Thihnak cu a Donghnak a si lo

Nihin kan relmi cathiang Gen 22:1-14, Rome 6:3-11, Mat 28:1-10 chungin thazang la ṭi hna u sih.

Voi(1)nak Bible kan relmi chungah Isacc raithawinak si lainak kong kan hmuh. A pa Abraham nih fapa Isacc cu khanghthawinak caah thing cu a phorh ter i Moriah tlang lei ah an kai. ‘Ka pa, mei le thing cu a um ko, khanghthawinak caah tuufa cu teh khuazei ah dah a si?’a ti. “Ka fapa, Bawipa nih khua a khaan te ko lai” tiah a pa nih a leh. Issac cu khanghthawinak caah thah dingin kal pi mi a si. Sihmanhsehlaw, Issac canah tuufa no te in khanghthawi a si. Issac a luat, tuufa note a thi. 

Issac cu kanmah kan si. Thah ding kalpi mi cu Issac a si ko nain Issac a luat bantukin kanmah vialte zong thih dingah biakhiahmi cu Jesuh hi a si lo. Kanmah hi kan si. Kannih kan luat, kan caah Jesuh a thi. Jesuh cu sualnak a ngei lo, kan sualnak caah a thi. 1Cor 15: 3, “nihin kan caah Jesuh a tho ṭhan cang”. Alleluia. Thihnak cu a donghnak a si lo. Jesuh cu thihnak in thawhṭhannak nih thihnak khuamui cu a hrawh cang. Thihthiam lomi nunnak thar a kan pek cang. Alleluia. Thlaankhar lungpi cu Jesuh nih a ṭhial cang. Suanak nih a khuhmi kan sualnak vialte cu vailam tahnak ah khenhchih a si cang. Sualnak sal kan si ti lonak hnga caah a si. 

Rome 6:9-11, “thihnak cu a donghnak a si lo” timi hi nihin kan Bawipa Jesuh nih a langhter. Ex 12:1-14 chungah ‘kum 400 Izipt sal cannak in luatnak puai an tuah’ timi kha kan hmuh. 

Cubantukin sual sal cannak in nihin hi kan luat ni a si. Luatnak kan hmuh ni a si. Kan caah philh khawh lomi ni a si. Sal sinak in luatnak, zawtfahnak in damnak ah, thihnak in nunnak ah, lungretheihnak in hnangamnak, sual sal sinak in Pathian fanu fapa sinak nawl kan hmuh ni a si. Alleluia. 

Jesuh thihnak in a thawh ṭhannak nih kanmah vialte kan zumhnak a fehter chinchin. Khrih cu thawhter a si lo ah cun, kan zumhnak cu pakpalawng a si hnga. Sualnak chug kan um rih lai. Jesuh thihnak in a thawhṭhannak nih a der mi a Bupi a cawnpiaknak vialte kha biatak a sinak kha a langhter. 

Kan Bawipa Jesuh cu kan sual ruangah a thi. Kanmah vialte zungzal nunnak ngeih awk ah nihin a tho ṭhan cang. Alleluia. Thihnak cu a donghnak a si lo, nunnak thar kan hmuhnak a hram a si.