JERUSALEM AH A KAINAK LE A LUHNAK
Amah kha thlir a si lainak ni a naih tikah Jesuh cu Jerusalem lei hawih in a kal. (Lk. 9:51, Jn. 13:1). Hi bang lungthlek in Jerusalem lei a kal cu a thihnak ca timhtuahnak a si. Voithum tiang a temhinnak le a thawhṭhannak kong kha a chim. Atu cu Jerusalem lei ah hawih in, “Profet pakhat cu Jerusalem lengah thih phung a si lo,” a ti. (Lk. 13:33, Mk. 8:31-33, 9:31-32, 10:32-34).
Jesuh nih Jerusalem ah an thahmi profet hna kha a rak ruat ṭhan hna. Sihmanhsehlaw Jerusalem kha a pawng ah rak i pum seh ti kha a duh rih. “Arpi nih a fale kha a thla tangah a pumh hna bantukin voi zeizatdah kan pumh ve cang hna! sihmanhsehlaw nang nih na rak duh lo.” (Mt. 23:37). Jerusalem kha a langin a vun hmuh tikah a tap i a lungduhnak kha voikhat in a langhter ṭhan. Nihin hmanh ah daihnak a chuahpi mi thil kha rak hngal hna law! Sihmanhsehlaw atu ah annih cu na hmai in an i thup dih.” (Lk. 19:41-42) a ti.
Zeitindah Jerusalam nih Messiah cu a don lai? Jesuh nih Siangpahrang siter awk an ni zuam tik paoh ah khan a rak al hna. Asinain a pa David khua ah Messiah in a luh ding aa ṭialmi a tlinnak caan kha thim i timhtuahnak kha a tuah. (Lk. 1:32, Mt. 21:1-11, Jn. 6:15). “David fapa, Hosanna,” an ti. (Hosanna cu khamh asiloah khamhnak kan pe ko tinak a si). Sunparnak bawi Siangpahrang cu a khualipi chungah laa cit in a lut. (Ps. 24:7-10, Zech. 9:9). Jesuh nih Zion fanu kha a tei; cucu a Bupi mui a si i hriamnam in siloin biatak a kengmi toidornak in a si. (Jn. 18:37). Cu ni ah pennak fale hna cu ngakchia le misifak hna an si. (Mt. 21:15-16, Ps. 8:3, Lk. 19:38, 2:14). Vancungmi hna nih tuukhal hna sin thawng an thanh lioah cuticun an rak tic ang; “Bawipa min in a rami cungah thluachuahnak um ko seh”. Hi bia cu Bupi nih Bawipa thisa biaknak ah “A thiang, a thiang” (Santus) tiah hla in a sak. (Ps. 118:26).
Jesuh Jerusalem khua a luhnak nih Messiah nih a thihnak le a thawhṭhannak lanhtak in a tlinh laimi a ra laimi pennak kha a langhter. Kuhchuk puai Zarhpini ah Khrih Jerusalem a luhnak kha tuah in Bupi nih a Thiang Zarh kha a hun.
Jesuh nih a thih hlan le a thawhṭhan hnu in a pekmi Bible sullam phuannak kha Bupi nih fek tein aa tlaih. “Khrih nih mah thil vialte hna kha ing in a sunparnak ah luh awk a si ti hi a herhmi a si lo maw? (Lk. 25:26-27, Mt. 20:19). Jesuh cu upa hna le tlangbawi hna le phungbia cawnpiaktu hna nih an hlawt i cawhdeh awk le tukvelh awk le vailam tah awkah Gentel mi hna kut ah an chanh. (Mk. 20:19). Khamhnak a sullam kha theihthiam deuh awkah Jesuh a thihnak ningcang kha Thawngṭhabia nih a kan chimh ning tein le tuanbia dangdang hna kha kan kawl kan hlat a hau.