TUCHAN CIPEH LE HMAILEI CIPEH THAR HNA KARLAK PIAHTANA
Hi a konglam hna kha ralṭha ngaiin hmaitonh in biahalnak tuah hnuah, a dang a biapimi biahalnak hna kha kan tuah ding a si. Kannih hi vawlei cung i nun ṭhutdirnak i aa tinhmi cu zeibantuk dah a si? Zeicahdah kannih nih hi hmun ah kan rak phak? Kan rianṭuannak le kan i zuamnak hna cu aho caah dah a si? Vawlei pumpi nih kannih kha a kan herh maw herh lo. Hmailei caan cipeh thar hna caah zohfel in ṭha tein ruah piak dingah kaa in chimnak lawng nih a za lai lo.
Kannih ka huham hmanh a zor ding a si. Minung nih zeitin hmanh in um awk a si kho lomi vawleipi kha hmailei caan cipeh thar hna caah kan ngah piak hna a si cun hmasabik ah kannih hleiin aho cungah dah ṭuanvo a um lai. Hi kong cu kannih kha a kan zuamcawhmi a si.
Hmailei caan ah chan a rawk cang lai. Vawlei caan a dong cang lai an timi zong hi ṭhumhter khawh a si lo. Kannih cu hmailei caan cipeh thar hna caah rawhralnak hna lungrawk a simi hna le a thurhnawmmi hmunthur pon hna kha rothil ah kan chiahpiak hna men lai. Vawlei chungchuak thil hna sawksam ning, hlonhmi thilri hna le kokek pawngkam thil umtu ningcang aa thlennak hna cu Vawlei pumpi nih a chuahpiak khawhmi vawlei chungchuak thilri thazaang hna kha thazaang dihlak chuah le laakhruak in a chuahmi a si caah, kannih kan umtu ziaza hna cu vawlei cung ramkip ah a cangmi kokek harnak hna kan chuahter bantuk a si.
Kokek pawngkam thil umtu ningcang he pehtlaih in cuaithlainak lei aa tluak lonak ṭhatlonak zorter dingah atu bak fiang tein bia i chah in kan ṭuan awk a si. Hi a chiahru ngaimi thil umtu ningcang a rak chuahtermi kannih hna cu ṭuanvo a ngeimi, bia ingtu (tazakhan) kan sinak kha ruat ṭhan in khuaruah kan tuaktan awk a si.
Kokek pawngkam rawhralnak he hmunkhat tein minung hna nunning ziaza le nunphung phunglam hna telh chih i hmunkhatte ummi a rak tamtuk chinchin caah, hi zuamcawhnak kha biapi ah chiah in tlangtlak fianternak caah harnak tete a um ko lai.
Tu chanthar ah umṭhumi hna cu pumpak zalonnak lawng kha pa an pek cio i, minung phu hna nih an hmaitonh liomi piahtana hna cu a tam deuh in mah pumpak ca lawng a lomi nunphung le atu lio caan khatte lunglawmh nuamhnak lawng kha tlaihchannak hna ruangah a rak chuakmi piahtana hna an si. Hi piahtana a chuahnak cu innchungkhar hna le chungkhat cingla rualchan hna cungah kan chiah dingmi zuun ngaihnak hna le midang hna kha hngalhpi cohlan dingah kan thil a rihnak hna ah kan hmuh hna.
Nu le pa hna nih an sawksammi a tamtuk ruangah fale hna kha a khonden i, annih cu umnak inn i cawk khawh lonak, innchungkhar cungah tlamtlinh lonak hna a chuak. Kannih cu hmailei caan cipeh thar hna chungin misifak hna caah lungrethei in kan um bangin nihin ah kan ton cuahmah mi misifak hna kongkau zong kha telh chih in khua kan ruat kan tuaktan awk a si. Minung hna kan chan cu a tawituk hringhran caah chan ṭha kha pehzulh in kan hngak kho lo.
Chungkhar a pehpeh karlak pumkhatte a si bantukin mah le mah he a kum aa khatmi hna, tulio a nungin a ṭhudirmi hna karlak ah a ummi hna ṭhathnemnak zong kha hmunkhat tein i bawmhchan cio in rian kan ṭuan hna lai.