PATHIAN SERMI KOKEK VAWLEI HNA NIH AMAH CU AN THANGṬHAT

Van le vawlei cu a dihlak in siseh, a tamtuk mi pehtlaihnak hna in siseh, a dih a car kho lomi Pathian i a tlin cikceknak kha an langhter. Maquino khua in mithiang St. Thomas nih fimthiam tein a rak chimmi cu thilnung saram an tampi nak le an phun aa khah lonak cu hmasabik a tuahsertu i tinhnak in a chuak i Pathian a ṭhatnak kha thilnung saram phunkhat lawng nih tling cikcek in a langhter khawh lo caah, thilnung saram phunkhat nih tling tein a langhter khawh lomi Pathian ṭhatnak kha a dang thilnung saram phunkhat nih a betchih piak tawn.

Kannih cu thilnung saram hna an phun aa khah lonak kha, khat le khat pehtlaihnak phuntling he pehtlaihter in kan kawl kan cawn a hau. Thilnung saram phunkhat cio konglam kan kal tikah annih ha Pathian timhtuahmi simanking he pehtlaih in kan kawl lawngah thilnung saram pakhat cio i sullam le a biapitnak kha ṭha tein kan theih khawh deuh lai.

Pathian bia cawmnak cauk ah a langhter ningin Pathian cu thilnung saram khat le khat pehtlai tein hngatchan, bochannak kha timh in a sermi a si. Nika le Thlapa, Sida thingkung nganpi le pangpar fate, Mupi le Pithlung tiin rel cawklo saram phun le an i khah lonak hna kha kan zoh kan kawlnak in zeibantuk thilnung saram hmanh amah dang tein um khawh a si lo ti kha a langhter mi kan hmuh. Thilnung saram hna cu khat le khat pehtlaite bochan, hngatchan in phunkhat a tlamtlin lonak kha a dang saram phun hna nih an betchih piak i khat le pehtlai tein an i bawchan.

Zeizong thilnung saram vialte cu Pathian a tlin cikceknak kha an cerh timi kan hmuh tikah kannih kan lungthin cu thilnung saram hna caah Bawipa a thangṭhat i, saram hna he hmunkhat in Pathian biak duhnak thinlung thathawh ngaiin a hung chuak. Hi bantukin thinlung ah a chuakmi intuarnak cu Asissi khua in St. Francis nih a phuahmi hla ah rumra ngei ngaiin a lang.

Maw… Bawipa Pathian, thilnung saram vialte he hmunkhat in a bikin nan au Nika he hmunkhat in Bawipa kha thangṭhatnak in pe ko hna seh.

-Ni cu aa dawh i a ceu mi in na tlanter i, a thiangmi Pathian muisam kha a ken.

-Ka Bawipa ka Pathian, na far a simi thlapa le arfi hna nih Bawipa in thangṭhat ko hna seh. Bawipa cu van kaupi ah khin thlapa le arfi hna kha fiang tein na ser hna i annih cu mansung an si, an i dawh, an i nuam.

-Ka Bawipa Pathian, nan au thli thawngin nangmah kha thangṭhat si ko seh.

-Bawipa cu thilnung saram vialte hnakha thli in na nunter hna i thli in van minmei hna le khuacaan phunphun kha na chuahter hna.

-Ka Bawipa Pathian, na farhniang a simi Ti in nangmah kha thangṭhat si ko seh. Ti cu san a tlai i toidornak a ngei. Aman a fak i a thar in a thiang.

-Ka Bawipa Pathian, na nauhniang lumnak mei in nangmah cu thangṭhat si ko seh. Bawipa cu mei in zaan muihnak kha a ceuter i, mei cu aa dawh i, lente aa celh thiam, thazaang in a khat i a thawng.

Brazil ram in Bishop hna nih kokek vawlei cu Pathian kha an langhter bantukin kokek vawlei ah Pathian a umnak kha an hmuhsak. Pathian i nunnak thaw a pemi Thiang Thlarau cu a nungmi saram hna cungah a um i Bawipa he pehtlaih hawikomh dingin a kan sawm. Kokek vawlei ah Pathian kan tonnak cu kokek vawlei he pehtlaimi vanṭhatnak a si kan ti lai.

Hi konglam hna ruangah thilnung saram hna cu Pathian tlin cikceknak kha ngeih loin Pathian le thilnung saram hna cu tah khawhlo dingin an i hlat ti kha philh awk a si lo. Cuti a silo ahcun kannih cu thilnung saram hnak ha bawmhchanh loin annih an ngeih awk aa tlakmi, a hmaanmi hmun kha fehter lo bantuk ah a cang lai. Kannih cu anni hi a nuammi nunnak ah kan caah a pek khawh lomi thil kha an sin i pakpalawng halnak in a donghtermi kan si cio lai.