Zumhnak he a Nung Mi Kan Si

RVA Program hmangin thawngṭha hrawm ṭinak caan ṭha a kan zaangfahtu kan Pathian amin ka thangṭhat. 

2026, October (02), caankel zarh (26) nak zohkhenhtu vancungmi hna puaini nihin ni ah Khrihfa Bupi nih cathiang a kan timhpiakmi hna cu Exodus 23:20-23; Salm 139; Mt. 18:1-5, 10 hna hi an si.

Thawngṭhabia chungah, “cu caan ah cun a zultu hna kha Jesuh sinah khan an ra i, “Vancung Pennak ah ahodah a ngan bik?” tiah an hal. Jesuh nih ngakchiapate pakhat kha a auh i an hmaiah a dirter i, “Nannih cu nan i thlen i ngakchia bantukk ah nan i can lo ahcun Vancung Pennak chungah nan lut bal lai lo. Vancung Pennak chung i a ngan bik cu mi toiah aa dor i hi ngakchia bantuk ah aa cangmi cu a si. Cun ngakchia hi bantuk pakhatkha ka min in nan conglawmh hna ahcun, keimah nan ka conglawmh a si.” Hi ngakchia tete hi pakhat hmanh zawmhtaih hna hlah u. Annih a vengtu hna an vancungmi hna kha vancung khua ah ka Pa hmaikah ah an um zungzal ko”. Khrih Thawngṭhabia a si. 

Khrihfa Bupi tuanbia kan zoh tikah Jesuh Khrih nih a thim i, Jesuh Khrih nih Lamkaltu minung (12) nih minung pakhat cio nih tlangkhat cio kha Pathian an zumhnak kha, an zumhnak cu an phuan i, cu chungah a dot (9) nak a simi cu mithiang mi hna he pumkhat sinak, sual ngaihthiamnak, pum thawhṭhannak, zungzal nunnak ka zum ti kha dot (9) nak, (10), (11) nak le (12) nak ah kan hmuh khawh. Cu chungah vun char ka duhmi cu vancungmi hna he pumkhat sinak ti kha a si. Duhdawtmi u le nau, nu le pa hna Khrihfa Bupi nih a kan cawnpiaknak ah bu (3) kan um ti a si. A bukhatnak teinak a hmu cangmi hna bu, a buhnihnak sualman a liam liomi hna bu, a buthumnak ral a do liomi hna bu tiah buthum kan um tiah Khrihfa Bupi nih a kan cawnpiak. 

Asiahcun teinak a hmu cangmi bu cu ahodah a si  kan ti a si ahcun, vawlei taksa ngei bal loin thlarau lawngin Pathian nih a rak sermi hna, biana ah: Gabriel, Rafael, Michael ti bantuk le, cu  khawh cun vawlei cungah taksa in a rak um bal ko nain hi vawlei nunnak in a nunnak a dong cang i an thlarau cu zungzal nungcang hmunnak ah aa din cangmi pawl an si, a biana ah: Mithiang Paul, Mithiang Peter, nihin ni ah mithiang kan timi hna pawl hi an si i, cucu teinak bu chungah a um cangmi hna kha an si.

 A pahnihnak a simi sualman liam liomi bu cu ahodah an si kan ti si ahcun, a veel zaangfahnak chungah a nun a dong i thihpi tlak sualnak a ngei loin vancungram an thlarau a phan hnga dingmi an si i an taksa cu thi cang hna hmanh sehlaw vancung kainak dingah thianternak hmun ah a ummi thlarau hna kha sualman liamnak bu chung i a ummi cu an si. 

A pathumnak ah ral a do liomi bu cu ahodah a si kan ti ahcun, vawlei cungah taksa he, thlarau he a nungrihmi kanmah hna hi kan si. Cucaah cun teinak a hmu cangmi bu, sualman a liam liomi bu, ral a do liomi bu tiah Khrihfa Bupi nih fianghlang tein a kan cawnpiak. Cucu khoika dah kan hmuh khawh kan ti a si ahcun, (Filp. 2:10-11) ah kan hmuhmi cu, “Cucaah Jesuh min upatnak caah cun vancung i a ummi vialte nih si hna seh, vawlei i a ummi vialte nih si hna seh, vawlei tang i a ummi vialte nih si hnah an khuk an i bil lai i Pathian kan Pa sunparnak caah cun lei vialte nih Jesuh cu Bawipa a si, an ti lai” a ti. Vancung i a ummi, vawlei i a ummi, vawlei tang i a ummi tiah bible cathiang nih a langhter. 

Cucu buthum, teinak a hmu cangmi, ral a do liomi, sualman liamnak chung i a ummi hna kha a sawh duh khihnak a si. Asiahcun hi buthum hna hi pehtlaihnak kan ngei cio hna i, bukhat le bukhat kha kan i bawm hna. Teinak a hmu cangmi bu nih ral a do liomi bu a ka bawmh ti cu cathiang chungah fiang tein kan hmuh khawh. (Heb. 1:14) chungah, “Vancungmi cu ahodah an si kun? Vancungmi Pathian rian a ṭuantu thlarau, khamhnak a hmu hngami bawmh awkah Pathian nih a thlahmi kha an si” tiah a ti i, cu ahcun Vancungmi hna cu teinak a hmu cangmi hna an si i ral a do liomi kannih vawlei cung i a um liomi hi khamhnak a hmu hnga dingmi kan si caah, bawmh kan herh caah Bawipa nih kanmah bawmh dingah a thlah ti kha fiang tein cathiang nih a kan cawnpiak. 

