LUNGCHUAKMI PAOH A HMAAN TI ZUMNAK LE MINUNG CUNGAH NAMH CHIHIN HAWIKOMHNAK

Tanglo tein a hmaannak a um lo, lungchuakmipaoh a hmaan ti zumhnak

Zohkhenh tlangtlatu a um lomi minung a laicer chiahmi zumhnak cu zohkhenh tlangtlatu a um lomi zatlang nunning muisam (pungsan) leiah a hoih te lai. (Thangṭha in kan theihmi lung hlerhhlaunak. 80). Evangelic thangṭhabia in kan hmuhmi lunglawmh lung hlerhhlaunak cathluan ah tulio uarmi, a laarmi, tanglo tein a hmaannak a um lo, mah lungchung chuahmi paoh a hmaanmi an si, timi zumhnak cu Bupi kha a ṭhihmi, tiah a langhter. (Cathluan biatlangbor – 80).

Minung hna cu mah pumpak kha a laicer ah chiah a rak si tiah mah pumpak i tulio caante siaremnak lawng kha papek in biapi ah chia hi a tangmi thil hna cu a kamlei ah an phan tawn. Thiamnak fimthiamnak kha thangṭhat i, minung hna i zohkhenh tlangtlatu um lomi nawlngeihnak aana kha Pathian siter nakin biakmi chan ah hin lungchuah thil vialte a hmaan timi zumhnak a rak chuak caah annih vasi ahcun minung caah tulio caante is an a tlai dingmi thil hna hleiin a tangmi thil vialte a herh lo, tiah an ruah.

Sining hmaan lomi thinlung put phunphun hna cu pakhat kha pakhat nih thapek dirkamhnak an ngei i kokek pawngkam rawhralnak le zatlang nunphun inn nganpi cheumal dihlak leiah an hoih cio.

Minung pakhat le pakhat cungah nam chih mi hawikomhnak

Lungchung a chuakmi a hmaan tiah zumhnak i tuahtawn ningkeel hna cu mah pumpak ṭhathnemnak caah midang cung amiak laknak, minung le minung i hawikomhnak ah midang hna kha thilri bantuk ah ruat in komhnak, rumro in fialchihnak, pumpak leiba chamnak caah midang kha sal bantuk in fialnak hna a tuahter.

Hi bantuk khuaruahnak cu ngakchia mino hna hmanh kha nu/pa nuamhnak caah hrawhnak, upa deuh le tar hna kha mah pumpak caah san an tlai lo tiin hnonnak leiah a chanh hna. Hi khuaruahnak a cohlangmi hna nih chawdawr sipuazi puanzar hnuphen in minung hna i sipuazi kongkau kha ningcang loin an teithlak i, minung phu le kokek pawngkam khondennak hna kha a hlei in a rawkmi thil ah an chiah hna.

Lungchuahmi paoh a hmaan ti zumhnak cu minung saduhthah lenglei i Pathian nih a chia hi a dang tein a dirmi a hmaannak le minung nunning ziaza he pehtlaihmi ningcangmi upadi hna a hmunnak kha cohlan loin, mah pumpak duhtuknak kha lung diriam ternak le tulio caante a herhnak zulh awk phung lawng kha an cohlan. Hi bantuk in khuaruahnak a ngeimi hna cu minung zuarthlainak a phu (a bu) in sual tuahnak, rithai sii zuarnak, a harmi saram hna i an thla an hmul hna le pum cheuchum hna lehthalnak caah tlaihkhip (uk) nak a um kho lo.

Hi khuaruahnak nih hin sifakmi hna sinin minung hna i takpum cheuchum hna kha hneksaknak khaan hna ah hman dingin chuahter i zuarnak, duh herh lomi ngakchia no hna thianh dihnak hna kha nawlnak tuah phun khamh in bia an chim tawn. Hman hnu i hlonhmi tuahtawn ningkeel ruangah minung hna cu tlaihkhip uktu ngei lomi a herhminak tamdeuh in hmanduhnak duhfahnak ruangah, sawksamnak tampi a chuahter.

Kokek pawngkam a khondentermi rianṭuannak hna khap awkah rampi le tazaa upadi khuhchilhnak caah rianṭuan liomi rianṭuannak hna cu a zatceo cang tiah ruahdap ding a si lo. Zeicah kan ti ahcun minung nunning saudhthahnak lenglei ah a dang tein a dirmi a hmaannak le vawlei pumpi tahnak in cohlanmi minung nunning ziaza he pehtlaimi upadi hna kha cohlan zulhnak a um lo ruangah a si i, upadi hna zong kha mah pumpak cungah a herh ningin chuahmi upadi sinak, hrial awk a simi dawnkhantu sinak lawngin an rak hmuh.