Kan Chawva in Zungzal Nunnak Kawl Ve U Sih

Nihin ah hrawmh kan duh mi hna cu Zakia a nunzia aa thlennak kong le vawlei cung a chawva kha mi sifak hna caah a pek ning kha a si lai. 

Dawtmi u le nau hna, nihin ah Zakia kong kha tlawmte kan vun zoh a si ahcun Luke 19:8 in ‘Sihmanhsehlaw Zakia cu a hung dir i Bawipa cu, zoh hmanh Bawipa, ka chawva hnarcheu cu mi sifak ka pek hna lai. Cun mi pakhatkhat ka rak hlen sual a si ahcun letli in ka cham lai tiah a ti. Cu tikah Jesuh nih amah cu, nihin ah khamhnak cu hi inn ahhin a phan cang, zei ruangah ti ahcun hi pa zong hi Abraham fapa a si ve’.

Dawtmi u le nau hna; hi kong hi kan vun ruah a si ahcun vawlei cung chaw le va timi hi a hmun lomi an si. 

Luke 16:9 kan zoh tikah hi vawlei cung chaw le va hin hawikom ṭha i ser hna ulaw a donghnak ahcun hi phaisa le vawlei cung thilri a dongh tikah zungzal nunnak hmun ah an hruai hna lai tiah a kan ti. Cucaah hi vawlei cung kan chaw le kan va hna hi kanmah pumsa duhnak caah siloin kanmah pumsa duhnak caah a si sual ahcun mirang nih ‘money is the root of all evil’ phaisa cu ṭhatlonak vialte a hrampi a si tiah an ti mi kha ruat ṭhan hna u sih. Sihmanhsehlaw Bawipa Jesuh nih hi a hmun lomi phaisa le chawva hna hi zungzal nunnak co awkah, hawikom ṭha ah hman awkah a kan fial.

Nihin ah Zakia zong vawlei cung mithmuh ahcun misual tuk a si ko nain a chaw le va kha zei ah dah a hman; Pathian sinin ngaihthiamnak hmuh awk caah a hman kha kan hmuh khawh. Abraham fa taktak i can awk ah khan a hman. Cucaah Judah mi pawl nih kannih cu Abraham tefa kan si tiah an ti ko nain an lungput le an ziaza zoh ah Abraham tefa sinak kha an langhter kho lo. Sihmanhsehlaw Zakia cu a hlan ah a rak sual tuk ko nain a chaw a va ngeih mi kha lonh kawh in, a lung aa thleng i Bawipa a rak kawl i Bawipa a hmuh ṭhan tikah zaanriah zong a dangh fawn. Cun ka chaw ka va, ka thilri tanṭim bak kha mi sifak caah ka pek lai tiah a ti lengah ka hlen thawi sualmi an um a si ahcun a letli bak in ka cham hna lai a ti tikah Bawipa Jesuh nih hi bak hi Abraham tefa a sinak a si tiah a thangṭhat.

Vawlei cung ah hin ahodah Abraham tefa a si kho hnga tiah kan ti tikah hi vawlei cungah sualnak i ngaihchih in le kan chaw kan va kha a harsa mi kan u kan nau le hna caah, cun thlarau rethei mi kan u kan nau caah kan hman thiam a si ahcun Abraham tefa kan sinak kha kan langhter khawh a si lai. Cucaah Zakia bantukin kannih nih kan chaw le kan va kha mi caah kan hman thiam i, cun vawlei cung ahhin mi thil kan hrawh sual caan zong a um kho; mi thil a lak in kan hman can zong a um kho. Sihmanhsehlaw kannih nih kha kan hman mi thil kha a letkhat te hmanh in va cham ding kha kan zaang a ei ṭheo.

Sihmanhsehlaw hika ah Zakia cu letkhat vun chim lo, letli bak in ka cham hna lai tiah a ti. Kha hrimhrim ahkhan Abraham tefa a sinak kha a langhter. Nang le kei zong kan ngeihmi chawva vialte hi zungzal nunnak lam ah a kan hruaitu kan hawikom ah ser usih. 

Cun Bupi nih nihin ni ah Hungary Siangpahrang fanu Elizabeth puai kha a kan tuahpiak. Hi nu a nunzia hi kan zoh tikah bawi pakhat he an i ṭhi-um i fa pathum an ngei ko nain a va pa a vun thih tikah va dang ngei ti loin a fale he amah a nunnak le a chawva vialte kha mi sifak le mi damlo hna zohkhenhnak caah, inn tiang zong a sak i amah a thazaang a fimnak, a thiamnak vialte zong a nunnak a taang rihmi vialte kha mi sifak le mi damlo hna caah a rak hman. 

St. Elizabeth cu Siangpahrang fanu a si ko nain vawlei cung chawva kha amah pumsa duhnak ah hmang loin pumsa rethei mi, thlarau rethei mi hna caah a rak hman. Cu bantukin kannih vialte zong Hungary Siangpahrang fanu Mithiang Elizabeth bantukin kan chawva kan thinlung, kan ruahnak, kan fimthiamnak vialte kha Bawipa a minung a simi mi sifak hna, thlarau rethei mi hna le a bik in mi dam lo vialte caah kan hman ve a si ahcun kannih zong nikhatkhat ah Mithiang Elizabeth bantukin zungzal nunnak co awkah a chawva a hmangmi bantuk ah kan si lai i Mithiang zong kan si ve lai. Cun Zakia bantukin kan chawva kha mi sifak hna caah rethei mi hna caah hman i zuam ve usih timi in nihin thawngṭhabia in thlarau rawl hrawmh kan duh hna. 

Thazaang petu /- Fr. Abraham Hrang Hit

Leave a Reply

Your email address will not be published. Required fields are marked *