
Sakmi Min Sullam Hna (2)

Stephen Ni Kio nih a ttialmi Lai Nunphung Cauk chungin….
Voi khat ah kan chungkhat pa cu kumthar a thaizing ah ka hung leng i a mithmai a ṭha lo. Ka cungah thinhunnak an ngei rua tiah kaa phuhrung nawn. An nu nih ‘nizan zingka kha min ṭha lo pa kan chungKhat nih a rak kan tlun i a ing a puang i a si ko khah’ tiah a ka ti in ka ṭhut sia a rem ṭhan. Cu pa cu a ti bantuk awiawi in voi hnih peh tein cawndawi ah a kalmi kha, an rak tlaih hna i a inn ngampi dot hnih innpi cu a lo colh ko.
Rev. Chia Er hi ka ṭang a si i voi khat cu Hakha ah a tlung. Kan inn cu sak thar a si i, amah a min kha a chiat tuk caah a kan tlunnak tawn a si nain a kan tlung ngam lo i Pu Hmet Thang kha ‘va leng hmasa hna, cu hnu ah ka leng te hna lai’ tiah a fial i a hnu ah a kan leng bal.
Ka hngalhmi upa pakhat cu a min kha a ṭha ko nain a fim caah kumthar zing ah mi inn i kai loin Hakha zatlang lampi ah aa chawk i mah cun inn kip kha a kutzauh le a mithmai in a kan chawnhbiak tawn.
Min kan i sakmi hi a zeimaw caan ah cun kanmah nih cun sullam ngei in kan i sak kan ti ko nain miphun dang holh in a sullam kan laak ruangah siseh, relhcanhnak kan ngeih ruangah siseh, anmah nih a sullam an i laak ning si loin kanmah nih kan i laak ningin kan kal i min ṭha lo, chiat phortu ah kan thlak tawn. Cucaah ‘ka min a sullam a ṭhat ko ṭung, mah ti ṭha lo in an ka laakpiak’ tiah ṭhuang kan khawn len awk a si lo. Min ngeitu nakin a rak ingtu pa caah a biapit deuh kha kan hmuthiampiak hna a hau ve.
Hi ruahnak hi ruahnak hlun kan ti ko nain mi tampi, miphun tampi nih an i relhcanhnak a um cio caah mang ah manh le kumthar zing i lengtu ah cun min ṭha lo cu an duh cio lo. Cu bantukin min ṭha tete aa sakmi min hna cu mi nih innthar, thlaci tuh lim dih ka, mangmanh awk le kumthar zing i len awkah kan hlam ngaingai cio hna. Lailei i khual nan tlawn ah cun zei bantuk rank ngan nan si zongah, rian nganpi, rumra nganpi he na pal hna thlur ko lai, na rank kha an thlur lai lo. Patar hna, upa hna an rak um ahcun ‘Ka fa, na min ahodah a si?’ tiah an in hal colh ko lai. Na min nih an lung a ton hna ahcun zu an in dah lai i ar an in thah lai. Laimi kan i dawtnak ah (mizapi kan caah) zupu dah le arthah cu a sang bik a si.
Hi a tanglei i ka ṭialmi hna hi Rev. Chia Er, Pu Al Khar le a fapa Biak Nawl nih ka ṭialmi an cek i an pom ning le an ka chimh ning in a si. Pu Al Khar hi mifim ngaingai, Laimi kan nun le kan khuasak a ngiathlai i a hngal ngaingai mi pakhat a si i a fapa Biak Nawl zong hi a pa bantukin a hngalmi a si ve. Pu Al Khar cu mah min kong le a hnu bik i ka ṭialmi khuacaan rel ning a ka chimh dih a thaizing, kipthu ti bantuk ah a thi colh.
Minsak kong ah Hakha Laimi, mizapi nih tam bik kan i sakmi min hna i an sullam kha a tluang bik in ka ṭial hna. Hi min hna ah hin ka ṭial ning si loin anmah nih an duh ning in an i sak hnawhchan a um ko lai. Hi chungah aa tel lomi min cu a bengbeng deuh le special in sakmi min deuh an si.
