Fimchimhnak kong
Cucaah palhmi theihngalh fimthiamnak nunning ziaza he a ralchanh mi fimthiamnak hna cu pakhat cio caah siseh, vawlei mi pumpi caah siseh chiatnak a siter.
Sivai vialte lakah sivai ah apalh mi, ningkel lo a si mi nun zia za he a ralchanhmi nun zia le khuaruahnak hna cu angan bik ṭih nungral asi.
Ahmaan lo mi theihngalh nak a phawt zamh tu phetsit zumhnak Nazi zumhnak, communist zumhnak hna hmai ah minung nuai tampi hna cu harnak rili chung an i paih cio.
Dinfelnak, Dawtnak le nun ning ziaza kha hrambunh mi chungkhar hna cu an rak rawk. Dinfellonak, biakam tlolhnak, hawikomṭha silo nak hna hrambunh mi hawikomh hna cu a rak rawk.
A hlatuk tilomi hmailei chan ah cun Catholic mino hna cu Bupi caah a sunglawimi ṭuanvo hna kha siangthleng in ṭuanvo an lak cang lai. Nihin Catholic mino hna cu hmailei caan Bupi le mahle minung phu sernak dal ah abiapi hmun in aa tel dingmi ah i chiahmi ṭhawnnak thazaang ngeitu an si.
Ahlun ahlun an dongh hnu ah athar athar hna nih hmunhma lak zungzal asi tawn. Hihi cu kokek upadi asi.
Hnahro hnah hlun hna kha hnahhring hnah thar hna nih hmun an lak.
Tlakrawh inn hlun, inn rop hna i hmun hma cu tlakrawh thar, tlakrawh ṭha hna nih hmunhma an lak.
Cu ve bangin atar cang i ṭuanvo athlinh cangmi kum upa hna hmunhma kha ṭhawnnak thazaang a khat i lungthawh ṭuanvo athei mi mino pawl nih ṭuanvo an lak lai.
Hmunhma rolh a um lo ah cun phu (bu) pakhat cu aṭhangcho bal lai lo. Vate hna nih van dum kha an dawhter. Ngafa tete hna nih akau ngaimi rili dum kha an dawhter bantukin mino thisa thar hna nih minung umnak vawlei le Bupi kha an ṭamh mawih lai.
Nihin mino cu hmailei ah upa an si te lai, Atla hnga mi Nika, a ziam dingmi Pangpar, a car ding mi ti hna cu khamhkhawh an silo bantuk in mino sinak in upa (tar) si lai nak cu khamh khawh mi asi lo.
Mino pawl ahmaan mi khuaruat thiamnak le nunning ziaza a ṭhatnak ding zong cawn piak tu Saya hna le nu le pa cung ah aa hngat mi asi ve. Abik in a hram thawknak Saya asi mi nu le pa hna hi an biapi deuh. Ṭuanvo ahngalh mi mino hna, pumpe mi mi no hna, Keimah ti na thinlung atlawm mi mino hna, nawl ngai mi mino hna, ziaza ṭha mi mino hna, theih hngalhnak aṭhancho mi mino hna cu man khiah khawh lomi mansun lungvar kan ti khawh. Chan kha athar in dawhter dingah aṭamh mawih kho ding mi chanthar zuksuai an si, tiah ti khawh an si.