Zumhnak in Kal

Nihin ni hna zongah RVA hmangin thawngṭha hrawm ṭinak caan ṭha a kan zaangfahtu kan Pathian amin ka thangṭhat. 2026, October thla, nihin hna zongah Khrihfa Bupi nih rel dingin a kan timhpiakmi cathiang, bible pakhatnak (Gal. 3:7-14; Lk. 11:15-26) hna hi an si. Luke thawngṭha hi a tawinak in kan langhter lai. 

“Sihmanhsehlaw a cheu nih an i thawh i, khuachia ṭhawl khawhnak ṭhawnnak a petu cu khuachia hna lak i a bawi bik Beelzebul a si,” an ti. A dang nih amah kha foih an rak duh ve, cucuaah na tuahmi hi Pathian hnatla a si le si lo hngalhnak ah khuaruahharnak pakhat in ser tuah, an ti. Ka ṭhawlning hna cu hitihin a si ahcun, nanmah na zultu hna nih khan tah zeitindah an ṭhawl kun hna? Beelzebul ṭhawnnak in khuachia kha ka ṭhawl hna a si ṭung lo, Pathian ṭhawnnak in pei a si deuh cu, cu nih cun Pathian Pennak kha nan sin a phan cang ti kha a langhter. A ṭhangmipa nih a hriamnam dihlak he a inn kha a ven tikah a ngeihmi thil vialte kha a him tawn. Sihmanhsehlaw amah nakin a ṭhawng duhmi pa nih a hung doh i a hung tei tikah inn ngeitupa nih aa bochanmi hriamnam vialte kha aa kalpi dih hna i a firmi thil kha midang a phawt hna. “Keimah a ka ṭanh lomi cu a ka dotu an si; pumh a ka bawm lomi cu ṭhektu an si,” tiah a ti.

Kan Bawipa Jesuh nih khuachia ṭhalo nih a tuahmipa kha a thilti khawhnak in khuachia cu a dawipiak i a chuak i mipa cu a holh kho i, cu kong ahcun a hmutu kha an khuaruah a har i Farasi mi hna pawl nih kan Bawipa Jesuh  Khrih cu khuachia hna vialte lakah a nganbik, bawi bik Beelzabul ṭhawnnak in hi pa hi a damter, tiah an puh. Sihmanhsehlaw kan Bawipa Jesuh Khrih nih a timi cu Pathian ṭhawnnak in pei ka ṭhawl cu, cucaah cun cu nih langhter a duhmi cu Pathian Pennak kha nan sin a phan cang ti kha a langhter duhmi a si, tiah a ti. Kan Bawipa Jesuh Khrih nih a ti ṭhanmi cu ram pakhat chungah aa dohmi le aa domi an um a si ahcun cu ram cu caan sau a dirk ho lai lo. Cu bantukin innchungkhar ah aa domi chungkhar hna cu caan sau a dir kho lai lo, tiah kan Bawipa Jesuh Khrih nih a ti hna. 

Duhdawtmi u le nau, nu le pa hna Satan pa i a rianṭuannak cu ṭhektu, lungrual lonak a chuahtertu, pakhat le pakhat lakkar ah remlonak thlaici a tuhtu cucu khuachia pa i a rian cu a si. Sihmanhsehlaw kan biak kan Pathian i a rian cu lungrualnak le thinlung khatnak, dawtnak, hmunkhatte ah i pumh khawmh i lungkhat tein um kha cucu kan Bawipa Jesuh Khrih i a thuam cu a si. Farasi mi pawl nih nihin i kan relmi thawngṭha ah kan zoh tikah nawlbia zulhnak ahcun an fel ngaingai, an ṭhawng ngaingai, anmah le anmah zong an i ur ngaingai. Kan ding, kan fel tiah an i hmuh peng. Sihmanhsehlaw kan si khawh lonak, kan tlamtlin lonak ah a kan hngalbiktu cu sertu Pathian a si i, minung dinnak, minung felnak, minung lei lawngin nawlbia zulhnak le dinfelnak in zungzal nunnak phak khawh a si lo kha a kan sertu Pathian nih a hngalh caah cu chungin chanhchuah a kan duh i a pennak cu vawlei cungah kan biak kan Pathian nih a dinh. 

