Mino hna nih hmai lei an nunnak caah lam thar an kawl khawhnak hnga bawmh dingin Catholic sianginn hna sin ah Pope ni forhfialnak a tuah

Catholic sianginn le Catholic university hna ah thlarau lei lamhruainak le zohkhenhnak kong he pehtlai in International Congress chungtel hna he tonnak le biaruahnak an ngeih lio ah, Pope Leo 14 nih a chimmi cu, “Catholic fimcawnnak sianginn hna ah mino hna nih dawt le zawnruah an sinak an theih hngalhnak thawng in hinak in a ṭha deuhmi vawlei an serchuah khawhnak hnga fimchimt saya  hna nih bawmhchanh ding asi tiah October 22 ah thazaang peknak a ngei. Nunphung le Fimcawnnak (Dicastery) nih a tawlrel i October 22-23 tiang Vatican ah tuahmi Sianginn le University ah fim cawng lio mi hna caah thlarau lei le ziaza lei zohkhenh kilvennak kong he pehtlai in Pope nih a chim rihmi cu, mino tampi nih harnak hrial awkah an i sermi ralthuam hna tangah dawt le dawtmi(love and to be loved) si duhnak lungthin a um tiah a ti.

Mino hna kha zatlang umtu ziaza ṭha, unau sinak le a ding a felmi zatlang nunphung sertu an khawhnak hnga bawm hna u tiah a ti. Ralṭhatnak cu zumh ngamnak in a ra. Nangmah le nangmah na zumh hlan ah nangmah an zumtu le an bochan ngamtu i an hmuhtonnak in a ra tiah a chim chap. Jesuh nih Lamkaltu 12 kha an ral a ṭhat ruang ah a au hna loin amah Bawipa nih a zumh ngam hna i thil ti khawhnak peknak hna kong a chim. Siang ngakchia hna caah Catholic sianginn le Catholic university hna cu inn bantuk an si awk a si tiah a ti.