St. Margaret Mary Alacoque, Virgin
St. Margert Mary Alacoque cu Jesuh lungthin thiang lamkaltu a si i AD 1647kum, France ram Burgundy khua ah a rak chuak. A ngakchiat tein a pa nih a rak thihtak i sal bantukin a komh (tuah) mi a ni nih a hremnak kha ing khawhnak caah Bawipa thisa tukha thazaang laknak caah a hman. A chungkhar nih an thlauh ko bu in kum 21 a siah Paray-le-Monial khua i kenkip vakin bawmhnak rianṭuantu Sister bu ah a rak lut. Sister cannak a hmuh hlan i a nunnak cu a rak har ngaingai. 1673 kum December, 27 ni thawkin thla 18 chung khengte Bawipa Jesuh nih Biakinn chung missa cabuai (Alta) cungin a pumbakin langhnak a hmuhsak. Jesuh nih amah kha a auh i a lungthin thiang dawtnak a ngan zia kha a hmuhsak. Cu lengah midang cungah ṭhatlonak tuah in a hliam a sersatmi hna kha lungthlenter awk caah pekchanhnak tuah in thlacampiak dingah a rak fial. Thlathawk zarhkhatnak cawnni ngani fate ah lungthin thiang kha biak in pekchanhnak tuah piakding, cawn nilini fate zanṭim 12 hlan suimilam pakhat a duh ah siseh, a thiangmi Jesuh lungthinthiang Puai ni zong kha tuahpiak in siseh biakpiak ding tiah a rak chimh.
A uktupa nih khan a rak zumh lo caah huham thawnnak pakhat langhter dingin a rak chimh. Cu caan bakah nitlawmpal ah fakpiin a rak zaw i a zawtnak cu khuaruahhar in a rak dam ṭhan. Cuhnu ah Mary cu, Bawipa Jesuh nih Khuachia Satan hlennak ah na phanh nakhnga lo na cung upa, uktu hna hnatlaknak um loin zeithilhmanh na tuah lai lo, tiah a rak timi kha a vun i theihṭhan. Cu kong cu minih an theih tikah Biaknak lei a theihhngalh mi a cheu hna nih an zumh kho lo i, Sister Margerat kha rawl (ei le din) tam deuh na ei a herh tiah ruahnak an rak pek. Vanṭhat ah Siangbawi Clawd La Colambiere nih cu harnak kha ṭuanvo a rak lak i Biaknak lei uktu hna hmai ah cu khuaruah har langhnak kha dirkamh in a rak khamh piak. 1687 kum ah Jesuh lungthinthiang upat peknak caah Prier khuaah Biakinn pakhat ansak I lungthinthiang upat pek biaknak cu Bupi chungah a karh.
Mithiang St. Margaret Mary cu 1690 kum ah dai tein a rak thi.