Ahodah Na Innpa a si?

Bible relding mi hna: Phungthlukbia 21:1-6,10-13; Luke 8:19-21

Nihin ah kan thlarau caah cheuhbauh kan duhmi hna cu (Pht. 21:13 Lk. 8:21) chungin khan kan lakmi a si lai. 

Cu chungah cun zeidah a um ti a si ahcun, Phungtlukbia chungah cun misifak mi hna i an aunak aw kha a hna aa phih kanh lomi hna cu anmah thla an cam tikah le an au tikah khan theihpiak an si lai: ti a si. Midang in vun chim a si ahcun, hi misifak hna an aunak kha a hna aa phih kanhmi, a theih huam lomi hna cu anmah pumpak an au tikah le thla a cam tikah khan theih piak an si lai lo, timi kha fiang tein kan theih. 

Cun (Lk. 8:21) chungah Jesuh nih a timi cu, “Ka nu le ka unau hna cu ahodah an si tiah cun Pathian bia kha a thei i, an theih ning tein aa nunpimi cu ka u ka nau taktak kha an si” tiah khan a ti. Cucaah dawtmi u le nau hna vawlei cungah hin Judah mi hna zong kha cu phun, kha phun tiah khan a ti i, cu u le nau tampi a ngeimi le chungkhar rualchan a ṭhawng ngaimi, bochan tlakmi a ngeimi hna tampi an um hna. Khakha kannih cu kan i za. Lawki kan nun chungah; bochan awk u le nau tampi kan ngei tiin Pathian i bochan kha an ngei lo. 

Sihmanhsehlaw Bawi Jesuh nih Vawlei phung in khan bochan awk tlakmi, bochan awk a ngeimi u le nau tampi ngeih nakin khan vawlei cungah hin bochan awk tlakmi u le nau kan ngeih lo zongah hi Jesuh Khrih zumhnak leiah unau ṭha kan ngeih a si ahcun mi vanṭha deuh kan si timi hi nihin ah kan Bawipa Jesuh Khrih nih khan a kan chimh duhnak kha a si. 

Cucaah dawtmi u le nau hna vawlei cungah hin Pathian bia ngai loin le Pathian bia thei duh loin khan Vawlei cung i u le nau, hawikom ṭhaṭha bochan awk tlakmi kha tampi an ngeih ko zongah khan khakha kannih nih hngar ding a si lo i, hi vawlei cungah zumhnak leiah, Pathian ah unau tampi a ngeimi tu kha kan si khawh nakhnga le Jesuh Khrih amah pumpak hi kan unau taktak a si khawh nakhnga caah khan kan i zuam hna lai. 

Dawtmi u le nau hna nihin ah phungtlukbia kan theih bantukin khan, “Misifak hna i an aunak aw kha a hna aa phih kanhmi cu anmah zong an duh herh tikah, thla an cam tikah khan an aw kha theihpiak an si lai lo” tiah a ti bantukin khan kannih vialte nih hi vawlei kan nun chungah hin misifak kan si zong ah khan, mirum kan si zongah, u le nau tampi a ngeimi kan si zongah,  u le nau tlawmte lawng a ngeimi kan si zongah khan kan pawngkam ah bawmh a herhmi taktak kha an um maw, timi kha kannih nih kawl in Bawipa Pathian nih a kan fial ning tein, “Nan innpa kha nangmah naa dawt bantuk tein na dawt ve lai” tiah a kan timi Pathian a nawlbia ngan taktak mi kha kannih nih kan i tlaih i Pathian nih a kan fial bantuk tein khan kan tuah le kan ṭuan a si ahcun hi vawlei cungah hin nang le kei zong u le nau tampi kha kan ngei lai timi kha ruah ding kha a si. 

Dawtmi u le nau hna hi vawlei cungah hin kannih nih a caan caan cu vawlei cung u le nau kha kan herh theng lo nain khan Pa Pathian nih kan thlacamnak a kan ngaih piak paoh ah cun a za ko; tiah kan kan ti men hnga. Sihmanhsehlaw hi vawlei cungah kan pawngkam, kan unau hna an harnak, an chamhbaunak kha kan zoh piak lo i kan sinin khan bawmh halnak an tuahmi kha ṭha tein khan kan zoh piak, kan ngaih piak i zeidah kan bawmh khawh lai; timi kha kan ruah lo a si ahcun ni nikhat khat cu nang le kei thla kan cam tikah zeizong vialte tuah khotu Pathian, hi vawlei cungah kan u kan nau hna nih an tuah khawh lomi thil kha Pathian sinin khan kan hal tikah Pathian nih a pe duh lai maw, pe duh lo’ timi kha kannih nih ruat in khan hi vawlei cung kan nunchung ah hin kan pawngkam i kan unau hna i aunak aw, thlacamnak aw kha a theitu le bawmh halnak an tuahmi kha bawmh dingah timhpiak tein khan a um khomi kan si khawhnak hnga kha i zuam usih law cuticun kanmah zong nikhat khat cu kan herhbau tikah khan bawmtu kha kan ngei lai. 

Hi vawlei cungah minung nih an kan bawmh khawh lo hmanh ah Pathian kha kanmah bawmtu ah khan a um lai; timi kha ruat usih law khi kan bawmh tikah khan Bawipa Jesuh Khrih a bia kha kuttawngh in khan aa nunpi mi kan si tikah Bawipa Jesuh i a unau taktak kha kan si lai i  kha tikah khan Bawipa Jesuh i a unau taktak kan si ahcun amah nih kan aunak aw kha fawi tein a kan theih piak lai i kan herhbaunak kha a lam a kan pek lai i ni hmanungbik zong ah khan zungzal nunnak co awk dingah khan lam a kan hruai lai timi kha ruat usih law reflection ca’h i kan lakmi cathiang hi kan thinlung chungah i cinken in khan nifatin kan nunnak ah khan Bawipa Jesuh Khrih a bia kha aa nunpi mi si kha i zuam usih law cucun Bawipa Jesuh a unau kha kan si lai. 

Sihmanhsehlaw kannih nih kan kaa cun, “Bawipa, Bawipa” tiah kan thangṭhat ko nain khan kannih nih a kan fialmi kha zeidah a si? timi kha kan theih lo le mithmuh kuttawngh in kan tuah lo a si ahcun le kan i nunpi lo ahcun hi vawlei cung i kan aunak aw le kan thangṭhatnak sawhsawh in cun Jesuh Khrih unau taktak ah khan kan cang kho lai lo i kannih bawmh kan herh tikah khan bawmtu kha Jesuh Khrih nih a kan thlahpiak lai lo, timi reflection in khan zungzal nunnak thlarau caah khan hrawmh kan duh hna.   

Thazaang petu /- Fr. Abraham Hrang Hit