St. Ignatius of Antioch, Bishop & Matyr

Antioch khua Bishop St. Ignatius cu thawngṭha ṭialtu Johan i sinum a si. Amah cu St. Peter kutchungin Bishop cannak a lak i zohchunh awktlak Tuukhalṭha pakhat sinak in kum 44 leng tiang a ṭuan. Trajan Siangpahrang hremnak caan lioah chiandeih rawl caah pekding in thong an thlak i Rome khua ah an rak kuat. Achanchung ah amah chungtel a uanu hna kha zumhnak lei ah a fekter chin hna i, minthangmi cauk (7) kha a rak ṭial. Biaceih tu bawi kha nawhthuh pek i thongchung in luatter dingah khua a khangmi Rome khua Khrihfa hna sinah, “Hi sahrang hna cu Pathian sin ka kalnak ka lam tlangtlatu an si caah an nawl si ko ning. Keimah cu Pathian changvut ka si caah hi sahrang hna haa in rialkhainak ka in te lai; cuti a si lawngah Bawipa Jesuh i a thianghlimmi rawl ka si telai” tiah ca rak ṭial. Kum 107, Rome khua a phak hnuah a har sersat hremnak in thihdan pekdingin Coliseum ah an kuat colh.

            Ni saupi rawl loin an khumh mi ṭihnung ngaimi Chiandeih pahnih nih chitkhatte ah an dolh hna. Atangmi a ruhkhua tlawmpal kha Rome khua ah mansung thilhlun caah nihin tiang an chiah i an upat cio.