Duhdawtmi u le nau, nu le pa hna nihin kan relmi thawngṭha chungah, “Vancung Pennak cu ngakchia bantuk ten nan si awk a si, nan thinlung nan i thlen awk a si” tiah a ti bangin ngakchia cu lunguam an hmang lo, chikkhat an ngaihchia, an thin a hung natein mi sualnak an i cinken peng ko, an thinlung a thiang, Bawipa duhmi thinlung a si. “Hi ngakchia pakhatte zong hi zawmtai hlah u. Amah zohkhenhtu dingah a Vancungmi cu ka Pa sinah a um” tiah a ti. Cucaah cun kannih vialte hi, amah a zum i khamhnak a hmu hnga dingmi kannih vialte hi zohkhenhtu Vancungmi kan ngei ti kha fiang tein kan Bawipa Jesuh Khrih zong nih a chim. 

Duhdawtmi u le nau, nu le pa hna Tobit bible kan zoh tikah cun Tobit cu Pathian sal ṭha, nunzia dawh, zumh awk tlak salṭha a si. Sihmanhsehlaw zatlaknak a ton tikah Bawipa sinah thla a cam tikah Pathian nih amah zohkhenhtu dingah Vancung Mithiang Rafael kha a thlah ti kha bible chungah fiang tein hmuh khawh a si. Tobit le a fapa Tobiah le a chungkhar hna cu Vancungmi Rafael nih a kilven, a zohkhenh hna i Tobit kha amit a cawt tikah a mit a damtertu zong Vancung Mithiang Rafael a si. Cucaah cun Tobit nih a ka damtertu hi Vancung Mithiang a si ti a hngalh hlan hmanh ah Bawipa cungah lawmhnak bia a chim i, (Tobit, 11:14) zawn ah, “Bawipa min lianngan cu thangṭhat si ko seh, amin cu a lianngan hringhran. Bawipa le a Vancungmi vialte hna zong thangṭhat si hna seh” tiah a ti. 

Cucaah cun kan biak kan Pathian thangṭhat lawng si loin Vancungmi vialte hna zong kha Tobit nih a thangṭhat hna ti kha duhdawtmi u le nau, nu le pa hna bible chungah fiang tein a kan chimh. Cucaah cun duhdawtmi u le nau, nu le pa hna asiahcun kanmah pumpak cio hi zei Vancungmi nih dah an kan zohkhenh tiah kan ti a si ahcun, Khrih kan zumh i Pa le Fapa le Thiang Thlarau min in tipil kan in tikah teinak a hmu cangmi, min a ngeitu Vancung i a um cangmi hna min kha kan i lak i, tipil kan in tikah cu min cu kan i sak. Tipil kan in tikah Mithiang Paul cu teinak a hmu cangmi mithiang bu chungah aa tel cangmi a si caah Paul min kan i sak. Tipil kan in tikah Paul min kan i sak a si ahcun, cu Mithiang Paul i a hleice kilven, zohkhenhnak kha kan tinco i kanmah zohkhenhtu Vancungmi a si ti kha kan hngalh hna a si. 

Sihmanhsehlaw Vancungmi vialte cu kan bia hna lo, kan thangṭhat hna, kan upatnak hna ti kha kan i theih awk a herh. Thumkomh Pathian kan biak, raithawinak kan pek, kan sunhlawih, kan upat, kan thangṭhat. Thangṭhat awk a tlakmi le biak awk aa tlami thumkomh Pathian cu kan biak. Sihmanhsehlaw Nu Maria le Vancungmi vialte hna cu kan bia hna lo, kan thangṭhat hna, kan upat hna kha a si. Cucaah cun nangmah an rak zohkhenhtu, ahleice in Pathian nih a chiahmi Vancungmi hna sinah lawmhnak bia a chim peng ding zong kha na rian nangpi a si ti kha na hngalhnak ding ca zong hika in theihter kan duh hna. 

Duhdawtmi u le nau, nu le pa hna Pathian cu khoka hmun hmanhah a um ti kha Salm caṭialtu nih a ti i, ‘Vancung ah kai ning law ka ti le nang na um, rili chungah kal ning law ka ti le nang na um, a kaa zakip ah nangmah cu nan um ko” tiah a ti. Asi Pathian cu khoika paoh ah a um ko natein kanmah zohkhenhtu ah Vancungmi Bawipa nih a kan chiahpiakmi hi Pathian nih a tlinh lo caah maw a chiah kan ti a si ahcun a si lo. Pathian i a thuam hna an si. Pathian min a tlintertu, a sunhlawihtertu, Pathian rian a ṭuantu kha an si. 

Vancungmi cu ahodah an si kun? Vancungmi cu Pathian rianṭuantu Thlarau khamhnak a hmu hnga dingmi bawmh awkah Bawipa nih a thlahmi hna kha an si, tiah a ti bangin teinak a hmu ciami bu chungah a ummi hna nih ral a do liomi khamhnak a hmu hnga dingmi vawlei cung mi vialte kha a kan zohkhenh, a kan kilven, thla a kan cam piak ti kha duhdawtmi u le nau nu le pa hna kan rak philh lo kha a biapit bantukin, kanmah a kan zohkhenhtu Vancungmi hna sinah lawmhnak bia a chim khomi rak si cio ve usih.

Thazaang petu /- Saya Canute Bawi Kam