Fa Ngeihning Phungphai
- Fa pawi, ngeih tikah i zohkhenh ningcang (1)
Laimi hi fa kan ngeihning kong he pehtlai in ttial ding tampi a um i cucu zulh le ulhmi ah tam deuh in kan ttial te lai. Laimi nih kan zumhning ah minung cu chiattha thleidang kho tu kan si bantukin kan nu paw chung i kan um lio tein tukforhnak kan tong tiah ruahnak a um. Cucaah hrialmi le tuahmi tete kan ngei hna. A nupi thlano a theih i a titsa le a pum nih a hiarmi kha a va nih a si khawh chungin kawl le zalhpiak khawh an i zuam tawn. A nikhua a tlin lai ah zuhoi hna tuah donh a um i a ngan a hung fah cun vanlung (varlung) hram ah ihnak le umhmun tuahpiak a si tawn. Kan Laiphung in mah nuva hna cu phun aa tiangaw lo an si ahcun an khuazing biaknak kho le kheng hna kha kaa dang ah an tthialhnel dih hna. Nau aa tthen hnu lawngah mah hna kha a umnak ah an chiah tawn. Naungeih, fahrin lainak kong he Chin Hlah Aung nih a tanglei bantukin a ttial hna.
Naungeih tikah khuachung i nau ngeihter a thiammi kha an auh i cu nihcun ngeihternak an tuahpiak. A va dah ti lo cu nau chuah lioah a pawngah ahohmanh an um lai lo. A nau ngeih hna a har nawn ahcun minung pakhat nih chai le ngahringdawi sei kha aa laak lai i nau ngei liomi pawngah a chiah lai. Cu tikah hi bangin thla a cam lai. ‘Nu si kun, pa si kun na pawngah hi thil kan in hunh, taap lo le i din loin chuak cang’ tiah. Cu hnu i a chuah hlei lo ahcun khuachung ah thlacamtu kha an auh lai i zupu puhnih an dah lai. Thlacamtu sinah zei nih dah a khenkham i a chuah lonak le zeidah a duhmi a sinak kong kha an hal lai. Cu thlacamtu nih khuazing le khuavang kip kha a ton, a kawh hna lai i mah hna nih an duhmi le an hauh hna mi sa kha thahdahpiak a si lai. A va nih a herh zat sangpi tiang a kawlhlai lai i an thahdah ko lai. Nau a hung chuah tikah nu pakhat nih a hlawm lai i nu le pa a si kha a chimh hna lai. An rak i damh ciami laahrual khan a lai chungah thli a luh nakhnga lo an reh an ttem kanh lai i a fek cang an ti hnu ah ruatak an rak i rinmi khan an lai an tan lai. A nu kha a paw le a pang puan in an men i a hlam kha inn tangah an thlak lai.
Hlan ahcun a hlam phum cu nau dam lonak a si tiah an ruah. Cheukhat khua ahcun a va thengte nih a hlam kha an phum tawn, a tawngh duh lo ahcun ‘a kan duh lo caah a si’ tiah ngaihchiatnak ah a hmangmi zong an um len. Cheukhat khua ahcun a phun a sang deuhmi nih amah tiangaw lo an tthit i nau an ngeih tikah an hlam kha tawngh a si lo.