Thil Hme si hmanhsehlaw Dawtnak Lungthin he rianṭuan ding a si

Nihin ni ah kan Bupi nih a kan timhpaikmi (Lk. 10:1-12), a saupah caah (Lk.10:2) chung ta lawng kan vun langhter lai. “Annih cu a thawh hna i, rawl ṭuan awk tampi cu a um ko nain a ṭuantu tlamte lawng an si. Cucaah rawl a ṭuantu dingah mi tam deuh a thlah hna nakhnga lo ngeitu sinah khan thla va cam tuah u”. Bawipa thawngṭhabia a si. Maw Bawi Khrih nangmah cungah thangṭhatnak um ko seh. 

Nihin kan nu Bupi nih Mithiang Theresa puai sunglawi ngaiin a kan tuahpiak ni a si. Mithiang Theresa hi (1873) kum, France ram, Lakon khua ah a chuakmi a si. A ngakchia tein Pathian rianṭuan a rak duh ngaimi a si i, sister can dingah hin phu pakhat hnu pakhat a hal lengmang hna i na ngakchia tuk rih tiah an thloh lengmangmi a si. Nain a lung dong loin Pathian rianṭuan duhnak kha a fak ngaingai caah Pope pa sinah nawlnak a va hal i Jesuit phu ah a lut i mithiang pakhat cannak ding tiangah hin Bawipa kan Pathian nih a hmanmi, a nunnak a hmangmi pakhat a rak si. Cun Mission hna a ṭuantu, Mission rian a ṭuantu hna thlacam piak dingah kan Bawipa Pathian nih, kan Bawipa Jesuh Khrih nih a rak hman ngaimi Mithiang Theresa pakhat a rak si. 

Cucaah nihin ah Mission rian a ṭuantu hna, thla a campiakmi hna, Diocese chung i a ummi Little Way Sisters hna siseh, hi mithiang min Theresa a lakmi nan dihlak cungah Happy Feastday tiah bia kan chawnh hna. Nan rianṭuannak ah Mithiang Theresa bawmhnak le thlacam piaknak thawngin hlawh a tlingmi nan si cio nak lai Bawipa thluachuahnak pumpak pakhat cio cungah um ko seh tiah thla kan cam piak hna. Nihin amah nih a tlaihtleng ah aa chiami cu zeidah a si tiah cun, “thil hme tete nan tuahmi kha dawtnak he ṭuan uh” timi a si. Nang le kei nifatin kan nunnak ah thil hme tete kan tuahmi kha, kan tuahmi paohpaoh vialte kha dawtnak he a ṭuanmi, a tuahmi nifa kan nunnak ah kan Bawipa Jesuh Khrih caah tiah zeizong vialte aa pekchanhmi i zuam usih ti kha hi a nunnak kong kan zoh tikah nang le kei kan i lak khawhmi a si. Khakha nang lei kei nifa kan nunnak ah hman khawh i zuam ve hna usih. 

Tutan kan nu Bupi nih a kan timhpiakmi thawngṭhabia chungah kan Bawipa Jesuh Khrih nih (72) hna kha a kalnak ding khua le hmun ah pahnih pahnih in a thlah hna tikah zeitindah kan hmuh ti a si ahcun, ‘ṭuan awk a tampi ko nain a ṭuantu tlawmte lawng an si e’ a ti. ‘Cucaah cun rawl a ṭuantu ding mi tamdeuh a thlah hna nakhnga lo ngeitu sinah khan thla va cam tuah uh’ a ti. Cucaah a tu in i thawh u law kal u, a ti. Nannih cu cenghngia lak i tuufa bantuk in kan thlah hna e, a ti. A thlah hna tikah phaisa siseh, keden siseh, zeihmanh zal siseh, i phawrh hlah uh’ a ti. Lampi zongah siseh bia chawnh awkah dircuanh hlah uh, a ti. Va kal cawlh u law Pathian thawngṭha kha va chim hna uh, a ti. Nan tlunnak hmasa inn ah khan innchung ah va lut u law, a ti. “Hi inn chungah daihnak um ko seh” tiah nan va chonh hna lai, a ti. Daihnak a duhmi hna sinah an sinah thluachuahnak a um lai i, a ti, a duh lomi hna i sinah cu nan bia chonhnak cu nan sinah a rak kir ṭhan lai e, a ti. Judah mi hna nih inn pakhat khat an kal tikah nan sinah daihnak um ko seh. Nan cungah daihnak um ko seh, tiah an i chonh tawnmi a si. 

