Fangeih Phungphai

2. Fapawi lioah ulhmi  

Laimi zumh ningah kan chung i a ummi minung hi a pum tlamtling tein a chuah khawh nakhnga le a pum tlamtling a si khawh nakhnga a pum nih a hiarmi kha a ṭa, a pa, a va nih a si khawh chungin an kawlhlai i pek khawh an i zuam.  

Cucaah fa a pawi liote in a tanglei pawl hi an ulh.  

-Rul an that lo, rul an thah ahcun an hrinmi fa lei chak an hmang an ti.  

-Makphek tamtuk ei cu nau mit a fak an ti.  

-An thil an i hruk ngammi (hruk tawn mi) kha mi dang ṭhenhpek an ulh.  

-Kawhra tampi an ei lo, nau mit a fak.  

-Thiampi an tak lo, nau um a rem lo.  

-A phirmi thingthei an ei lo, fa phir hrinnak a si.  

-Thingkung le vamtlang ah an kai lo, a ritmi thil cawi le banhcham thil an ban in an la lo, nau laihri aa ngerh, nau a rawk.  

-Hleichok kung an hlam lo, hleichok cu miruak pawng i hreitlung bahnak ah an hmanmi thing a si caah nau nih a ṭih i a lau an ti.  

-Thihhring i a thimi (sarthi) ruak an thlah lo, mithi thlarau nih hngakchia kha hna a hnawh.  

-Cakei an kahmi ruak pawng kal an ulh, cakei thlarau nih mi hna a hnawh bantuk in ngakchia kha hna a hnawh.  

-Ruak an humh ahcun miruak thlanglei ah an ṭhu lo, mithi thlaraunih nau kha a kalpi.  

-Ramlak i an kal ahcun ti aa dilmi an ding lo, a luangmi lawng an din, nau dam lo nak a si an ti.  

-Zu dahnak ah a va nih zu ti a toih lai lo, zu a rawk.  

-Khuai chimnak ah a va aa thawh lai lo, khuai a hrang khun.  

-Pu le la buhnak ah a kal lai lo, an buhmi thil a kawk tuan.  

-Thingtlai a hmin lios a lo lai lo, a buar an ti i a hnu ah a tlai a reprai ti lo (a pangchia).  

-Hma hring paohpaoh a tawng lai lo, hma a por an ti.  

-Lo ah bolsannak a va nih a tuah lai lo, khuazing a ung an ti.  

-Ngatafuan ruhnak ah a va cu a kal kho nain, nga fuannak kawr ah a ṭum kho lo. Nga a fuan kho lo, a hrulh an ti.  

-Ba ei cu an hrial, nau a thur an ti.