Na thinphang hlah, atu thawkin mi na tlai cang hna lai

Nihin kan nu Bupi nih a kan timhpiakmi (Lk. 5:10) chungin, “Na thinphang hlah, atu thawk in mi na tlai cang hna lai,” tiah a ti. “Na thinphang hlah, atu thawkin mi na tlai cang hna lai,” timi tlangtar in tawite ruah ṭi kan duh hna. 

Nihin kan nu Bupi nih Pope Gregory the Great puai a kan tuah piakmi ni a si.  Amah hi AD (504), Rome ram mirum chungkhar in a chuakmi a si i, mirum chungkhar hna nih an tuah tawnmi rian vialte kha tlamtling tein a zulh, a ṭuanmi le a donghnak leiah Rome khualipi Prefect pakhat a rak si i, cu rian cu kum zeimawzat a rak ṭuan hnu ah tlangbawi cannak ah a lutmi a si i, Tlangbawi cannak a hmuh hnuah Constantinople ah lamkaltu ah thlah a si i kum (5) chung cuka ahcun rian a rak ṭuan. September (03) ni, AD (590) kum ah hin tlangbawi cannak in Pope cannak tiangah thimnak a hmu hmasa bikmi pakhat a rak si. 

Mithang ngaimi pakhat a si i, amah a chan ah thongtlami cun sifah harsatnak a tongmi tampi an um, kha vialte hna kha Bupi phaisa in a bawmhchanh hna i a petu a si. A thilri vialte, a ngeihmi chaw le va vialte a kaltak i Bawipa caah rian pumpek in a ṭuanmi pakhat a si i Bupi chung zongah biaknak kan hman bikmi Gregorian Chant timi hla zong ṭha taktak in a tuahmi, a phuahmi pakhat a rak si. A ngeihmi thil vialte kaltak in Bupi caah rian a ṭuan tikah amah le amah kha, “Servant of the servants of God”, “Pathian sal hna lakah Pathian sal” tiah a rak i ti. Cun a chimmi cu, “dawtnak he pekmi cu minung nunnak a khamh hleiah a petu thlarau nunnak zong kha a thianter” tiah a ti. 

Dawtnak kan timi cu kan timi cu kaa in chim lawng a za lo, tuahsernak in a langh ding a si, tiah amah nih a rak tuahmi kha nihin ah a chimmi bia in kan hmuh khawhmi a si. A nunnak ah a chimmi bia te hi nang le kei kan nunnak ah i cawn cio hna usih.

Cun nihin Luke thawngṭhabia chungah zeidah kan hmuh ti a si ahcun, “Genesaret timi tikam ah kan Bawipa Jesuh cu a rak phan i cuka ahcun mizapi hna nih a bia theih awkah an rak fuh, an rak buk hnawh” tiah a ti. Cuticun an rak buk hnawh lioah cun rili kam ahcun ngatlaitu hna an sur an rak su len kha a hmuh hna. Lawng pahnih a hmuh i, kan Baiwpa Jesuh Khrih cu Simon Peter lawng ahcun a lut i tikam cun tlawm tein a va thawn i cuka hmun cun mizapi kha a cawnpiak hna” tiah a ti. Kan Bawipa Jesuh Khrih Simon lawng chungah a lut ti kha kan hmuh. 

Simon nih a lawngmi a lawng kha kan Bawipa Jesuh Khrih a hmanter caah, cawnpiaknak caah a hmanter caah zeidah a cang! Nihin kan Bawipa Jesuh nih Simon Peter kha a thawh i, “Ti thuhnak leiah khin na lawng hi hei thawn deuh law nangmah le na hawilei nih khan nan sur khan nga kha chep hna u,” tiah a ti. “Ti thuhnak leiah nan lawng kha hei thawn deuh hna uh” a ti. 

Nang le kei nifa kan nunnak ah Peter le a hawile hna bantuk tein kan i zuam ko nain thlawhtlinnak kan hmuh lo caan, lung donghnak caan, lung rawhnak caan kan ton caan tampi ko lai. Asinain lung dong lo tein kan Bawipa Jesuh nih zeidah a kan chimh ti kha ngai ko usih law, a kan chimhmi bia bantuk te khan nihin kan tuah kan ṭuan a si ko ahcun hlawhtlinnak thluachuah kan hmu hrimhrim lai ti kha thazaang pek kan duh hna. 

Simon nih aa thawh i, “Bawipa zan khuadei kan vorh ṭualmal ko nain zeihmanh kan tlai lo. Sihmanhsehlaw ti ko u, na ti ahcun sur cu kan cheh rih ko lai,” tiah a ti. Ngatlaih in paw aa cawmmi an si, khoika dah nga a um lai ti a theitu an si ko nain kan Bawipa Jesuh Khrih a bia kha an nunnak ah a sang cem ah an chiah tikah, nawl ngai in a um tikah a hawile he sur cu an cheh tikah nga tampi an tlai ti kha kan hmuh khawhmi a si. 

An khuaruah a har, cu thil kha Simon Peter nih a hmuh tikah kan Bawipa Jesuh Khrih hmaiah cun a khuk aa bi li, “Bawipa, ka kaltak ko, kei cu misual ka si,” tiah a ti. Kha vialte kha kan Baiwpa Jesuh Khrih nih Peter a sualnak le a tlamtlin lonak kha zoh piak loin a thinphannak vialte tu kha a hloh piak i, “Fisher of Man”, Ti chung nga kha tlaih in a thihter tawnmi si ti loin vawlei cung sualnak rili chung a pilmi minung hna khamhnak ding caah Pathian Pennak chung luhter ding ah nihin ah a mission rian kha a pekmi kan hmuh khawhmi a si. 

Kannih zong mi tlai dingah kawh auh kan si ve. Kei cu a sualmi, bible a rel thiam lomi, zeihmanh a chim thiam lomi, tiin a rianṭuan awkah na ṭih sual maw. Nihin ah kan Bawipa Jesuh Khrih nih, “ṭih hlah, na thin phang hlah” a kan ti ve. 

Kan Bawipa Jesuh Khrih kha na nunnak tilawng chungah sawm ko, na rianṭuannak, na innchungkhar, hmailei na nunnak caah a kut chungah i ap dih ko. Kan i ap dih a si ko ahcun, kan i pek dih a si ko ahcun khuaruahharnak thluachuah kan hmuh hrimhrim ko lai.

Khrih ah dawtmi u le nau hna kan chungkhar, kan pawngkam le kan rianṭuannak ah Pathian dawtnak le zaangfahnak, khuaruahhar a ṭhawnnak vialte tehte kan khaannak thawngin lung a rawkmi hna, lung a dongmi hna Peter le a hawile hna bantuk tein kan nunnak, an nunnak ah lung dong in a ummi hna Pathian sinah a phanhpi khomi, mi a tlai khomi si i zuam ko hna usih.

 “Lawng cu tikam ah an hnuh i zeizong vialte kha an kaltak i, Bawi Jesuh kha an zulh” tiah a ti. Kannih zong thinphan thlalaunak vialte, kanmah ca lawng ti kan i ruahnak vialte, kha vialte kha kaltak ve in Bawipa Jesuh auhnak kha, “Amen” tiah toidornak le nawlngaihnak he a cohlang i a zultu fanu fapa ṭha kan si khawhnak dingah Pathian nih a thar in thluachuah kan pe hram ko seh. 

Thazaang petu /- Saya William