Roco Phungphai
2.Thilri, chawva ro conak
Thlaceu le Khenglawtchung hna ahcun co awk ding ro tam an ngeih tikah thumchuah hnih cu upabik nih a co lai i, a hniang nih inn le ro a tangmi thumchuah khat cu a co lai. An ro a tlawm ahcun upabik nih a co dih ko lai. Hakha peng hrawng ahcun lai ram (landed property) ah an ngeihmi ram vialte i thumchuah hnih cu upabik nih a co lai i a tangmi thumchuah khat kha a hniang nih a co lai.
Khual ram (out villages) an ngeih lakah ram ṭhabik pakhat kha upabik nih a co lai i a tangmi kha a hniang bik nih a co dih lai. Cun an ngeihmi khual ram cu a kauh ahcun thumchuah hnih kha upabik nih aa laak ko lai i a tangmi kha a nau hniangbik nih aa co lai.
Cun mah chungkhar hna nih ro tam an ngeih lo ahcun upabik nih aa laak dih ko lai. Ro kha tam nawn an ngeih ahcun thumchuah hnih cu upabik nih, a tangmi kha a nau hniangbik nih a co lai. A hniangbik pa, nupi a ṭhit tikah a ti khawh tawk man a manhpiak lai. Man caah zeite tal a ceihpiak lo hmanh ah phunthawh cu a bawmh in a manpiak lai.
Sangpi, Sangte, Nguntual le Darkhuah chung hna cu a tanglei bantukin an kal ve.
Upabik nih innpi, hmunpi cu a co.
Unau pathum chuak an si i upabik nih hmunpi a co tikah rocotu (tefa) ngei loin a thih i milai pa cu inn ah a um ko ahcun a um ko lai i nupi a ṭhit tikah cun aa ṭhial lai i a nau hniang bik pa nih a co lai.
Sangtechung Van Mang, Ral Er
Sangpichung Khuk Hnin
nih hitihin an chim. ‘Upa bik nih an ngeihmi ro vialte i thumchuah hnih aa laak lai i, a hniang nih a tangmi thumchuah khat cu aa laak lai’ (the eldest gets two-thirds of all various kinds of property and the youngest one-third) tiah an ti.
Asinain
Sangpichung Sia Mang, Sang Kung, Lal Er le Than Hniar
Sangtechung Pa Awi
Darkhuahchung Ni Kual, Ṭial Ling, Tei Um, Do Kulh le Lal Cin
hna nihcun an ro conak kong ah hitihin an chim ve. ‘Upabik nih a duhbik mi aa thiam lai, a hniang bik nih a tlawmtam a chang in, cun a tangmi chung khan, milai pawl a tang zat nih aa tiangaw cio tein an co cio lai’ (the eldest has first choice, the youngest has second, and so on alternately).
Unau panga hna cu tlangval lawngte an si i a pa sinah an um. Upabik nih innpi cu a co i a thi ai. A dang a tangmi a naule nih a changchang in a hniang bik tiang an co lai.
Unau panga nih nupi ngei cio an si i a naule pali hna cu hmundang ah an i ṭhial dih cang a si ahcun upabik nih tefa thlau loin a thih sual a si ahcun a hniangbik nih hmunpi cu a co lai. A hniang pa zong cotu ngei loin a thih ve ahcun pathumnak pa nih a co ko lai.
Pahnih le pathumnak hna nih nupi ngei in kaa dang ah an um cang i pali le panganak hna zong nupi loin an upabik sinah an i benh ko rih i, cu an upabik nih ro cotu ngei loin a thih ahcun a hniangbik panganak pa nih a co lai., Cu pa zong cu ro cotu ngei loin a thih ahcun palinak pa nih. Cu palinak pa zong cu cotu ngei loin a thih ve ahcun pahnihnak pa nih a co lai. Cun panganak pa zong cotu ngei loin tuan tuk ah a thih le palinak pa zong nupi fate kaa dang ah a um cang ahcun pahnihnak pa nih a co ṭhiamṭhiam ko lai.