Na Thinphang Hlah, Keimah ka Si

Nihin thawngṭhabia chungah zultu hna lawng cung an um lio ah Jesuh an si a ra tiah a ti. Zultu hna nih an hmuh tikah an lau tuk i mithla a si tiah an ruah. Cu tikah Jesuh nih ‘Ṭih hlah u, Keimah ka si’ tiah a ti hna. Culio ah Peter nih Bawipa na si taktak ahcun na sinah rat nak nawl ka pe tiah a ti. Jesuh nih a leh mi cu ‘Ra’ tiah a ti. 

Dawt mi u le nau hna nihin kan nunnak ah nang le kei zong Bawipa na sinah rat ka duh, rat nak nawl ka pe ko tiah kan ti khawh ve mi a si. Bawipa nih cun Peter kha “Ra ko” tiah a ti bantuk in an sin rat ding ah nawl a kan pek cio ko. Peter cu Bawipa sinah a kal taktak. Sihmahsehlaw rili ti a cawl a hmuh tikah a thin a phang i ti chungah a pil tiah a ti. Bawipa sin kal cu kan duh cio ko nain harsatnak tete kan ton tikah thlalau in kan um ve maw. Cutin kan um a si ahcun Peter bangin ti chung, harnak chungah kan tla ko lai. 

Peter nih cun “Bawipa ka khamh ko” tiin bawmhnak a hal tikah Bawipa nih a kut a samh i a bawmh timi kha kan hmuh. Harsat thinphang thlalau in na um lio ah Bawipa sinah bawmhnak na hal ve maw? Na hal a si ahcun Bawipa nih an bawmh taktak ko lai. 

Peter ti chung a tlak bangin kan innchungkhar cio in siseh, pakhat cio kan nunnak ah siseh, harsatnak kan ngei cio hna. Hi harsatnak hna hi zungzal in a hmun mi cu an si lo timi zong kan theih ding a si. Sihmahsehlaw, cu harsatnak hna nih hin ṭihnak a kan pek khawh ngai ko. Kan thinlung Bawipa sinah kan chiah khawh ding kha a herh ngaingai mi cu a si. 

Bawipa cungah a fekmi zumhnak kan ngeih taktak a si ahcun hi vawlei harsatnak hna hi cu kan tei khawh ko hna lai. Bawipa hmai kha zoh ding philh lo ding a si. Pathian sin panh ding kha philh lo ding a si. Bawipa lawng cung a phanh a kai bak in thlichia vialte an daih dih bangin kan sin ah Bawipa a um a si ahcun kan harsatnak vialte an dai dih ko lai. 

Pathian sin thlacam philh hlah u sih. Bawmhnak hal ding philh hlah u sih. Amah kha zoh zungzal ding philh hlah u sih. 

Thazang petu /- Fr. Fidelis Maung Sein