Na Innpa Kha Nangmah Naa Dawt Bantukin Na Dawt Ve Lai

Ka dawtmi u le nau hna, nihin Zarhpini Nithiang ni ah Khrih cawnpiaknak kan i hrawmtthan. Catholic Bupi cawnpiaknak ah Zarhpini cu Pathian ni a si a ti bantukin kan lungthin vialte kha Pathian sinah chia hmasa usih. Nihin kan relmi Exodus Bible chungah ‘Nannih zong Izipt ram ah ramdang mi nan rak si ve, cucaah ramdang mi kha nan sersat hna lai lo, nan hrem hna lai lo’ tiah Pathian nih a kan cawnpiak. ‘Cun nuhmei le ngakttah kha zawmtai hna hlah u, Keimah cu mi zaangfah hmangmi Bawipa ka si’ tiah a ti. Cuticun Exodus chungah Isarel miphun pawl kha Pathian nih a cawnpiak tik hna ah nannih zong ramdangmi nan si lio ahkhan harnak phungtling nan rak in khah, cucaah midang kha zawmtai hna hlah u, sersat hna hlah u, daw hna u timi kha a cawnpiak hna. Khirhfa kan sinak ah dawtnak kha a biapi bik in Khrih nih a kan cawnpiak. Mithiang Paul nih Thesalon khuami ca a kuat hna tikah 1Thesalon 1:5 chungah; ‘Zeicahtiah nanmah sinah a chuakmi thawngpang Bawipa kong kha Masidonia le Greek ram leng tiang a phan i Pathian nan zumhnak thawng nih khan khuazakip cu a cul’ tiin Mithiang Paul nih Thesalon khuami kha ca a kuat hna. Nan zumhnak le Pathian nan dawtnak le Pathian nan i bochannak cu nihin ah mi vialte zohchunh awktlak a si a ti. Anmah chan lioah Thesalonian pawl nih Pathian bia an theih paoh ah an zumh taktak, cu tikah Mithiang Paul nih a thangtthat hna. Nan zumhnak cu Masidonia le Greek mi hna nih an in zohchunh hna. Cucaah nan zumhnak, nan dawtnak, Khrihfa nan sinak cu Pathian nih an cohlan hna tiah a thangtthat hna. Kanmah zong Thesalon khuami hna bantukin kan zumhnak le Khrihfa kan sinak kha tehte kan khaang maw, cucaah Jesuh Khrih nih a cawnpiaknak chungah mi pahnih pathum in lungrual tein thla nan camnak ah kan umpi hna lai a ti. Cun mi hmai ah keimah kha tehte nan ka khaan ahcun kei zong nih ka pa hmai ah tehte kan khaan ve hna lai tiah a ti. Cucaah ralttha tein Jesuh Khrih kha Thesalon khuami hna bantukin zum hna usih. Thawngtthabia chung zongah Jesuh Khrih nih Matt chungah zeidah a kan cawnpiak; Jesuh nihcun Bawipa na Pathian cu, na lungthin dihlak, na ruahnak dihlak, na thazaang dihlak in na dawt lai tiah a ti. Cucaah Pathian kha hmasa ah kan chiah ding a si. Cu a hun changtu cu a ti; hihi a biapi tuk. Na innpa kha nangmah naa dawt bantukin daw tuah tiah a ti. Dawtnak cu Pathian a si-Pathian cu dawtnak a si. Zei ruangah Pathian nih a kan dawt kan ti khawh; A fapa ngeihchun kha vawlei ah a thlah i Kalvary tlang ah thihnak in tiangin mi vialte a kan dawtnak kong kha kan hmuh khawh. Cucaah thihnak tiangin dawtnak a ngeimi nakin a sung deuhmi a um lo a ti. Cucaah ngakchia pakhat kha ti hraikhat na pek ahcun keimah na ka pek a si a ti. Cucu Khrihfa Jesuh zumtu pawl i kan ngeih hnga mi lungut a si. Khrihfa kan nunnak cu dawtnak kha a si. Khrihfa nih dawtnak kan ngeih a hau, zei ruangah Pathian cu dawtnak a si, Khrih cu dawtnak a si caah vawlei cu a kan dawt i mi vialte khamh dingah vawlei ah a ra, Kalvary tlang ah a kan thihpiak mi aho caah a si; mi vialte caah a si. Khrihfa mi ca lawngah a si lo. Pathian sermi Adam le Eve tefa hna cu vawlei ah kan tamtuk, mah vialte kan sualnak in khamh ding caah a si. Mah lak ahcun kanmah Khrihfa pawl hi a bikin Khrihfa kan si caah Kalvary ah a thihnak le a thawhtthannak a zummi kan si caah mah nunnak kan ngeihmi ah Pathian kan dawt bantukin kan innpa, chakthlang kha kan dawt ve lai. Dawtnak nih tehte a khaan dih, vawleipi kha dawtnak nih a thlen dih. Nihin kan pawngkam vawlei hi zoh tuh u; dawtnak zeital a um maw. Vawlei pumpi, kan Kawlram telh in ral an i do, Khrih nih raldohnak in teinak cu a hmu lo cuh, dawtnak in khan teinak kha a hmuh. Vawlei ka tei cang a timi cu raldohnak a si lo, dawtnak in mi vialte kan nun kan i thlen khawhnak ding caah Keimah cu a sualmi khamh dingah ka ra a ti. Miding hna caah ka ra lo a ti. Mizaw nih siibawi an herh bantukin siibawi zong nih mizaw an herh ve. a dammi cu an herh lo. Cucaah nihin vawlei ah dawtnak kha a herhtuk hringhran. Kan vawleipi cu a bituk, internet in thawngpang kan zoh tikah dawtnak a um le um lo kha kan hmuh khawh. Ral dohnak lawngte kan hmuhmi a si. Khakha Khrihfa hna nih dawtnak lungthin in vawlei pi kha kan remh lai. Dawtnak in khan minung vialte kha Satan kutchung in Pathian nih a kan khamh bantukin vawleipi kha kan khamh lai. Cucaah Pathian nawlbia chung zongah Pathian loin a dang pathian zumh in na bia lai lo a ti. Pathian lawng kha na biak lai, Pathian lawng kha na dawt lai a ti duhnak a si. Kan nunnak ah zeizong vialte a sertu cu Pathian a si timi kha Khrih nih dawtnak kha kan ngeih a hau. Nawlbia lakah a nganbik cu dawtnak a si. Matt 22:37 ah; Bawipa na Pathian kha na lungthin dihlak, na ruahnak dihlak, na nunnak dihlak in na dawt lai tiah a ti.