Bawipa cungah Dirhmi Chungkhar

Bible Relding: Ephesians 5:21–33; Psalm 127:1–5; Luke 13:18–21

Nihin kan relmi cathiang hna nih Dawtnak kan ngeihmi, Zumhnak, Chungkhar nun hi Pathian sinah hrambunh dingin a kan sawm.

1. Dawtnak timi ah hin tordornak le mah mah sumnak a herh.

Voi(1)Bible relnak ah Paul nih nu le va pehtlaihnak kong a chim. Pakhat le pakhat i ṭhitumh timi cu midang pakhat kha tlaih cikcek ding le a cungah nawl ngeih dih nak ngeih kha si loin, dawt ding, upat ding le pakhat le pakhat herh baunak cungah i bawmh ding a si a ti. Jesuh nih dawtnak nunzia kha vailam cung a nunnak a pek nak in a kan hmuh sak cang ko. Cuve bangin aa ṭhi-um mi hna zong pakhat le pakhat cungah lungsaunak, ngaihthiamnak le zumhtlak sinak in nun ding in a cawnpiak.

2. Pathian tel loin in zei kan tuah hmanh ah pakpalawng an si ko. Psalm 127 chungah a timi cu “Bawipa nih inn cu a sak lo a si ah cun kan rianṭuannak hna cu pakpalawng men an si ko ee” a ti. Chungkhar pakhat kan dirh ko men lai; rian ṭhaṭha zong kan ngei ko men lai; sihmahsehlaw Pathian hruainak tel loin cun a herh bikmi kha kan hrelh a si ko timi kha kan theih ding a si. Cuasicaah, nifatin kan nunnak ah biakhiahnak kan tuah tikah siseh, pakhat le pakhat kan i chawnhbiaknak ah siseh, chungkhar kan dirhnak ah siseh Pathian kha kan kawh hmasa zungzal ding a si. 

3. Thil hmete tuahsernak in thil lianngan a chuah pi khawh ko.

Gospel chungah Jesuh nih vancung Pennak cu anṭam ci le thilnu he a tahchunh. An ṭam ci fa te nih a kung lian mi ah a chuahter khawh bang, thilnu hlum khat nih changreu hlum dihlak a thawhter khawh bangin thil hmete tuahsernak kan thok mi in thil lianngan a chuah pi khawh ve. Dawtnak nan langhter nak ah siseh, zaanfahnak nan langhternak ah sieh, mi pakhatpakhat an sual nan ngaihthiam hna nak ah siseh, cutin thil ṭha tete tuahnak in chungkhar chungah siseh, phu chungah siseh duhsah tein thil lianngan ah a chuak kho ve. 

Nihin ni ah thil phunthum in thei ṭhan hna u sih. Mah duhnak sumnak in pakhat le pakhat cungah dawtnak langhter hna u sih. Pathian cungah hrambunh mi nun in nung hna u sih. Cun thil hmete tuahser nak hna nih a chuahpi khawh mi thil lianngan kha thei zungzal hna u sih. Voikhat pi ah thil lian pipi kan tuah khawh lo hmanh ah duh sah te in Pathian nih caan rem a kan pek mi hna le zohkhenh dingin a kan chiah piak mi hna cungah zumh tlak sinak in nun khawh i zuam hna u sih. 

Thazaang petu /- Fr. Fidelis Maung Sein