Thihdan peknak tuah rih loin a caan sauhnak in thihdan peknak phunglam hrawhnak lei ah kal a herh tiah Vatican Zung nih UN ah a chim

Archbishop Christophe Z. El-Kassis nih nu hrin covo kilven zohkhenhnak he pehtlai in thihdan peknak zulhphung cu hlawt le ngol a herh tiah UN zung i bia a chimnak ah nawlnak le forhfialnak a tuah. Sual biaceihna le rit hai sii khamnak he pehtlai in a chimmi ahcun hi bantuk thil a cannak hnga lo ding ah, a hlankan tein i ralrinnak le runvennak hna a biapitnak kong zong a chim chih. Vawlei cung minung sifak, mirum thleidannak um loin nunnak i runven awk le kilven awk ah a biapi tiah a ti fawn. October 7 ah tuahmi UN General Assembly avoi 81nak i biachimnak ah Archbishop Christophe Z. El-Kassis nih minung pakhat cio i nuhrin covo ṭhanchoternak le kilvennak zohkhenh a hernak kong a chim. Catholic Bupi cawnpiaknak nih thih danpeknak cu a cohlang kho lo. Aruang cu mi pakhatkhat nih zei bantuk sualnak hmanh tuah sual le buar sual ko hmanh sehlaw Pathian nih minung pakhat cio sin ah a pekmi minung sinak limhaang cu zeitik hmanh ah a tlau lo tiah Archbishop nih a ti. Thihdan peknak phunglam a ṭhancho lio ah, thihdan pek ah aa tlak tiah ruahmi thongthlami hna nih an sual an i ngaihchih i khamhnak an hmuh khawhnak ding lam on piak awk ah le minung nunnak kha a kilveng a rungvengtu zatlang nunphung ṭhatein ser awk ah nawlnak a tuah.

Biaceihtu nih bia fiangfai lo in biachahnak an tuah sual i thihdan pek asi tik ah, mi pakhat khat kha a suallo buin thihdan pek sual asi ahcun cu tuahsernak cu remhṭhan khawh asi ti lo tiah Archbishop nih a ti. Khat lei ah, ngaihchiat a tongtu le thah le hliam a tuartu chungkhar hna lungrualnak, zawnruah zaangfahnak he a rannak in bawmhchanh awk le hnemh awk an si pin ah, ahmaan ning tein le thleidannak umloin thil sining cung ah halnak nawl an ngei ko, sihmanhsehlaw, mi pakhat nunnak lak ve asinak thawng in nunnak a liam cangmi kha a nungṭhan kho ti lo. Lainawnnak a chuah tik ah lainawngtu kha tlaih le hrem ve asi cu leh rul chamnak le phu hlamnak si loin cu misual pa nih a sualnak aa ngaihchih i a minung hawi sin ah ṭhatein a tlawnlen ṭhan khawhnak caah asi tiah a chim chap. Cheukhat ram hna ah thih danpeknak an donghter i kan i lawmh lio ah cheuhkhat ram ah thih danpeknak pehzulh in an tuah rih tiah ralrinnak a pek hna. Ngaihthiamnak le ruahchannak vialte a hrawktu thih dan peknak (death penalty) cu donghter ding ah a thar in thazaang chuah in i zuam a herh tiah Pope Leo 14 i a chimmi bia kha Archbishop nih a nolh ṭhan.