TULIO CIPEH LE HMAILEI CAAN CIPEH THAR HNA KARLAK AH A UM AWK A SIMI NINGCANGTE UMNAK (DAL KHATNAK)
Mizapi ṭhathnemnak ca tuahnak ah hmailei caan cipeh thar hna zong telh chih in ruah a hau. Vawlei pumpi huap sipuazi lei harnak cu tulio minung hna le hmailei caan cipeh thar hna i an van kha zei rel loin ṭhathnem lonak a chuah cu a fiangmi a si.
Kannih cu pehzulh in kan kilven khawhmi ṭhanchonak lei timhtuahnak (simanking) suai awk a ṭha lo. Kannih cu kannih kan fale, kan tule, kan tuchin hna a simi hmailei caan cipeh thar hna kha zeibantuk, vawlei pumpi rothil kha kan nganhpiak hna lai, tiah khua ka ruah tikah thil umtu ningcang kha phun dangin ka hmuh ṭhan.
Vawlei pumpi cu kanmah caah Pathian nih a laak in a kan pekmi laksawng sung a si i mah kha midang hna he i cheuh in hman dingmi a si ti kaa fiang. Kan caah Vawlei pumpi a kan pek ruangah khakha nuamhnak lei lawng a kalmi hna bantukin thilthar chuahternak thazaang hna, ṭhathnemnak le amiak hna kha mah ca ṭhathnemnak lawngah ka hman lai tiin ka ruah ngam ti lo.
Miphun pehzulh (a chanchan) karlak lungrualnak langhternak cu thimnak nawl a ummi thil si loin dinfelnak nih a halmi a si. Zeicah tiah Pathian nih kan caah a kan pekmi vawlei pumpi cu kan hnung in a rak phan dingmi cipeh thar (ṭhangthar) hna he zong aa pehtlaimi a si.
Portugal ram i Bishop pawl nih ningcangte sinak nih a halmi hi ṭuanvo le tavuan hna kha theih hngalhpi cio dingah a hal hna. Vawlei pumpi pawngkam cu kannih nih kan cohlanmi thil a si. Cucu miphun a chanchan caah hlanh chungmi thil a si caah cipeh thar hna sinah kutchanh in pek dingmi a si. Kakip aa telmi kokek pawngkam zohkhenhnak ah hi a kau ngaimi ruahchannak hna hi aa tel awk an si.
Kannih cu atu a thang liom ngakchia mino hna le kan hnung in a ra phan dingmi minung hna sinah hi Vawlei pumpi kha rothil sinak in zeitindah kan nganhpiak hna lai? Hi biahalnak cu Vawlei pawngkam thil umtu ningcang kha a hmete dip tein ṭhen hnuah a dangte kawl in cawnnak a si lo. Zeibantuk a simi Vawlei pumpi kha kannih kan um lo tikah hmasabik ah cucu khoika lei kam ah dah a hoih timi, cu i a sullam le aman hna kha ruah ṭhan awk a si. Hi konglam hna kong kha langhter in kan ruat lo ahcun kokek pawngkam piahtana kong fianternak cu a hma a kal kho lai lo.