St. Francis of Paola (1416-1507)

Ramlak Um Zateik

Audio (aw) zongin ngai khawh a si. 👇👇

A hmebik Tlangbawi bawmtu (Minim Friars) bu a rak dirh hmasabiktu St. Francis cu 1416 kum ah Italy ram, Paola khua ah a chuak. Kum saupi tiang fa ngei kho loin a ummi nuva pahnih cu St. Francis Assisi i thlacam piaknak thawngin fapate an rak ngeih khawh caah an fapa min kha ‘Francis’ an rak sak. Francis cu kum (16) a si in rili kam lungkua pakhat ah ramlak um zateik pakhat sinakin biatak i zuam hram a rak thawk. A thianhlimnak le Pathian le upadi a upatnak thawngin mitampi nih a hnu an rak zulh i hmasabik “A hmebik mi Tlangbawi bawmtu Bu” kha a rak ser thawk. Cu min aa thimnak cu annih kha an Pathian bu chungah a hmebik tiah kan cohlang seh tinak caah a si. Annih cu a khuh le vampang a um lomi vawlei cungah an it i sa ulh rawl ulh in a har ngaimi zulhphung kha an zulh. St. Francis nih ‘Ka u le ka nau hna, nunnak ngei vawlei cung um kannih hna cu thlarau lei ah i zohkhenh cio dingin ralrinnak pek kan duh hna; Thihnak timi cu a fiangmi a si, a hohmanh nih hrial khawh lomi a si. Minung kan nunnak cu a tawituk i meikhu bantukin duhsah tein an lo thluahmah lai” tiah a hnuzul hna kha a rak chimh hna.

1481 kum ah St. Francis cu thi dengmang in a zawmi Luis Siangpahrang (12) nak nih a nawl caah France ram ah a rak kal. St. Francis nih Pathian kha ‘bawi hna i an nunnak hmanh kha rikhiah a si i zungzal hmunmi Pathian lawng nih cu nunnak hna cu a ngeih’ tiah a rak ti. Siangpahrang Luis cu a zawtnak a dam khawh lo hmanh ah Pathian ṭang chungah dai tein thih a herhnak kon gkha Francis hih a rak hngalh. Siangpahrang Lius ro cotu Siangpahrang Charles (8) nih St. Francis kha amah ruahnak petu rian a khinh i France le Italy ram hna kha Zateik Sianginn hna a rak sakpiak. Paola khua mi St. Francis cu 1507 kum ah a rak thi.