A thimi zumhnak si loin a nungmi zumhnak tu siseh
Nihin thawngṭhabia (Lk. 8:4-15) tiang, “Mipa pakhat cu thlaici vorh awkah aa thawh. Lo chung i thlaici a vorh tikah cun a cheu cu lam hril ah an tla i mi nih an lamh hna i vate an char hna. A cheu cu lung lakah an tlak, an hung keuh tikah vawlei a hnawm lo caah an car dih. Thlaici a cheu cu hling lakah an tla, hling he cun an kho ṭi i hling nih cun a thah hna. Cun thlaici a cheu cu vawlei ṭha ah an tla; an hung ṭhang i theifang le za khat cio an vui,” tiah a ti.
Thawngṭhabia chungin tlangtar ka duhmi, “A thimi zumhnak si loin a nungmi zumhnak tu siseh” timi in thazaang laa hna usih. Zeibantuk thil kan ton hmanh ah kan zumhnak hnga lo Pathian kha i bochan ko hna usih. Kan zumhnak hi minung ṭhawnnak le minung hmur le kaa ah hram a bunhmi si loin a nungmi Pathian bia tu ah hram a bunhmi si seh.
Zeibantuk harnak a ton hmanh ah na zumhmi na Pathian cu kaltak hlah. Na zumhnak cu hlaw hlah. Nihin aa thleng lengmang mi vawlei ah minung fimnak, minung thiamnak cu a ṭhangcho; cu bantukin ruahnak ṭhalo zong a ṭhangcho ve. Biatak kha talo leiah, a raangmi kha a nak leiah thlen le cawnpiak chan a si. A thleng lengmangmi kan chan ah hin nihin, thaizing, a zungzal aa thleng bal lomi cu kan Pathian lawng a si. Pathian dawtnak cu aa thleng bal lo.
A bia zong zeitik hmanh ah aa thleng bal lai lo. Pathian bia cu a dihlak in mi vialte nih kan zulh dingmi a si. Vawlei rumnak, vawlei fimthiamnak nih kan zumhnak a hrawk nakhnga lo Bawipa kha bochan ko usih. Vawlei nih a chuahpimi harnak, lungre theihnak, rawlṭam tihalnak nih kan zumhnak hrawk hlah seh.
Hawikom pahnih khualtlawnnak ah lam an tlau i ti le rawl loin nilinak ah khua pakhat an phan. Cu khua cu Muslim khua a si. A hawipa nih, “ka kawi; Khrihfa kan si kan ti lai lo. Zeicahtiah ti rawl a kan pe duh lai lo” a ti. “Kannih cu Khrihfa kan si, ti rawl a kan peknak hnga Muslim kan si kan ti lai” a ti. A hawipa nih cun, “Voikhat rawl ei ruangah ka zumhnak cu ka hlaw lai lo, ka zumhnak cu tirawl ah thlen ding ka siang lo” a ti. Muslim biakinn ah an vung lut i a hawipa nih, “kei cu Muslim ka si” a ti. “Aww…ṭha ṭha” an ti. A dang tein ṭhutnak an pek. “Kei cu Khrihfa ka si” a ti. “Hi Khrihfa pa hi rawl rak pe uh” tiah a ti. Rawl an pek i khim tein a ei. Muslim pa cu, “Atu hi kannih biaknak cu ulh caan a si” an ti.
(Rom. 8:35-39) ah Mithiang Paul nih, “Khrih dawtnak he zei nih dah a kan ṭhen khawh lai, harnak nih maw, rawlṭam tihalnak nih maw, thihnak nih maw, a kan ṭhen khotu ding thil zeihmanh a um” tiah a ti. Lam hril ah a tlami thlaici cu mi nih an lam hi vate nih an char dih. Lung lakah a tlami thlaici cu vawlei a hnawn lo caah an car dih. Hling lakah a tlami thlaici cu hling nih a thah dih. Vawlei ṭhatnak ah a tlaimi thlaici cu a let za khat cio an vui.
Kan tonmi harsatnak ruangah kan zumhnak kha a rawk nakhnga lo Bawipa kha i bochan ko usih. Vawlei ṭhanak ah a tlami thlaici cu a let za khat a vui bantukin zumhnak thei tampi tlai usih. Dawtnak thei tampi tlai usih.
Thazaang petu /- Saya Francis Khua Pheng