Hakha Catholic Zumtu hna nih a Thicia mi Hna an Thlarau caah Thlacampiak nak an Tuah
Hakha Catholic Khrihfa hna nih a thicia mi hna thlarau caah thlacampiaknak Missa raithawinak cu November 2 ni ah Cawbuk sang um thlaan hmun ah chun hnu 2pm in 5pm karlak ah tuahnak an ngei. Missa tuahnak cu Bishop Lucius Hre Kung nih a hruai hna i Siangbawi 9, sister 13 le Hakha khuachungum Catholic Khrifa 300 hrawng an i tel kho hna.
Bishop Thluachuah pek lio. (Photo by RVA Hakha Service)
Bishop Lucius nih phung a chim i: “Nihin vawlei mi tampi nih a thi mi hna cu caan a hung sau deuh cun philh an si tawn an ti ko nain kannih Catholic hna nih cun kan philh hna lo. Nifatin Missa raithawinak ah thla kan campiak hna bangin kum fatin November 2 ni ah hleice in thlaanhmun ah i pumh in an mah hna caah thlacampiak nak kan tuah piak peng hna” tiah a ti.
Paul nih Khrihfa hna a cawnpiak mi hna chungin a chim i, “Nan nih cu a thianghlim mi si ding in kawh mi nan si kha philh hlah u” tiah a ti i Khrihfa pakhat sinak ah kawh kan sinak kha aa pummi hna sinah theih hngalh ṭhan ding in a sawm hna. Cucu a thianghlim mi Khrihfa nunzia le Pathian duh ning in a nung mi Khrihfa si nak caah a si a ti. Zeicah tiah cun Pathian cu a thianghlim mi a si i Pathian fa le sinak ah aa tlak mi si khawh nak hnga ding caah a si a ti.
Thlaan pumh lio ah aa tel mi Hakha khua um catechist pawl. (Photo by RVA Hakha Service)
Hakha khua chungah St. Joseph Cathedral Parish, St. Charbal Parih le Sacred Heart Parish tiin parish 3 an um. Parish chungum Khrihfa hna thlaan hmun ah tlamtling tein thlacamnak an tuah khawhnak hnga ding caah Parish hmunṭhu siangbawi hna le Khrihfa upa hna, mino hna i bawmhnak in thlaan thenh nak zong thlacamnak tuah hlaan ah rak tuah cia chung a si.
Siangbawi te nih thlaan thluachuah pek lio. (Photo by RVA Hakha Service)
Missa raithawinak a dih in mithi hna an thlarau caah thlacamnak (Liberame domini) an sak dih in siangbawi paruk nih thlaan vialte tithiang thehnak le rimhmui meikhu khutnak (hlawban) an tuah dih hnu ah Bishop thluachuah peknak in Missa raithawinak le thlanhmun thluachuah peknak tlamtling tein lim asi. Thlaan hmun ah a rak i pummi vialte hna caah a hlu tuahtu hna nih changreu le juice zong hrawmhnak zong an ngei hna.