Thlacam le rianttuan cu aa tlai zungzal

Kan Bawipa Jesuh Khrih a rat lai nak ni le caan cu theih a si lo. Bawi Jesuh Khrih pumpak hrimhrim nih mi fapa a rat lai nak ni hi mi fapa hmanh nih a hngal lo, vancungmi zong nih an hngal lo, Pa Pathian lawng nih a hngalh tiah a ti bantukin khan kannih nih Jesuh Khrih a rat tikah timhcia kan sinak hnga dingah hi vawlei cungah kan nun chung ahhin zeidah kan tua lai i zeidah tuah loin kan hrial lai timi kha ruat awk tampi a um. Jesuh Khrih a rat lai nak kan hngah tikah hin a caan caan ahcun zeihmanh ttuan lo, zeihmanh tuah loin thlacam sawhsawh lawngin a ummi kan um, cun a cheukhat cu rian lawngte ttuan in thla a cam bal lomi kha kan um fawn. Mithiang Albert the Great nih zeitin a ti; vawlei cung kan nun chung ahhin thla kan cam caan a um lai i, rian kan ttuan caan zong a um lai. Thlacam le rianttuan cu aa tlai zungzalmi an si ee tiah a ti. Cucaah nifa te kan nunnak ah zeitindah kan nunnak kan i timhlamh timi kha ruat hna usih. Voikhat ah; misual pa pakhat, mi a that lengmang i a hnu ah amah kha thah dingin an tlaih ti a si. An thah lai nikhat ah na nu va ko law, na nu cu na duh bia rak chim tuah an ti. A nu cu a fapa sin a phak tikah a nu kha bia a ruah mi cu; ka nu, hi hlan ah ka sualnak vialte, ka tthatlonak vialte hi na rak ka chim bal lo, cuticun na sual, cuticun na palh tiah na ka ti bal lo. Ka nu nangmah ruangah atu bantukin thih ding ka si cang a ti. Kha tikah a nu hnakhaw kha a ttam e ti a si. Dawtmi u le nau hna, hika ah misual pa nih a nu daithlannak, a nu i a fa cung i chimhruah nak a ngeih lo ning, a sual a palh tikah chimhhrinnak a ngeih lo ning le hi vawlei cung a nun chungah ka tuahmi paoh hi a hmaan ko rua tiah ruah in a tuah tikah a donghnak ahcun thi seh tiah biaceihnak kha a tong. Dawtmi u le nau hna, nitin te kan nunnak ahhin tthatnak zeihmanh tuah bal loin kan nunnak kan caan vialte hi tthatlonak in kan hmang sual maw timi kha ruat usih. Cun a nu zong a fapa kha, ka fapa, cutin tuah hlah, hitin um hlah tiah chimhhrinnak ngei loin a sual zongah na sual ti loin a um caah a nu zong chimhhrinnak ah a chambau. Cun ralrin peknak zongah a chambau. Cucaah kannih nih Jesuh Khrih a rat lai nak kan hngak tikah kanmah pumpak zong nih zeidah kan tuah, kan tuahmi hi Pathian hmaika ah a ttha maw ttha lo timi le Pathian hmaika ah tuah awk le tuah lo awk hi ka thleidang kho maw timi kha i ruat hna usih. Hi misual pa nih a timi cu aho hmanh nih na sual na palh tiah an ka chimh lo caah ka hmaan dih ko tiah aa ruah. Sihmanhsehlaw vawlei cung ahhin na sual, na palh, na hmaan lo tiah chimh hau lo tein nu hrinnak thluak in thilttha tuah a cawngmi, pawngkam nunnak, pawngkam hawile nunzia zoh in thilttha a tuah thiammi zong tampi an um. Hawi ttuan bantukin ka ttuan ve lai, hawi tuah bantukin ka tuah ve lai, hawi nih cu bantuk an tuah mi cu a ttha lo timi thinlung te kan ngeih a si ahcun kannih vialte nih tthatlonak kha kan hrial ko lai i kan pawngkam kha aho hmanh sualphawt awk a um lai lo i kan nu ka pa le zong sualphawt an hau lai lo. Cucaah kan pawngkam i thilttha tuahmi zoh in a tuah thiammi kan si ahcun cucu Cathiang nih mifim a timi a si. Cucaah kannih nih nitin kan nunnak ah tthatnak tuah a cawngmi kan si khawhnak hnga caah i zuam usih. Cun 2Pet 3:13-14 chungah; Jesuh Khrih kan hngahnak caan ahhin zeidah kan tuah awk a si, zeitindah kan nun awk a si timi kha Mithiang Peter nih fiang tein a kan chimh. Hika ah Pathian he i remnak, dinfelnak he a khatmi vanthar le vawlei thar kha a hngakmi kan si bantukin kannih vialte nih vanthar le vawlei thar umnak i nuncan ziaza le thil sining vialte kha zoh in khi bantuk hmun i tuah hnga dingmi pawl kha hi vawlei cung kan nun chung hrimhrim ahhin kan cawn a hau i, soi awk um lo tein a thiang le soi awk um loin fakpi in i zuam uh a kan ti, cu lengah amah he rem tein um uh a kan ti. Cucu sualthlahnak Sacrament kha ttha tein tuah in sualnak i ngaihchihnak in Pathian he i remnak kha kan tuah zungzal lai, reconciliation timi sualthlahnak Sacrament kha a tling aa tlak tein kan tuahnak thawngin Pathian he kan i rem lai i Bawipa Pathian nih a kan kamhmi vanthar le vawlei thar kha lunglawm thanuam tein kan phan ve lai timi kha i ruahchan usihlaw i hngatchan usih timi kha nihin Cathiang bia in forh kan duh hna.