi hna u sih. 

1 Peter 3:19: “Thlarau in a nunnak cun thong i thlakmi thlarau hna sinah khan a va kal i phung a chim” a ti. Kan Bawipa Jesuh Khrih van a kai hlaan ah mithi khua ah a va ṭum i thawngṭha a va chim a ti. Cu thawngṭha chimnak kha fian dingin kan chim a si ahcun “Thianternak hmun- Purgatory” kan timi kha a si. Cu ka hmun i a ummi hna caah khan kan nih catholic pawl nih thla kan campiak mi hna cu a si. Hell i a kal cang mi hna caah khan thla kan campiak hna lo. 2Maccabeus 12: 43-45: Ral bawipa Maccabeus nih ral tuk nak in a thi mi a ralkap hna caah a nung mi hna sinah phaisa a kholh hna i cu phaisa a hmuh mi cu Jerusalem biakinn tlangbawi pa sinah a kuat i raltuk nak i a thi mi a ralkap hna caah raithawinak a tuah piak hna tiah a ti. 

Hi ni a langhter mi cu mithi hna caah thlacampiak nak kan timi hi BC chan in khan rak thawk cang mi a si timi kha kan hmuh khawh. Cucaah, mithi hna caah thlacamnak kan tuah mi hi a sawhsawh in tuah mi a si lo. Kanmah nih kan serchom mi zong a si lo. Bible cawnpiaknak, Bible hrimhrim ah kan hmuh mi a si. 

1Jn 5:16-17: Mi pakhat khat nih a unau pakhat khat kha thihnak tiang a phanmi a si lomi sualnak a tuah kha a hmuh ahcun, nunnak a petu ding Pathian sinah khan thla a campiak lai – cucu thinak tiang a phanmi sualnak a tuah lomi hna caah khan a si a ti. Palh in tuah mi sualnak vialte hi sual an si dih. Sihmanhsehlaw, thihnak tiang a phan mi sualnak a um i thihnak tiang a phan lomi sual nak a um tiah Bible nih a kan ti. 

Cucaah zeibantuk mi hna caah dah thla kan campiak hna? Thihnak tiang a phanhter lomi sualnak a ngei mi, thianternak hmun ah a ummi hna caah thlacam nak kan tuahpiak hna. 

Mithi hna caah thlacamnak kan tuahpiak mi hna hi mi tampi hna sinah, thlarau in langhnak in siseh, mang i langhnak in siseh, ṭhathnemhnak tampi, luatnak tampi tehte khaannak zong a um. 

Mithi hna caah thlacamnak kan tuah mi hi catholic hna ca lawngah kan cam mi a si lo. Thianternak hmun i a ummi thlarau vialte hna caah thla kan campiak hna. Kanmah thlacam piak hna nak thawgin, thianternak hmun ah a ummi thlarau vialte hna nih luatnak an hmuh i, Pathian Sunparnak an i hrawm i Pathian sinah thangṭhatnak, lawmhnak a um timi kha kan theih ding a si. 

Mithi hna caah thlacampiaknak kan tuahnak thawngin thlarau hna nih luatnak an hmuh hlei ah, an luat hnu ah mithiang vialte hna nih thla a kan campiak ve. 

Catholic Bupi hi phutum in hmuh khawh a si. Phukhatnak cu zungzal nunnak a co cang mi mithiang hna phu kan ti hna i Vancung ram a phan cang mi phu an si. A phu hnih nak cu thianternak hmun ah a ummi hna an si. A phu thumnak cu vawlei ah a nung lio mi kan si. Phukhat le phukhat ah pehtlaihnak a um. Kan i bawm dih hna.  Thianternak i a um mi thlarau hna caah a nung lio mi hna thlacampiak nak thawngin luatnak, teinak an hmu hna i Pa Pathian Sunparnak an i hrawm tikah anmah nih kanmah hna caah khan thlacam a kan bawmh ve. Cucaah, catholic bupi kan ti tikah vawlei cung i a ummi hna lawng hi kan si lo. Vancung i a ummi hna zong an i tel i, thianternak hmun ah a ummi hna zong an i tel ve hna. Cun vawlei cung a nung lio mi hna zong kan i tel; cucu catholic bupi kan timi cu a si. 

Thianternak hmun i a ummi hna caah thlacampiaknak kan tuah mi hi a sawhsawh a si lo. Bible nih fiang tein a kan cawnpiak mi le Bible chungah kan hmuh mi zong a si. 

Mat 12:32 ah “Mi Fapa ralchanh in bia ṭhalo a chimmi cu ngaihthiam khawh an si ko lai; sihmanhsehlaw Thiang Thlarau ralchanh in bia ṭhalo a chimmi cu tu chan ah siseh, hmailei chan ah siseh, ngaihthiam khawh an si lai lo” tiah a ti. Hmailei chan ah a timi hi kan zoh tikah “Biaceihnak” hi a chim duh mi a si. Thih hnu pin lei khi a chim duh mi a si. Thih hnu pin lei, thianternak hmun i a ummi hna caah thlacam piaknak kan tuahnak thawngin thlarau hna nih luatnak an hmuh khawh ko. 

Thazaang petu /- Saya Simon Hram Ling