Caesar ta cu Caesar kha pe ulaw Pathian ta cu Pathian kha pe ko uh

Matt 22:15-21; Cu tikah Farasi mi pawl nih amah kha a bia in zeitindah kan fawih khawh lai ti ceihkhan awkah an chuak. Cun amah an rak zulh cu Herod minung cheukhat hna he a sinah an hei thlah hna i, amah kha ‘Bawipa, nang cu miding na si i Pathian lam kha a din ning tein na cawnpiak ti cu kan hngalh. Cun aho hmanh na ttih hna lo. Zeicahtiah nangmah caah cun minung lianngannak cu zeihmanh a si lo. Cucaah Caesar sinah ngunkhuai pek ding a si maw si lo, ruahnak kan chim tuah’ tiah an halter hna. Sihmanhsehlaw Jesuh nih an ruahnak a tthatlo kha a rak hngalh ziar i ‘nannih mi depde hna, zeiruangah nan ka hneksak. Ngunkhuai nan pekmi tangka cu ka hmuhsak tuah u’ tiah a ti hna. Dinari fangkhat kha an chanh. Cun amah nih ‘hihi ahodah a si? aho min dah aa ttial tiah a hal hna. Annih nih Caesar tiah an leh. Cu tikah annih kha ‘a ttha tuk! Caesar ta cu Caesar kha pe ulaw Pathian ta cu Pathian kha pe ko uh’ tiah a ti hna. Khrih Bawipa thawngthabia. Dawtmi u le nau hna, nihin zarhpi zarhkhat chungah 29 nak kan phan cang. 2026 chungah Pathian nih a kan zaangfah, Pathian nih a kan dawttuk. Nuam te le dam tein hibantukin kan i tontthan hi Pathian thluachuah a si, kan i lawmtuk ti kha chim hmasa ka duh. Nihin Bible kan relmi vialte kha abik in kan zoh a si ahcun ram chung mi sinak pahnih kan ngei. Minung cannak le Pathian fa thlarau sinak timi biafang te hi kan hmuh khawh. Matt chungah kan relmi ah; Siangpahrang ta thil a simi kha Siangpahrang kha va pe ulaw Pathian ta a simi cu Pathian kha pe uh tiah Khrih nih fiang tein a cawnpiak hna. A ruang cu Jesuh Khrih sinah khan an ra i, Caesar Siangpahrang sinah ngunkhuai kan pe lai maw pe lo dah ti kha an hal tikah Jesuh Khrih nih; a si ahcun phaisa kha rak ka pe uh a ti. Cu tikah phaisa fangkhat kha an rak pek. Mah chung ahhin aho min dah a ttial, aho mui dah a um tiah a hal tik hna ah Siangpahrang Caesar min le a mui a um tiah an ti. Asi ahcun Siangpahrang ta cu Siangpahrang kha pe ko uh, Pathian ta cu Pathian kha pe ko u tiah a ti tik hna ah Pathian vawlei timi umnak kha a chimh hna. Kanmah zong hi ram chungmi kan sinak, Kawlram chungah kan um tikah Kawlram (မှတ်ပုံတင်) kan ti, ramleng kan kal tikah Kawlram mi an kan ti. Khrihfa kan sinak zongah vancung pennak kha a um. 1535 kum ahkhan England Siangpahrang Henry (8) nak pa kha a nun lio a si. Amah cu nupi a tthi i RC Bupi chungah lehthah ciami a si. Sihmanhsehlaw fapa a ngei kho lo. Mah tikah nupi dang tthit in fapa ngeih kha a duh. Cucaah nupi pahnihnak tthit ding kha a ruat. Sihmanhsehlaw Catholic Bupi chungah cun voikhat lehthah ciami cu a nupi a nun rih ko ahcun voihnih lehthah khawh a si lo, a nupi a thih hnu lawngah lehthah khawh a si. Khrih cawnpiaknak kha a si tikah Rome khua Pope sinah a hal. Pope pa, keimah cu nupi dang ka tthit duh, cucaah nawl rak ka pe law tiah a hal tikah, Pope nih; cucu a si kho lo, Pathian nih cubantuk cu a kan cawnpiak lo, Bupi cawnpiaknak a si lo, cucaah na lehthah ciami he khan ttha tein um ko u. Nupi dang kha tthit in lehthah khawh na si lo a ti tikah Siangpahrang pa cu a thin a hung i, keimah cu Siangpahrang ka si ko cuta, keimah nawl a si a ti i, England rampi cu Catholic Bupi in chuak in Church of England kan ti lai a ti. Cucaah atu i Church of England kan timi cu Siangpahrang Henry (8) nih a rak thawkmi a si. Cucu Siangpahrang tuahmi bupi kan ti khawh. Mah chungah khan council ah aa telmi, zumhnak ah a tthawng ngaimi ahkhan RC pakhat a um. Siangpahrang nih Church of England biaknak nan zulh dih lai, ka nawl nan zulh dih lai tiah nawl a chuah. Cu lioah Thomas More kan timi pa cu zei a si zongah ka biaknak le ka zumhnak cu ka kaltak lai lo a ti i, minung sermi biaknak cu ka zulh lai a ti tikah an tlaih i an hrem i thong ah an thlak, A rauh hlan ah 1535 ahkhan amah kha an thah, zumhnak ah a thi. Mithiang Thomas More kan ti. Miung le Pathian umnak ah amah cu Pathian kha a thim taktak cang. Cucaah nihin kan relmi Bible kha kan zoh tikah vawlei pathian le Van Pathian thleidan thiam ding kha a kan cawnpiak. Mithiang Thomas More cu nihin ah zohchunh awktlak a si taktak. Nihin kan relmi Bible vialte zong nih Vancung Pennak kong a kan cawnpiak. Vancung Pennak cu khoika dah a um? Kan lungthin chungah, kan zumhnak chungah, Khrihfa vialte nih nihin ah Mithiang kan timi pawl kan zoh tik hna ah zumh fek tein an nung i vawlei nunnak kha an kaltak, vawlei thilri kha an kaltak. Khrih nunzia kha an zulh. Cucaah Pathian fa kan sinak, Pathian mi kan sinak kha Mithiang Thomas Mor e nih a kan hmuhsak i nihin Khrih cawnpiaknak chung zongah Pathian ta kan sinak kha a kan cawnpiak. Cucaah kan nunnak Pathian kha i thim usih, bia taktak usih, kan nunnak cu thih tiangin Pathian a zummi kan sinak hnga i zuam cio usih.