Cucu kan Bawipa Jesuh Khrih, khamhtupa, Messiah vawlei cung i a rak thlah kha a si. Cucaah Pathian a Pennak hi vawlei cungah a dirh bantukin duhdawtmi u le nau, nu le pa hna cu vawlei cung i a dirhnak a ruang cu Satan pa ṭhawnnak, khuamui tang i a khatmi, khuamui chung i a ummi vialte kha ceunak pekin sualnak chung i a pilmi hna kha amah mifa can dingah khamh dingin kan Bawipa Jesuh Khrih a rak ṭum hi a si. Farasi mi hna nih cun kannih cu Abraham i tefa kan si caah tiah an i urthlar ngaingai. 

Sihmanhsehlaw nihin i kan relmi (Gal. 3) chungah kan hmuh khawhmi cu Abraham tefa taktak sinak cu zumhnak a ngeimi an si ti kha nan hngalh awk a si tiah Galati cathiang chungah fiang te khan kan hmuh khawh. Abraham tefa, Pathian nih bia a rak kamhmi hi, hrinsormi vawlei taksa ah le vawlei titsa in a chim duhnak si loin Abraham bantukin zumhnak ngeih in kan caah a rak thlahmi Fapa Jesuh Khrih kha zumh in ka khamhtu pa le ka Bawipa le ka Pathian ti cohlan kha Pa Pathian nih a duhmi a si. Kan Bawipa Jesuh Khrih tel loin minung a ṭhatnak le a thilti khawhnak in nawlbia cu a zul kho lo lawlaw a si. Nawlbia nih a chuahpimi cu thihnak kha a si ko, tiah a ti. A ruang cu minung nih kan zulh khawh lo caah a si. Nawlbia a zul khomi cu nunnak ah a phan lai, tiah cathiang nih a chimtak ko tiah nihin kan relmi Galati chungah kan hmuh khawh. Sihmanhsehlaw ahohmanh nih nawlbia kongah tlam kan tlinh lo. 

Asiahcun nawlbia hi kan zulh a herh maw? kan ti a si ahcun, kan Bawipa Jesuh Khrih khamhtu pa tiah a cohlangmi hna nih nawlbia cu zulh a hau. Jesuh Khrih kan dawt, kan zumh kan timi cu a nawl kan zulh a si i, Moses phungbia cu zulh kan hau lo nain Sinai tlang i pekmi nawlbia pahra kha kan zulh a hau a si. Cu kan zulhmi cu kan Bawipa kan Pathian i thinlungput zeidah a si ti le mi chambau ka si ti kan i hngalhternak cu nawlbia nih a langhter i cute tikah cun Bawipa hmaiah ka chambau ti kha a kan hngalhter i, a hmaika ah kun in sualthlahnak in thiannak ah, thlarau zawtnak in thlarau damnak ah, cu damnak a kan petu cu kan Bawipa Jesuh Khrih a si. 

Cucaah cun Khrih a zummi nang le kei nih nawlbia hi kan hlawt awk a si maw, si hlah. Jesuh Khrih zumhbu tein nawlbia hi kan zulh awk a si. Kan tlamtlin lonak vialte a kan hmuhpiak ṭhan i a kan ngaithiam ṭhantu cu kan Pathian a si i, cu vialte nawlbia kan zulh khawh lomi vialte caah kan caah Sacrament, a thianghlimmi thlarau ah a veel thluachuah kan hmuhnak a um ko. 

Zumhnak in hmailei ah fong chin i zuam hna usih law, nang le kei cu ṭhektu si loin a pumkhawmtu si usih. Remlonak thlaici a tuhtu si loin dawtnak a phawtzamhtu si usih. Cu a si si ahcun kan Bawipa Jesuh Khrih ṭanhtu kan si ti kha cathiang nih nihin ni ah fiang tein a kan chimmi cu a si. Thawngṭha a rak ngaitu nan zapi te Pathian nih thluachuah in pe ko hna seh.

Thazaang petu /- Saya Canute Bawi Kam