Kan Luatnak Jesuh

A dawtnak veel in lam a kan hruai i nihin ni caan zongah a biathiang in thazaang laaktti tthan dingah caan ttha caan sunglawi a kan petu kan Pathian a minthiang ka thangtthat. RVA a ngaitu zumtu nan dihlak Bawipa nih thluachuah in pe ko hna seh. Nihin Pathian kan relmi chungin Luke 13:10-17 chungin tlangtar ka duhmi cu ‘Kan luatnak Jesuh’ timi a si lai. Thawngtthabia chungah kan Bawipa Jesuh Khrih kha pumhnak inn ah a lut i Pathian bia a cawnpiak hna. Cu lio ahcun an lak ahkhan kum 18 chung Satan nih a ttemttawn mi nu pakhat a um ve a ti. ‘Minu cu Jesuh nih a hei auh i, Minu, na zawtnak in na luat cang’ a ti. Cu le cangka cun minu cu damnak a hmu ti kha kan hmuh. Hika zawn ah Jesuh nih a chimmi cu, na zawtnak in na dam cang a ti lo, na luat cang a ti. Zawtnak hi phunthum in tthen khawh a si. Kan zawtnak a ruang hi phunthum in a um. Pakhatnak cu tlangrai ruangah a si. A pahnihnak cu Satan nih a kan ttemttawn ruangah a si. A pathumnak cu kan sual ruangah a si. Tlangrai in kan zawt tikah sii le ai kan ei kan din a hau. Cun sualnak ruangah kan zawt tikah damnak kan hmuh khawhnak ding ahcun kan sualnak vialte mertaak in sual ngaihchihnak ngei in Pathian sinah kan kir a hau. Cuticun damnak kan hmuh lai. Cun Satan nih a kan ttemttawn tikah luatnak taktak, damnak taktak kan hmuh khawhnak cu kan Bawipa Jesuh Khrih lawng a si cang. Jesuh Khrih hi kan herh, kan fuh panh a hau. Nihin Bible chung i minu nihhin luatnak a hmuh tikah aa lawmtuk i Pathian kha a thangtthat a ti. Nang le kei Pathian nih a kan pekmi damnak, lawmhnak, thluachuahnak vialte caah lawmhnak bia chim ding le Pathian sinah thangtthatnak, sunparnak pek ding hi kan rian nganbik a si. Minu nih luatnak a hmuh i Pathian a thangtthat tikah hin aa lawm lomi pakhat a um tiah Bible nih a langhter. Cu pa cu hodah a si ti ahcun pumhnak inn a zohkhenhtu pa a si a ti. Biadang in kan chim ahcun Pathian rianttuantu a si ti khawh a si. Zei ruangah dah mah pa nihhin minu cung ahhin aa lawmh khawh lo, luatnak a hmuhmi cung ahhin zeicahdah aa lawmh khawh lo. Amah nih a timi cu Sabbath ni ah i damter hlah u, ni sawhsawh ah ra ulaw i damter ngat u, Sabbath ni ah tuah hlah ngat u a ti hna. Hi pa nunnak hi kan zoh tikah a chungah biatak a um lo ti kha kan hmuh khawh. Vawlei taksa sinak in a ummi a si, a dirmi a si. Zeicahtiah kum 18 chung Satan nih a ttemttawn mi nu luatnak a hmuh mi cu a lawmhpi ve ding a si. Nang le kei a caan caan ahcun phungbia le zulhphung kan i tlaih tuk nak ahhin Pathian veel ngeihnak he a caan ahcun kan i hlat caan tampi a um lai. Hi pa nunnak hi kan zoh tikah zulhphung hi aa tlaih tuk. Zoh hna hmanh u, phungbia aa tlaihtuk mi hna khi zeitik hmanh ah thlarau leiah nutling patling an si kho bal lo, thlarau rianttuannak ah zeipipa an si lai lo. Phungbia hi kan herh lo ka tinak a si lo, kan herh. Asinain nihin caan ah zeidah a kan cawnpiak; Pathian cu kan zeizong vialte a si, kan luatnak zong a si i kan damnak zong a si, ka teinak zong a si, kan hlawhtlinnak zong a si timi kha a langhter. Cucaah zumtu Khrihfa nu le pa hna; a luatmi nihcun Pathian an thangtthat, a luatmi nihcun Pathian sinah lawmhnak bia an chim, a luatmi nihcun Pathian sinah an i pumpe. Nihin caan ah diriam tein Pathian kan dawt khawh lomi le Pathian kan thangtthat khawhmi le lawmhnak bia kan chim khawh lomi hi kan luat rih lo caah a si. Satan nih a kan ttemttawn ruangah a si. Kan dam lo ruangah a si. Damnak kan hmuh khawhnak ding caah Jesuh panh usihlaw Jesuh kan panh ahcun a kan damter lai i kan luat lai. Cu tikah diriam tein Pathian kan thangtthat lai i diriam tein lawmhnak bia kan chim kho lai ti hi nihin caah thazaang hrawmh kan duh hna. Bawipa nih thluachuah in pe ko hna seh.