Solemnity of Mary Mother of God

Pathian i Nu Mary puaipi ni

Nambar 6:22-27; Salm 66; Galati 4:4-7; Luke 2:16-21

Khrihfabu liturgical calendar chung vialte ah Bawinu  philhlonak sunglawi ngaiin tuahmi Puaipi, puaini le philhlonak puai zeimawzat an um. Nihin ah khrihfami vialte nih an cohlang lomi Mary cu Pathian i Nu a si tiah kannih Catholic pawl nih cun nan Bawinu kha kan lawmhpi.

Kannih caah Jesuh Khrih cu Fapa Pathian a si, a thiangbik mi thumkomh Pathian ah a pahnihnak minung a si. Cucaah Mary cu Khrih i a nu a si bantukin Mary cu Pathian i Nu a si. Sihmanhsehlaw, mah nih hin Mary cu Pathian nakin asiloah a Pathian Fapa nakin a sang deuhmi dirhmun ah a chiah lo nain Jesuh Khrih he a hleiin pehtlaihnak a ngeih kha kan cohlan.

Vatican II cauk, Lumen gentium nih hitin a ti: “Vancungmi thawngthanhnak thawngin, Ngaknu thiang Mary nih a lungthin le a pum in Pathian Bia kha a cohlan i, Vawlei kha Nunnak a pek. Cucaah amah cu Pathian i Nu le tlanhtu i Nu taktak a si tiah cohlan le upatnak pek a si” (Lumen gentium 52).

Nihin ah Nambar Cauk chungin kan rel hmasabik mi bible ah Pathian nih Moses kha a min in zeitindah mi hna thluachuah pek ding a si tiah a chimhmi kan hmuh – “Bawipa nih thluachuahnak in pe hna sehlaw in zohkhenh ko hna seh…”

Galati cakuat kan relnak ah Khrih cu nu chungin a chuak ti kha kan i cinken, cucaah kanmah bantuk minung a si. Sihmanhsehlaw, cuti a tuahnak thawngin amah cu Pathian Fapa a si bantukin kannih zong Pathian fa kan si khawhnak hnga a kan tuah ve.

Thawngṭha chungah vancungmi nih thlahmi tuukhal pawl an rat tikah A Thiang Chungkhar cu saṭil chiahnak inn asiloah lungkua ah an um rih ti kan hmuh. Cafang pahnihnak nih thawngthanhnak ah Gabriel cawnpiaknak ningin Ngakchia cu Jesuh tiah min an sak ning kha a hngalhter ṭhan.

Kan Ruahawk tete a kan relbiaktu nan dihlak cungah 2025 kumthar thlauchuah cu tlung hram seh tiah thla kan in campiak hna.