Na Biakmi Pathian cu Na Ṭanh taktak ve Maw?
Bible relding: Ephesians 1:15-23; Psalm 8:2-7; Luke 12:8-12
Nihin a voikhatnak kan relmi (Eph. 1:15-23 / Lk. 12:8-12) hna hi an si. “Hihi kan thim hna; zapi hmaiah a ka ṭanhmi cu Mi Fapa nih, Pathian vancungmi hna hmaiah, a ṭanh ve hna lai. Sihmanhsehlaw nangmah ta ka si lo tiah zapi hmaiah aa phehmi cu, Pathian vancungmi hna hmaiah Mi Fapa zong nih, ka ta nan si lo, tiah a ti ve hna lai. Mi Fapa a thangchiattu cu ahohmanh ngaithiam an si lai, sihmanhsehlaw Thiang Thlarau a thangchiattu cu ngaihthiam an si lai lo. Pumhnak inn ah siseh, mangki bawi hmai le uktu bawi hmaiah tazacuai awkah an in chuahpi hna tikah, zeitindah kaa runven lai i zei bia dah ka chim lai, tiah nan khuaruah va har hlah u. Zeicahtiah Thiang Thlarau nih khi caan ah nan chim awk cu an chimh ko hna lai,” tiah a ti.
Nihin cu Mithiang Ignatius puaini a si. Mithiang Ignatius min a lami vialte Happy Feastday tiah nan kut kan in tlaih hna. Mithiang Ignatius cu thawngṭha ṭialtu, Johan a zultu, a si. Mithiang Peter kut chungin Bishop cannak a hmumi a si. Antioch Bishop a si. Rome Siangpahrang minung panga hna nih Bupi an hrem lio, Khrihfa an thah lioah Bishop rian a rak ṭuanmi a si. Bupi a ṭanh ruangah Rome Siangpahrang nih a tlaih i chiandaih rawl ah a pekmi a si. A thih hlan ah bia a chimmi le ca a ṭialmi tampi chungin, “Kei cu sahrang pawl nih an ka ei awk ka si, zeicahtiah kei cu Bawipa a facang ka si,” tiah a ti. Khrihfa mi ngaihnak ah hnangamnak, lawmhnak a um lo. Pathian fa sinak ah hnangamnak, lawmhnak a um, a ti. (AD. 33-68) lakkar ah Jesuh zultu hna cu ‘zultu’ tiah an rak auh. (AD. 68-107) kar ah zultu hna cu ‘Khrihfa’ tiah an rak auh. “Khrihfa” timi hi Antioch khua in hram a rak thawk (Lam. 11:26) ah, (AD. 107) ah Antioch Bishop Ignatius nih Jesuh cu mi vialte caah a thih bantukin hi Khrihfabu zong hi zapi caah siseh a ti i Greek holh in ‘Catholic’ tiah min a sak. (AD. 107) in nihin ni tiang Catholic a si. ‘Catholic’ a sullam cu zapi caah zapi bu tinak a si. Catholic min a petu hi Mithiang Ignatius hi a si. Amah cu nihin Jesuh a ṭanh ruangah Rome Siangpahrang Trajan nih a thahmi a si.
Nihin thawngṭhabia chungah, zapi hmai ah a ka ṭanhmi cu kan ṭanh ve lai, a ka ṭanh lomi cu ka ṭanh ve lai lo. Nihin a thli tein Bawipa kan ṭanh lonak a tampi ko lai. Khrihfa kan sinak a langhter duh lomi, a ning a zakmi kan tampi ko lai. Cu chungah nangmah zong naa tel ve ko lai. Khrihfa kan sinak hmelchunhnak cu Vailamtahnak hmelchunhnak hi a si. Hihi zapi hmai a tuah ngam lomi, a ning a zakmi kan tampi ko. Kan nu Bupi cawnpiaknak vialte hi na hmur le kaa nih a chim lo zongah na lungthli tein a pum lomi, na zumh lomi a um ko. Minung kan si i kan palh kho, kan sual kho. Sihmanhsehlaw sual ngaihchihnak na ngeih i sual thlahnak na tuah a si ahcun sual ngaihthiamnak na hmuh lai. Sihmanhsehlaw Bupi cawnpiaknak Bupi zumhnak na pom lonak, na zumh duh lonak chungin sual ngaihchihnak na ngeih lo ahcun Thiang Thlarau ralchanhtu na si. Zeicahtiah Bupi cawnpiaknak cu Jesuh cawnpiaknak a si.
Nihin a voikhatnak kan relmi (Eph. 1:23) ah, “Khrihfabu hi Khrih a pum a si.” Na sual, na palhnak vialte naa ngaichih duh lo ahcun Thiang Thlarau ralchanhtu na si. Thiang Thlarau a thangchiattu cu sual ngaihthiamnak a um ti lo, timi hi nihin thawngṭhabia nih a kan chimh duhmi a si. A ngaitu nan dihlak Bawipa nih thluahcuah in pe ko hna seh.
Thazaang petu /- Saya Francis Khua Pheng