Kan lungput cu Khrih lungput siseh

Nihin kan nu Bupi nih Pathian bia a kan timhpiakmi chungin tlangtar ka duhmi cu; “Kan lungput cu Khrih lungput siseh” timi a si lai. Hika chungah zeidah kan hmuh ti a si ahcun Mithiang Paul nih Filipi khua i a ummi Khrihfa pawl kha biahalnak a tuah hna. Khrih chung i nan nunnak nih khan an tthawnter hna maw, a dawtnak nih khan nan hna an ngamter hna maw, thlarau he hawikomhnak nan ngei maw, pakhat le pakhat nan i daw in nan i zaangfah maw? tiah biahalnak a tuahmi kha kan hmuh. Nihin zumtu aa timi kan nunnak zongah hihi a biapi ngaingai mi pakhat a si. Zeicahtiah Khrih chung i kan nunnak ah tthawnnak, hnangamnak kan ngeih khawhnak dingah cun Pathian dawtnak kan theih a hau. Khrih dawtnak thei loin hnangamnak tling hi hmuh khawh a si lo. Vawlei thil ah hnangamnak kan kawl tawn, a caan ahcun kan hmuh caan a um ve ko lai. Sihmanhsehlaw vawlei thil nihhin zeitik hmanh ah tlam a tlingmi hnangamnak cu a kan pe kho bal lai lo. Hnangamnak tling taktak, lawmhnak tling taktak kan ngeih khawhnak cu Khrih chung lawngah a si. Cucaah cu Khrih i a dawtnak nih cun hnangamnak a kan pe maw, tthawnnak taktak kan ngei maw, cun thiangthlarau he hawikomhnak kan ngei maw, thiangthlarau kan ngeih lo ahcun kan Khrihfa sinak hi pakpalawng a si hnga. Zeicahtiah Pathian nih fiang tein a kan chimh mi cu; Khrih thlarau a ngei lomi cu Khrih ta an si lo tiah Mithiang Paul nih Rome Khrihfa hna sinah ca kuat hna. Khrih thlarau hawikomhnak kan ngeih lo i Khrih thlarau lamhruai umpinak kan ngeih lo ahcun kan Khrihfa sinak hi zeitik hmanh ah tlam a tlingmi kan si kho lai lo i teinak nun a ngeimi Khrihfa kan si kho bal lai lo. Cucaah Khrih thlarau he hawikomhnak kan ngeih i Khrih thlarau nih lam a hruaimi zumtu ttha kan si khawhnak ding caah nihin caan ah thazaang pek kan duh hna. Cun kan Bawipa Jesuh Khrih lungput ngeih ding kha Mithiang Paul nih Khrihfabu hna sin ca a kuat hna. kan Bawipa Jesuh Khrih vawlei a ratnak hi kan zoh tikah van sunparnak vialte kaltak in nautabik caw rawl einak kuang chungah minung cannak a lak ti kha kan hmuh. Cun Pathian sinak kha a ngei zungzalmi a si ko nain hramhram in Pathian tluk si awk kha cuh awkah a ra lo a ti. Amah lungtho te tu in cu vialte cu a hlawt i sal sinak tu kha aa laak. Kan Bawip Jesuh Khrih cu van sunparnak vialte kaltak in vawlei ah a rung ttum, cucu vawlei mi vialte khamh kan si khawhnak ding caah si. Khrihfa kan timi hna hi Khrih hnu a zultu kha Khrihfa timi cu an si. Khrihfa taktak kan si ahcun Khrih keneh zulh dingah auh mi kan si ti zong kha nihin ah chim ka duh. Kan lungput hi Khrih lungput bantuk si ve ding kha Mithiang Paul nih thazaang a kan pekmi cu a si. Cucaah kan lungput hi Khrih nih a ngeihmi lungput a si maw si lo ti kha i chektthan usihlaw Khrih nih a ngeihmi lungput cu zeidah a si; Khrih chung ahcun miphun thleidannak a um lo, sal a um ti lo, miluat an um ti lo, bawi an um lo, mi vialte hi Pathian hmaika ah pumkhat kan si. Nihin ni caan ah thleidannak kan ngeihmi hi zei ruang ah dah a si; Khrih lungput kan ngeih lo ruangah a si. Cucaah Khrihfa pakhat nunnak ah mi vialte hi hmunhma kan pek hna awk kha hi Bible thiang nih a kan cawnpiak mi a si. Khrih chung ahcun misual mi zong an i tlum i, Jentail mi zong an i tlum i, hlawhhlang nu zong an i tlum i, ngunkhuai khawltu zong an i tlum i, thinghmui mi zong an i tlum i, mi vialte kha an i tlum dih. A caan ahcun Khrihfa mi kan lungput hi a chiatuk i, mi zapi i tlum cu chim lo, a caan ahcun kan pawngkam umm i kan chungkhat hmanh an i tlum lo caan a tampi. Nihin ni ah zeidah chim ka duh ti a si ahcun; kan lungput hi Khrih nih a ngeihmi lungput, mi vialte aa tlummi lungput a si ding kha hi Bible cathiang nih a kan cawnpiak mi cu a si. Vawlei sunparnak vialte kaltak in Khrih hnu kan zulh ding kha Bible nih thazaang a kan pekmi cu a si. Cucaah vawlei sunparnak kawl loin van sunparnak a kawltu kan si i, kan lungput hi Khrih nih a ngeihmi lungput, nawl a ngaimi lungput, aa toidormi lungput, mi vialte nih cohlan awktlak lungput kan ngeih khawhnak ding kha nihin ni caan ah chim ka duh. Bawipa nih thluachuah in pe ko hna seh. Amen.