Nan Sual I Ngaichih U, Nan Thi Sual Lai

Nihin caan ttha caan sunglawi a kan petu kan biakmi kan Pathian a hmasabik ah a minthiang thangtthat si ko seh! Nihin RVA in Pathian bia thazaang a latu zumtu hna nan dihlak cungah a thar in Bawipa nih thluachuah in pe ko hna seh. Nihin thawngtthabia Lk 13:1-9; ‘Nan sual i ngaichih u, nan thi sual lai’ timi in thazaang la hna usih. Mi a cheukhat nih Jesuh sin an ra i Pilat nih Galilee mi a cheukhat kha a thah hna i Pathian sinah raithawinak a pekchanh hna kong kha an rak chimh. Jesuh nih Galilee mi hna cu cubantukin thihnak an in caah Galilee mi a dang hna nakin an sual deuh tiah nan ruat maw, nannih zong nan nungning nan tthinh lo ahcun anmah thih bantukin nan thi ve lai. Siloam inn nih a nenh mi minung 18 an thihnak kha Jerusalem khuami hna nakin an sual deuh maw, nannih zong nan nunning nan thi ve lai a ti hna. Minung cu ruahlopi in a thi kho mi kan si. A thi khomi minung kan si caah thihnak cu thaizing maw kiptuh maw a ra lai, hlankan in chim khawhmi le hngalh khawhmi a si lo caah caan tawite kan nunchung ah zungzal nunnak kan sungh sualnak hnga lo caanttha kan ngeih chung ahhin Jesuh dawtnak a thei fiangmi le Jesuh nawl a ngaimi fanu fapa ttha si i zuam hna usih. Siloam inn nih minung 18 a nenh i a thimi hna kha Pathian dantatnak a si tiah an ruah ko lai. Asinain Pathian cu dantattu a si lo, a mi hna chun he zan he a zohkhenh zungzaltu a si. Minung cu Pathian sinin sual ngaihthiamnak kan herh zungzal timi hi kan philh lai lo. Sual ngaihthiamnak cu sual ngaihchihnak, sual thlahnak in hmuh khawhmi a si. Aho a si hmanh ah sual ngaihchihnak a duh lomi le sual thlahnak a tuah duh lomi cu a thi ko lai. Aho hmanh hi thih ding a kan siang lo, cucaah sual ngaihchihnak, lungthlennak caan kha kan pek ko hna a ti. (Biatlam 2:21). Isaiah 66:2 ah ‘mi toi ah aa dor i a sualnak aa ngaichih i a ka ttih i ka nawl a ngaimi hna cu an cungah ka lung aa lawm a ti’. Bawipa cu zeitikahdah na cungah a lung aa lawmh. Na sualnak na palhnak na theih i sual ngaihchihnak na ngeih i sual thlahnak na tuah tikah Bawipa cu na cungah a lung aa lawm. Bawipa a lung a lawmhtertu fanu fapa hna cu mi sualnak an zoh lo, mi sualnak an hmu lo, anmah sualnak tu kha an hmuh i sual ngaihchihnak an ngei i sual thlahnak an tuah. Taksa damnak an hmuh, thlarau damnak an hmuh. A ngaitu nan dihlak cungah Bawipa nih thluachuah in pe ko hna seh.