El Niño cu vawleicung hngakchia 347 million caah ṭihnung asi tiah UNICEF nih ralrin a pek
Rili cung nilin (El Niño) ruangah tilianhnak, caan saupi khuakhen ruang ah cinthlakmi kumvoi lo in mangṭaam tlunnak, ti a har ruangah hmun khat in hmundang ah i ṭhialnak le siang ngakchia hna fimcawnnak ah dawnkhaantu a chuak kho tiah United Nations agency (UNICEF) nih ralrin a pek. Hi El Nino cu tuanbia (record) ah a fakbikmi nilin hna lak ah pakhat asi i hi thil ton asi hlan ah acozah hna nih hlankan tein timhtuahnak ngeih ding in UNICEF nih ralrin peknak le forhfialnak a tuah. A ralai mi thla (2026 in 2027) chungah a cang dingmi El Niño a chuah tikah vawlei cung ram 100 hrawng ah ngakchia 347 million tangṭumlo hna nih a hnawng (စိုစွတ်) tuk asiloah, a rocartukmi dirhmun ah an um lai tiah UNICEF nih ralrin a pek. Pacific Rilipi i hmun zeimawzat ah voidang nak in alet tampi a lummi ti ruangah vawleicung pumpaluk ah nikhua thlennak (climate change) a chuak lai i kum dang nak in tukum (2026 in 2027) ah hin a zual bik, a ṭhawng bik, a fakbikmi (El Nino) nilin asi lai tiah chimchungnak theih asi.
UNICEF nih a chim ning ahcun, hi El Nino ruang ah tilianhnak, vanruah a har ruangah mangṭaam tlunnak le ngakchia hna caah tirawl eidin harnak, fimcawnnak tiang a hnursuan kho tiah ralrin peknak an tuah. El Niño cu Ngakchia caah punghman nikhua sining nak in ṭih a nung deuh tiah UNICEF Executive Director Catherine Russell nih a chim. Chim duhmi cu El Nino ruangah ti le rawl harnak, zawtfahnak i chawhnak le fimcawnnak lei zong ah harnak an chuak kho ti asi. Hi ruang ah sianginn zong khar asi kho i, innchungkhar ah phaisa chawva lei harsatnak an tong kho tiah ralrin a pek hna. Cupin ah Asia le Pacific ram hna ah tukum October in December tiang, ningcang lo in ruah surnak asiloah ram rocarnak a chuak kho i cu nih cun ngakchia million 190 hrawng harnak fak piin a pek khawh i, Nichuahlei le Thlanglei Africa ngakchia million 41 si hna seh, Latin America le Caribbean in cu zat hrawng nih harnak an ton khawh tiah UNICEF nih ralrin a pek fawn.
Europe le Central Asia ah ngakchia 22 million hrawng zong nih an tuar khawh i Middle East le North Africa le Nitlaklei le Central Africa ah ngakchia 20 million hrawng zong nih an tuar kho ralrin peknak an tuah.Colombia, Fiji, Papua New Guinea le Philippines telh in a cheu khat ram hna ah van ruah a har ruang ah ti a tlawm ruangah lothlo mi hna caa harnak asi lai. Cu ruang ah hmun dang ah i ṭhialnak, peemnak hna a chuahpi leng ah ngakchia hna caah vitimin chamhbaunak a zualter khawh tiah an chim. Kap khatlei ah, Greater Horn of Africa hrawng ahcun kum dang nak in ruah fak a sur lai i abik in Somalia ram hrawng ah ruahfak a sur ruang ah tilianhna le ti in zawtnak i chawhnak, sianginn kharnak tiang a chuak kho ti asi. Ram sifakmi hna, buaibainak le ralzaamnak ram hna nih hi El Nino kokek harnak an tuar khun lai tiah UNICEF nih ralrin a pek.