Cuve bantukin kannih laimi zong Khrihfa mi hna zeitindah kan i chonh tiah cun na dam maw, tiah pakhat le pakhat kan i ton tikah, inn pakhat khat kan len tikah kan i chonhmi a si. Hi bia hi aa dawh ngaimi, a ṭha ngaimi pakhat a rak si. Dawtmi u le nau hna nan cungah daihnak um ko seh, hi inn cungah daihnak um seh, tiah Khrih dawtnak he bia aa chonmi kan sinak hnga i zuam hna usih. Biathlum bianem in Pathian bia, thluachuah bia he aa chon biak khawhmi kan sinak hnga i zuam usih. Khua pakhat hnu pakhat nan lut lai a ti, nannih an cohlangmi hna sinah nan va um lai, a ti. An cohlang duh lomi hna sinah khan a ti, nan ke i aa benhmi hna kha cu hna sinah nan thin hnawh hna lai, a ti. 

Dawtmi u le nau hna Pathian rianṭuan hi a har maw har lo? Pathian rianṭuantu ding hi bible cacaang kan zoh tikah kan herh ngaingai. Zeiruangah dah! A thawngṭhabia chimtu dingah, a pennak kauhtertu dingah, amah rianthiang ṭuan dingah hin a thlah dingmi hi tamdeuh chinchin in a thlah hna nakhnga Pathian sinah, lo ngeitu sinah thla va cam u law a ti. Khrihfa mi hna zong nih Pathian rianṭuantu ding tamdeuh an thlah, an umnak hnga, thla a si nakhnga fakpi in thla kan cam ding a si. 

Nihin Catholic Bupi zong nih Pathian auhnak hmuh awkah thlacamnak ti kha punghmaan tein kan cam pengmi zong a si bantuk tein nifa kan nunnak ah kha thlacamnak zong heh tiah pehzulh in cam khawh i zuam usih law kan Bawipa a pennak, a thawngṭhabia a kauh chinchin nakhnga caah, a thlahtu zong a tam deuh chinchin nakhnga heh tiah Khrifami hna zong nih cam i zuam cio usih. Rawl ṭuan awk a tampi ko nain a ṭuantu tlawmte lawng an si, a ti. 

Dawtmi u le nau hna kan Bawipa Jesuh Khrih a rianthiang ṭuan dingah hin naimanh ve cang maw? Ready na si ve cang maw? Kan Bawipa Jesuh Khrih nih nangmah thengte kha hman an duh, nangmah thengte na nunnak hmangin amah a pennak ram kauhter dingah Bawipa kan biakmi kan Pathian nih hmang an duh hna, i ready cang hna usih. A pennak, a thawngṭhabia chim dingah, a dawtnak kong a thawngṭhabia chim dingah phuan dingah hin nang le kei kan nunnak dihlak in hi Mithiang Theresa bantuk tein i hman khawh i zuam. Ka notuk ti hlah, ka tartuk cang ti hlah, Bawipa nih nangmah na nunnak te kha hmangin a pennak ram kauhter dingah an duh hna. 

“Rawl ṭuan awk a tampi ko nain a ṭuantu tlawte lawng an si, i manh ve cang usih, ti kha sawm kan duh hna.     

Thazaang petu /- Saya William