Caan tawite kan nun chungah kan nunnak hi dawtnak rianṭuannak caah hmang usih
September (05) caah kan Nu Bupi nih a kan pekmi Pathian biathiang hna cu (1Kor. 4:6-15; Lk. 6:1-5) tiang hna hi an si.
“Voikhat cu Sabbath ni ah hin Jesuh cu khual a tlawng i changvut lo kha a palpah hna. A zultu hna nih khan changvut vui cu an sihpah hna i an kut in an hnuai hna i a fang kha an ei hna. Farasi mi a cheukhat nih an i thawh i, “Zeicahdah kan Phung nih Sabbath ni ah nan tuah kho lo a timi nan tuah?” an ti. Jesuh nih cun a leh hna i, “David le a hawile kha an rawl a ṭam tikah zeidah David nih a tuah; ti kha nan rel bal lo maw? Pathian inn chungah pei a lut i Pathian hunhmi changreu kha a lak i a ei a hawile zong a pek hna kha. Khati a tuahmi kha kan Phung ha aa ralchanhmi a si ṭuang, zeicahtiah cu changreu cu tlangbawi lawnglawng nih pei ei phung a si kha,” tiah a ti hlei ah, “Mi Fapa hi Sabbath Bawip pei a si cu,” tiah a ti hna.
Voikhatnak kan relmi le thawngṭhabia chungin hrawm ṭi ka duhmi hna cu “caan tawite kan nun chungah kan nunnak hi dawtnak rianṭuannak caah hmang usih” timi in thazaang la hna usih.
Nihin September (05) ni cu Mithiang Theresa puaini a si. Mithiang Theresa cu Skopje, Ottman khua ah (1910) kum ah a chuakmi a si. (1928) kum ah Lorreto Sister’s Sianginn a lut. (1948) kum, September (10) tiang kum (20) renglo tiang India ah Sianginn sayagyi rian a rak ṭuan. Darjeeling khua lei a kal lioah Bawipa auhnak a theih. A theihmi cu, “misifak hna he hmunkhat ah sifah in ve ka duh” timi a si. Mithiang Theresa cu misifak pawl sin a kal i, misifak pawl kha a zohkhenh hna, hma a ngeimi vialte kha a ṭawl piak hna, ei awk a ngei lomi hna kha ti le rawl a pek hna, hni le puan a ngei lomi hna kha hni le puan a pek hna. Zohkhenhtu a ngei lomi hna zong kha a zohkhenh hna, a thi dengmang mi pitar putar hna zong kha a zohkhenh hna, TB zawtnak a ngeimi le thinghmui zawtnak a ngeimi vialte hna zong kha a zohkhenh hna. Mithiang Theresa a rianṭuannak cu India rampi a cul dih.
India a cozah nih (1979) kum ah remdaihnak Nobel prize an pek. Media pawl nih biahalnak an tuah, “Daihnak remnak caah zeidah kan tuah lai?” an ti. Mithiang Theresa nih, “Nan innchungkhar cio ah dawtnak va ser uh, daihnak le remlonak cu innchungkhar in hram a thawk lai” a ti. A pahnihnak ah, “lam hlapi ah Pathian cu va kawl hlah u, lam hlatpi ah Pathian cu a um lo nan pawngte ah a um ko” a ti hna.
Mithiang Theresa cu caan tawite a nun chung a caan vialte cu dawtnak, zaangfahnak rianṭuannak ah a hman dih hnu ah (1997) kum, September (05) hi a thihni a si. Mithiang Theresa rovuih bia, “Keimah he dawtnak rianṭuan ṭi hna usih”. Nihin voikhatnak kan relmi Mithang Paul nih, “kannih cu Khrih ruangah mihrut kan si, nanih cu mifim nan si. Chiat a kan serh tikah thluachuah tu kan pek hna. Kannih cu kut hnawm hnawhnak puanchia kan si. Kan nunnak cu zapi ṭhatnak caah kan hman dih.”
Nihin thawngṭhabia nih a kan chimhmi cu, Dawtnak lungthin, zaangfahnak lungthin siter a kan duh. Sualnak chungah a ummi si peng loin nunnak thar ah a nungmi siter a kan duh. Pathian nih a kan dawt, a kan zaangfah bantukin kannih vialte zong nih kan u kan nau hna cu kan dawt awk a si. Zaangfahnak kan ngeih awk a si.
Nawlbia lakah a sangbik mi nawlbia cu dawtnak a si. Dawtnak rianṭuannak cu a biapi cemmi a si, timi cu nihin kan Bawipa Jesuh Khrih nih hin thawngṭhabia chungah a langhter. “Sabbath cu minung caah sermi a si, minung cu Sabbath caah sermi a si lo. Mi Fapa cu Sabbath bawi a si.” Kan nunnak caan tawite chungah hin kan nunnak hi Mithiang Theresa he hmunkhat in rianṭuannak ah hmang hna usih.
Thazaang petu /- Saya Francis Khua Pheng