
Kan Hramthawh Lio Caan Bantuk Kan Si Ti Maw?

Dawtmi u le nau hna; Nov 16 ni caah thlarau thazaang i hrawm ṭhan hna usih. Biathlam 1:1-4, 2:1-5; Luke 18:35-43 chungin Bupi nih a kan timhpiak.
Voikhat Bible kan relnak Biathlam chungah Khrihfa hna nih hlan i Bawipa thawngṭhabia an rak theih hmasat lio i Pathian cung dawtnak an ngeih mi tluk kha an ngeih ti lo tikah ‘ra kir ṭhan u, hlan bantuk tein khan rak ka daw ṭhan u’ tiah Bawipa nih ralrin a pek hna nak a si. Zeicahtiah Jesuh Khrih hnuzul Khrihfa kan si an ti ko hnu zongah khan Jesuh Khrih leiah an lung kal loin hmundang leiah an lung a pial sual cang caah Bawipa nih ralrin a pek hna nak kong a si.
Thawngṭhabia chungah mitcaw pa Bawipa sinah thla a cam. ‘David Fapa Jesuh, ka zaangfah tuah’ tiah a ti. Midang nih ‘dai tein um, hna hnawh hlah, na chimmi cu zei ah an rel lai lo cuh’ an ti lio ah khan mah mitcaw pa cu dai tein a um lo, thang chinchin in ‘David Fapa Jesuh, ka zaangfah tuah’ tiah a ti. Cu tikah Bawipa nih ‘a hodah a si, ka sinah rak rat pi u’ tiah zultu hna kha a ti hna. Bawipa nih mipa a thlacamnak a leh. Hlan ah khua a rak hmuh lioah Bawipa kha a rak hmu men lai lo, sihmanhsehlaw mitcaw damlonak, harsatnak a ton hnu ah aa ruahchan mi pakhatte lawng a si; cucu khua hmuh ṭhan khawhnak a si. Cu thluachuah a pe kho tu ding cu hodah a si ti zong kha a hngalh. A lung a rawk lo.
Cucaah dawtmi u le nau hna; Khrihfa kan sinak ah hlan i kan lungthawh ning tein khan nihin ni ah kan lung a tho peng kho maw, asiloah hlan i kan lungthawh ning khan si ti loin hmundang ah kan lung a pial sual ve maw. Kan thinlung hmundang ah a pial sual a si ahcun Bawipa nih hlan i na ka dawt bantuk te khan rak ka daw ṭhan, ka sinah ra kir a kan ti. Cucaah kan kir lo ahcun zeidah kan can lai; kan lo lai, kan tlau lai, kan thi sual lai. Mipa harsatnak a ton hnu ah ngol loin midang nih ‘dai, dai’ an ti lio ahkhan a dai lo. ‘David Fapa Jesuh, ka zaangfah tuah’ tiah thang chinchin in thla a cam, ṭhawng chinchin in thla a cam tikah Bawipa nih a thlacamnak a theihpiak i a damter.
Nihin nang le kei zong, hlan i thlacam kan lung a thawh bantuk te khan kan lung tho peng seh, cun harsatnak kan ton tik zongah cu kan tonmi harsatnak nihkhan kan mit cawtter ding si loin Bawipa nih a kan chimhhrin duhnak te kha hmuh thiam, theihthiam nak hnga ding caah siseh. Cucaah mitcaw pa bangin Jesuh kha ka zaangfah tuah tiah amah sinah bawmh hal in kan kirṭhan a herh. Cuti a si ahcun damnak kan hmu lai i nunnak kan hmu lai. Nan dihlak cungah Bawipa nih thluachuah in pe ko hna seh.
Thazaang petu /- Fr. Fidelis Maung Sein
