Pathian Bia he a Nung mi Nu

Nihin RVA in thazaang a latu nan dihlak chungah Pathian nih thluachuah in pe ko hna seh. Nihin thawngṭhabia (Lk. 11:27-28) tiang, “Jesuh nih hi bia a chim dih tikah hin mizapi lak cun minu pakhat a hung au i, “Nangmah a rak in hring i a rak in cawmtu nu hi zeitluk in dik aa lawmh,” tiah a ti. Sihmanhsehlaw Jesuh nih a thawh i, “Pathian bia kha a thei i a ngaimi caah cun zeitluk in dik lunglawmhnak a si chinchin,” tiah a leh. 

Jesuh nih Farasi mi biahalnak le bialehnak a tuahmi le mizaw a damternak le khuaruahhar a tuahnak kha minu nih a hmuh tikah zapi lakin a hung dir i Jesuh kha, “Na thiamtuk, na fimtuk, na ṭhawngtuk” tiah a thangṭhat lo. A rianṭuannak a hmuh tikah amah a hringtu a nu tu kha a thangṭhatnak kha kan hmuh. 

Mah minung nih a kan cawnpiakmi cu Jesuh dawtnak a theifiang cangmi hna nih misual a kan dawtu, Jesuh a kan hrin piaktu a nu hi thangṭhat awk a phumi a si, upat awktlak a phumi a si timi hi a kan cawnpiakmi a si. Jesuh nih minu kha a thawh i, “Pathian bia kha a the ii a ngaimi hna caah cun lunglawmhnak a si chinchin,” a ti. A chimduhmi cu a nu, Mary, kha a si. Pathian bia kha a theih hmasabik le a bia a ngai hmasabik cu a nu Mary a si. Cucaah Pathian nih thluachuahnak a pek. 

(Lk. 1:26-38) ah, Mary sinah Pathian bia a phan. Mary nih aa thawh i, “Kei cu bawipa salnu ka si ko, na chim bangin ka cungah tlung ko seh,” tiah a ti. (Lk. 2:51) ah, “Mary nih Pathian bia cu pakhat hmanh thlau loin a lung chungah a ken dih.” Lamkaltu pawl cu kum (3) chung lawng Jesuh bia kha an theih, a nu Mary cu kum (30) tiang Jesuh bia kha a theih. Mary cu Pathian bia ah a nunnak hram a bunhmi a si. 

Cucaah Jesuh nih lunglawmhnak a timi le vawlei mi hna nih lunglawmhnak kan timi hna cu an i dangtuk. Vawlei mi hna an i lawmhnak cu sui le ngun ah a si. Pathian fale hna an i lawmhnak cu a biathiang ah a si. Nan dihlak cungah Pathian nih thluachuah in pe ko hna seh. 

Thazaang petu /- Saya Francis Khua Pheng