St. Francis of Assisi, Religious
A Thiangmi Pa (1182-1229)
Siangbawi cannak Sianginn a thawktu St. Francis cu 1182 kum, Italy ram, Assisi khua ah a chuak. Mirum mingei chawdawrpa i fapa a si caah ralkap lei minthannak le vawlei nuamhnak chungah a caan a rak dihter. Kum 25 a si ah St. Damian Biakinn i thla a cam lio ah Jesuh nih Vailamcung in, “Francis, a rawk cang tiin na hmuhmi Bupi kha va remh” tiah a rak fial. Cu hnuah amah cu mi sifak hna kha thilpuan le tangka peknak le Biakinn fate kha sakṭhannak hram a thawk. Cucaah a pa cu a thin a hung i a ngeihmi thilri chawva hna kha a hal ṭhan. Cu tikah Bishop inn hmaiah a thuamthil hna kha aa phoih i “hi thilthuam hna hi ka pa nangmah ta an si, khahlan ahcun vawlei ka pa ka rak in ti, atu ahcun Vancung i a ummi kan pa lawng kha ka pa ka ti cang lai” tiah a rak ti. Kedan lo, a tlek a chiahrumi thilthuam he thlacamnak le sualdantat innak tuah nakin nun hram aa thawk. Cu tuahsernak nih a hnuzul tampi kha an lung a thawhter hna. A tlu dengmang mi Bupi a bawmchanhtu Francis kha Pope Innocent III nih a mang ah a rak hmuh. Cu Pope nih cun 1210 kum ah Friar Minor, buthar kha a rak fehter.
Francis cu Deacon cannak a hmuh hnuah relcawk lo khuaruahhar thil tampi a rak tuah. Amah cu thawngṭha he pehtlaimi sifahnak le dawtnak zohchunh awkin Bupi kha a remhsak ṭhan. Thisa hnahnawhnak kha doh le nuamhlo dingah, Ṭhal ah thilpuan loin hlinglak ah a lut i, khuasik caan ah a kik ngaimi hawhra cungah a ṭhu. Chaklei Africa um Muslim hna karlak i a zumhnak fektein a langhter. Chrismas caan lio i naute Jesuh chuahnak cawrawl ei nak kuang duhnung kan tuah tawnmi hi Grechew khua ah amah (Francis) sinin aa thawkmi a si. Amah cu Avelna tupi pawng i rawlulh thla a cam lioah Bawi Jesuh i hma pa 5 a rak pu. Amah cu kokek cungah a ngeihmi a dong kholomi dawtnak a langhtermi, “ka u Nikaa pi le ka unu thlapa” timi Khrihfa hla a rak phuahtu a si. Amah (Francis) cu, “Keimah lei kap cun ka ṭuan dih cang, nangmah leikap tuahawk tu cu Khrih Jesuh nih in cawnpiak te ko hna seh,” tiah a chim buin, a kum 44 ah Potium Kola khua ah a nunnak a dih.