Africa ah a Ni 10 nak: Bata ah ruahpi he a laam ṭimi hna

Pope Leo Africa a khual tlawnnak a donghnak Nithumni ah zan ah mino tampi hna cu lentecelhnak (stadium) chung ruah sur lak ah nuam ngai in hla an sa hna i an laam hna. 

Equatorial Guinea khuapi nganbik Bata i bawlung chuihnak hmun ah Pope he ton dingin mino le chungkhar thong tampi an i pumh lio ah ruah fak ngai in a sur. 

Cheukhat cu lentecelhnak hmun inncung tang ah i dor dingin an zam lio ah, cheukhat cu ruahpi lak ah an um i Pope a ra luh lai an hngak lio ah phu nganpi in an laam ṭi.

Bata Stadium ah Pope Leo hmuh awkah ruahpi lak ah minung thong tampi an i pum (@Vatican Media)

Leo a luh tikah cun lentecelhnak hmun chung cu electric in a lum an pek caah a lin sa ngai. Aa pum mi hna nih Pope lawng si loin an zumhnak chimphuan awk ah amah he hmuhkhat ah a kal ve mi hna kha lawmhnak nganpi he an mah phunglawm laam in an don hna. 

Pope nih aa pummi hna cu “hika ah a ceu bikmi ceunak cu nan mit hmai le nan hla hi a si” tiah a ti hna. A bia a ngaimi hna kha “lungrual tein um zungzal dingin” a forh hna i “thil sining kip ah lunglawmhnak ngan bik cu i pekchanh thiamnak in a rami a si” tiah a ti hna i cucu an tuahsernak in langhter awkah a forh hna.

Aa pummi hna nih Pope le biachimtu dang hna cu an lawmhpi hna (@Vatican Media)

Pathian dawtnak chungin chuahmi ahohmanh an um lo

Pope Leo nih Bata thonginn a tlawn hlaan deuh ah ruah cu sur hram aa thawk cang i tlawmpal ah ruahpi fakpi ah aa hung thleng.

Pope nih biachim hram a thawk hlaan ah a timi cu, “Hmun cheukhat ahcun ruah cu Pathian thluachuah hmelchunhnak a si tiah an ti. Hihi a si taktak nakhnga thlacam hna u sih” tiah a ti hna. 

Thongtla pawl Pope Leo bia theih duh ah an i tlawr lio (@Vatican Media) 

Bata thonginn cu kokek hrang sining in a harmi ngaimi thonginn a si tiah theih mi a si. Pope he tonnak a ngeimi thongtla pawl cu tlar ṭha tein an dirter hna. An thil hrukaih ning cio zohnak in an sual niam-san zong kha thleidan khawh a si. 

“Pathian dawtnak chungin ahohmanh an ṭhen le hlawt a si lo,” tiah Pope nih aa pummi thongtla pawl kha a ti hna. ” Bawipa mithmuh ah aa dang cio mi kanmah pumpak sinak, kan tuanbia hna Pathian hmai ah a sunglawi mi kan si zungzal ko” tiah a ti hna.

Hmailei caah ruahchannak

Cu ni lila ah khan Pope Leo nih Equatorial Guinea nichuahlei, Gabon ramri ah a ummi Mongomo khua zong kha a va tlawn.

Cuka hmun ah, Africa ram ah a ngan bik pahnihnak a simi Catholic biakinn ‘Basilica of the Immaculate Conception’ timi hmun ah Missa a va tuah. A phanh tikah Equatoguinean thaantar rong  a langhter kho mi meikhu he mibu thong tampi nih lunglawm ngai in an rak don. 

Pope Leo cu Mongomo’s Basilica of the Immaculate Conception ah meiphu in an don (@Vatican Media)

Hlan ahcun Mongomo khua a dai ngai mi khua a rak si ko nain 1990s ah zinaan chuak an hmuh tikah cun thil sing ning vialte a hung i thleng mi a si. Hmin dang ram ton cio mi bantuk in, vawlei chungchuak in an hmuhmi rumnak cu mi tlawmte kut tang ah a um ve mi a si.

A phungchimnak ah, Pope nih Pathian nih Equatorial Guinea cu “vawlei chungchuak in rumnak nganpi” a pek tiah a ti. Cun a ngaitu hna kha “cucu mi vialte caah thluachuah” siter awkah hmunkhat ah riantuan ṭi dingin a forh hna.

Equatorial Guinea ah, a chimmi cu, “Hmailei rawlṭamnak tei khawhnak caah ruahchannak nganpi a um ko.” Asinain, cu ruahchannak cu “kan hngah khawh peng ding mi” thil a si lo. “kanmah hrimhrim nih kilven ding le tuahser dingin Pathian nih vel a kan ngeihmi a si” timi a si deuh tiah a ti hna.