Pope: 9/11 ah a cangmi ngaihchiatnak philh lonak nih daihnak caah rianṭuan dingin a kan fial

11 September 2001 lio ah United State ah a ummi World Trade Centre cu ralhrang tukdohnak a tuar i nunnak a liammi tampi an rak um. Cu nunnak a liammi hna an thlarau caah le an chungkhar hna caah Pope Leo XIV nih thla a cam piak hna i ral nih a thlehbaoh dihmi kan vawlei nih daihnak  a hmuhnak hnga thlacam dingin forhfialnak a tuah. 11 September 2026 ah cu World Trade Centre tukdohnak a tuarnak kum 25 a tlinnak ni ah, Pope nih Angelus thlacamnak ah Miraang holh in mipi hna sin ah bia a cah hna.

9/11/2001 he pehtlai in ralhrang nih timh ciammam tein tukdohnak an rak tuah ruang ah New York, Washington, D.C., le Pennsylvania ah minung 3,000 hrawng an thih pin ah cu tukdohnak he aa pehtlaimi zawtnak in za leng an nunnak a liam a cang. Buainak le thahnawnnak nih kan unau tampi harnak a pek lio caan ahhin Bawipa nih kan vawlei ah a daihnak vel laksawng a kan peknak hnga thlacam hna usih tiah mipi sin ah sawmnak le forhfialnak a tuah. A luancia mi kum 25 lio ah kan tonmi ṭihnung ral nih diahnak caah kan biakam tharchuah ṭhan awk ah le daihnak rianṭuan awk ah a kan forhfial i cuti in kan ṭuan khawhnak hnga a thiangmi Bawinu Mary sin ah ka pekchanh, tiah Italy holh in Pope nih mipi sin ah thazaang a pek hna.