UN zung he pehtlai in thil sining cuantu (Permanent Observer) Thar: Huatnak biachim cu zalong tein chimrelnak asi lo
New York um United Nations ah Vatican zung ai-awh in UN sining umtu a cuantu ding ah a thar in rianpekmi Archbishop Christophe Z. El Kassis nih, UN zung ah a voikhatnak bia a chimmi cu, huatnak biachim ngol a herh tiah a ti. Zeicahtiah mipi caah siivai ṭha lo asi pin ah ṭhencheunak a chuahter i a caan ahcun thahnawnnak le hremnak tiang a chuahtertu hmunhma ah a cang. UN he pehtlai in Vatican ai-awh in ( Permanent Observer) thar Archbishop Christophe Z. El Kassis nih September 16 ah UN Secretary-General António Guterres sinah rian pek asinak kong thawngthanhnak ca a pek. Cu hnu nikhat, September 17 ah, Archbishop El Kassis cu New York um UN zung ah , huatnak bia chimlo ding ah le biaknak le nunphung karlak biaruahnak le pakhat le pakhat i theihthiamnak ṭhanchoter awk ah vawleicung pumpi tonnak ah a voikhatnak biachimnak a ngei.
Archbishop El Kassis nih UN Chairman lei hoih in, “minung cu Pathian muisam keng in sermi kan si i, zeibantuk huatnak le ruahnak ṭhalo hmanh nih minung sinak kha cuhkalh le chuh khawh asi lo i cu minung limhang cu a zorter kho lo,” tiah Vatican dirhmun kha fiang tein a chim ṭhan. Hi ruang ah miphun caah harnak a petu le daihnak he umṭi, khuasakṭi khawhnak caah ṭihnung le hrawktu asi mi thleidannak le huatnak bia phunkip kha hlawt ding le hrial ding ah nunphung le ziaza zulphung a chuahnak asi tiah chim chap. Minung pumpak cung ah siseh, mibu le miphun cung ah siseh, asiloah, biaknak le zatlang nunphung cung ah siseh, zeibantuk huatnak bia hmanh chim awk asi lo i cu huatnak bia chim asi tikah, “na innpa kha na dawt lai” ti mi nawlbia he aa kalh, aa ralchan. Cu lawng si loin huatnak bia nih mizapi caah siivai ṭhalo asi ter i ṭhencheunak, rawhralnak le a caancaan ahcun i thahnawnnak le hremnak tiang a phanhter tiah a chim.
Archbishop El Kassis nih Pope Leo XIV nih a chuahmi “Magnifica Humanitas” cauk chung ta kha chirhchan in, “rualremnak le daihnak, ṭhanchonak he a khatmi minung pawngkam le khua le ram ser khawhnak ding ah ahmasabik a kan bawmchantu le kan tuah awk asi mi cu bia ṭhalo chim hrial hi asi i bia kan chim tik ah i ralrin awk a herh. Biafang nih ṭhawnnak nganpi a ngei. Zatlang nunphung ṭhanchoternak ah siseh, daihnak caah biaruahnak, nunphung le biaknak aa khat lo mi pakhat le pakhat i theihthiamnak le i upatnak hna kan tuahser tik ah kan hmanmi biafang hi karhlangtu an si tiah a ti. Sihmanhsehlaw, daihnak ser ding ah bia lawngin a za lo i a dik a hmaanmi intuarnak/ i in chihnak (tolerance) cu zeirel lonak asiloah thil dik hmaan tiah a zungzal i ti khawh asi lo ti ruahnak (relativism) he aa khat lo. Cu nakin, minung pakhat cio i sining limhang (dignity), an chiaṭha thleidannak le an zalonnak kha upatnak he cohlan piak hi asi deuh. Rualremnak caah biaruah ceihmainak, pakhat le pakhat i theihthiamnak le thleidannak um loin lungsaunak ngeih awk a biapi tiah a ti. Biaknak le nunphung thlei dannak vialte kha hlawt in mi vialte caah a ṭha deuhmi le um a nuammi vawlei ser khawhnak ṭhanter awk ah Archbishop El Kassis nih Vatican i lungput le dirhmun langhternak a tuah.