Lt. Col. Khai Mon Mang
Audio (aw) zongin ngai khawh a si. 👇👇
Amah cu 1924 November (23) ni ah Tedim peng Thuklai khua ah Pu Khai Khup le Pi Kim Zawng nih an hrin mi hna lak ah a pathumnak a si. A hmet lio ah an khua ah ca cawn hram aa thawk i cuhnu ah Tedim le Falam ah a kai tthan i Siangsangrun cu Maymyo (Pyin-Oo-Lwin) ah a kai nain Japan ral a thawh ruang ah a cacawn cu a ngol.
Japan ralpi lio Tedim ah Bo Thuam Cin le ramuk bawi hna nih an rak tuah mi Chin Levy ah a lut i, Allied Forces ah hmasa bik a ttuan. Cun Tedim ah an rak tuah mi Chin National Council ah lutlai ah U Vum Ko Hau, chungttuan ah – Pu Khai Mun Mang, chungtel ah Pu On Ngin, Pu Sum Mang, Pu Ngin Kho Thang, Pu Pau Za Kam, Pu Vul Za Thang, Pu Lian Cin Thang, Pu Kim Piu, Pu Lun Pum, Pi Khon Kho Cin, Pu Zu Cu, Pu Ngin Za Thawng, Pu Suang Pau hna an i tel. Cu hnu Bo Thang Za Hau, Bo Lian Cin Thang, Bo Ngaw Cin Pau nih an rak tuah mi Chin Defence Army ah le, Chin Patriotic Youth Organization ah hruaitu ah a rak i tel i Japan ral dohnak zong ah aa tel.
Japan ral daih hnu 1945-46 kum ah Assam ram Shillong English High School in tanghra a awng. 1946-47 kum ah Calcutta University ah a kai i I.A a awng. Cu hnu Yangon University ah a kai lio 1950 kum ah a voithumnak Bolawng training an aa tthial tthan i a kai. Cu a dih in Second Chin Battalion ah Third Kachin Battalion ah Captain rank in ralkap rian a tuan.
1957 kum ah B.A degree Yangon University in a hmu. Cu kum December thla ah England ram Warramley ah ralkap lei cawnnak (အပြည်ပြည်ဆိုင်ရာခဲယမ်းမီးကျောက်သင်တန်း) kha kumkhat rau in a va kai. Cu cawnnak a dih in (မထက်တန်းခဲယမ်းမီးကျောက်အရာရှိ) rian ah an kaiter. 1964 kum ah Tatzinhmu changtu, cun 1969 ah Tathmu rank ah an kaiter. 1979 December ah Lt. Colonel rank ah a dotdot in rank an kaiter.
1981-85 kum tiang Chin State People’s Council Chairman a tuan. Hi rian in aa dinh hnu ah ralkap ah a lut tthan i 1982 February thla ah Matupi ah Lairam aiawh in tuah mi Pyidawngsuh Thantar donnak puai ah an rak kai. Cu dih in Mindat ah Tamadah bawi ai-awh ah (လွတ်လပ်ရေးမော်ကွန်းဝင်တံဆိပ်) kha an rak pek. 1983 kum ah Falam ah Thantar donnak ah a kai i cu puai dih in Falam High School Diamond Jubilee ah a kai tthan. Cu lio ah cun Thantar don puai hi lungrualnak a langhtertu a sunglawi mi puai pakhat a si caah kumtin te sunglawi ngai in an rak tuah. Cu hnu ah Yangon ah 1984 kum Thantlang le 1985 kum Hakha ah tuah mi Thantar donnak puai zong ah hruaitu in a rak i tel. Cun Union Day Discussion biaruahnak zong ah siseh, Sagaing sianginn tumnak puai zong ah siseh tlolh lote in kumfa tin a rak kai. Amah chan lio ah February (20) ni kha Chin State Day & Chin National Day ti in biatlangpi tar in an rak tuah. Hakha i Vom Thu Maung cerhmun ah an rak tuah tawn i Pyine Pyituh Council ohkathah min in amah nih bia a chim lengmang.
Matupi peng 1982 January thla Sialtlai Tanglai sianginn hunnak puai zong ah rianṭuan hawi hna he an rak i tel. Anmah chan lio miphun min kong ah buainak a chuak i Khuang Sai min hmang ti lo in Thado Kuki Chin telh in hman ding (1.5.1984) kum ah bia an chah.
1983 April thla ah Vanlawng in Tamadah San Yu cu Hakha ah an ra phan i Pyine Pyituh Council zung ah meeting an rak tuah. Meeting hruaitu Major Al Ir a si i Lt. Col. Khai Mon Mang, Capt. Thla Maung, Pu Gay Khui Shing nih Chin ram le Chin miphun caah an duh herh mi kha an chim. A thaizing ah Tamadah cu Tedim ah a lan.
1952 May thla ah Pi On Za Cin he an i um i fa 4 an ngei. Amah cu Pathian a ṭanh ngai mi Biaknak a ṭizah ngai mi zong a si. 1990 February (23) ni ah sertu Pathian sin ah aa din.
Credit/ Ca Ttialtu-Salai Okla Bik/ Cauk Min-Chin Hruaitu Hna Keneh Dawh