Ramkhel rian Chiahtak in Catholic Tlangbawi a hung cang mi Fr. Thomas Idergard
Photo Credit to the original owner
Sweden ramkhel lei ah mifim bikmi pakhat a si tiah rak ruahmi, Father Thomas Idergard cu ramchung rian sangbik rainṭuan tu dingah rak tinh-ruah piak mi pakhat a rak si. Kum 26 lawng a si lio ah, ram pumpi huap in Moderate Youth League ah chairman a rak ṭuan. Chairman a ṭuan hnu ah amah hlan chairman a rak ṭuanmi pahnih zong kha prime minister rian tiang an ṭuan hna. Amah zong nikhat prime minister rian a ṭuan ve te lai tiah mipi nih rak ruahchan ngai mi zong a rak si. Sihmanhsehlaw, ramkhel lei in rian ṭha, rian sang kha chiahtak in thilṭha deuh le rian sang deuh tiah a tuahmi rain thiang kawl hram a rak thawk.
Photo Credit to the original owner
1969 ah Sweden chaklei um Arvidsjaur khua um Pentecostal nulepa hna in a rak chuakmi Idergard cu a ngakchiat lio tein Khrihfa zumhnak he a rak ṭhang mi a si. Ngakchia te a si lio ah Khrihfa biaknak nih a lung a rak lak ngai tawn. Lutheran pastor dirhmun in catholic zumhnak a pom ṭhan i a hnu ah Catholic tlangbawi a cang mi a pa te (uncle) nih Missa a tuah tawn mi a hmuh tikah, ngakchia pa Idergard cu an inn ah amah tein “tlangbawi ṭuan-Missa tuahnak” in lente ai celh tawn mi a rak si. St. John Paul II a upatnak ruangah siseh, Vatican in Missa an tuahnak a zoh tawnmi nih Catholic zumhnak lei ah a thinlung a rak hnuh ngaingai.
Ramkhel rianṭuannak nih huham ngeihnak lei in siseh, theihhngalhnak le chawlehnak thalnak le thawngzamhnak lei in hlawhtlinnak a rak hmu ngai mi a si ko nain, a lungthin chung taktak in a duh bikmi kha a rak diriamh ter kho lo. Pumpak fahnak le harsatnak a ton hnu ah, thlacamnak lei ah a hung kir ṭhan i a tling mi Khrihfa zumhnak kha kawl hram a rak thawk. Catholic Khrihfa Pathian biacawnnak (Catechism of the Catholic Church) kha a relnak hnu ah a nun lam thlenhram a rak thawk.
Photo credit to the original owner
Catholic zumtu pakhat a si hnu ah, Idergard nih tlangbawi sinak lei ah ruahlopi in auhnak a hmu i Jesuit tlawngbawi phu hna he kum caan saupi timhnak a ngeih hnu ah, 2012 Jesuit tlangbawi phu ah a lut i 2017 ah tlangbawi ordination pek a rak si.
Nihin ah, Father Idergard cu Stockholm Diocese ah Biaceihnak le Daihnak Commission zungah chairman rian a ṭuan cuah mah lio mi a si. Hlaan a nunning he pehtlai in, ‘ramkhel rian ka kaltakmi kongah ngaihchihnak ka ngei lo’ tiah a ti. Zalonnak taktak timi cu minthannak, huham ngeihnak le hlawhtlinnak ah hmuh khawh a si lo, Pathian nih kanmah pakhat cio caah a kan timhpiakmi minung sinak (nunnak) lawngah hmuh khawh a si ti kha a theih tu a si.
Khrih sin in kan hmuh mi nunnak, zalonnak le daihnak cu vawlei thil ti khawhnak le hlawhtlinnak nih a cuh kho lo timi theihfiannak cu Fr. Thomas Idergard nunnak in nih fiang tein a langhter khawh.
Source: National Catholic Register