PATHIAN VEEL LE MINUNG ZUMHNAK
Pathian miphun hna tiah kan theih mi Israel mi hna nunnak kha kan zoh tthan tikah annih cu Pathian kha khamhtu sinakin sertu a si, tiah duhsah tein an rak hngalh.
(God as savior to God as creator.)
Zungzal Pathian zong nih keimah cu Van le Vawlei sertu Pathian, zeizong tuah kho Pathian ka si, tiah Israel mi hna sinah a rak langhter bal lo. Sihmanhsehlaw, Keimah cu khamhtu Pathian ka si; keimah kha nan ka biak ahcun Izipt mi hna Saltannak in kan luatter hna lai, tiah minung le Pathian karlak biakamnak (biahren) a tuah i khamhtu a sinak kha a mah le mah theihternak a rak tuah. Cucaah Isreal mi hna i Pathian cung an zumhnak cu Izipt ram salcannak in an luat in aa thawk. Cuti saltannak in an luatnak thawngin annih cu Pathian kut chungah a nganmi huham tthawnnak aana a um ti kha an rak hngalh. Ramcar i an vahvaih lio an hmuh tonmi harnak hna karlak in Pathian nih a rak khamhnak hna, kamhmi kanan ram an phak tikah eiawk rawl a rum i a ngan rumra ngei mi khuapikha an hmuh tikah Pathain cu zeizong vialte a tuah khotu, Van le Vawlei sertu Pathian a si ti kha an rak hngalh. Pathian cu sertu a si tikha an hngalh i an rak zumh.
Bible ca thar chan a hun phak tikah, Bawipa Jesuh Khrih thawng in Pa Pathian cu hodah a si, ti kha a dihlak in a rak hmuhsak. Vawlei kha a sertu Pathian, minung a dawtu Pathian, Dawtnak Pathian a si kha a rak langhter. Bawipa Jesuh zong nih minung he hmunkhat ah a umnak in Pa Pathian kong kha a rak chim. A rak bawmh. A rakthlop piak hna. Pathian Nawlbia hna kha a rak cawnpiak hna. Pa Pathian cu, zeibantuk mi dah a si ti kha a chimrel ning, umtu ziaza, a tthutdir ning, a kal umning in a rak langhter. Pathian kong a phuan i a hmuhsak nak cu Bawipa Jesuh ah a dih lak in tlin cikcek nak ah a rak phan. (Christ is the fullness of Revelation.) Zeicah tiahcun Khrih hrimhrim cu Pathian Fapa a si caah a si. Thiang Thlarau Pathian thawng in pawi a simi Pathain i Bia a si caah a si. Hi kong lam hna tu cu Jesuh Khrih i mithmuh tette (Eye Witnesses) hna a simi Zultu ngan hna, (Sacred tradition) Lam kaltu hna in a rami cawnpiaknak hna, Bupi cawnpiaknak hna, (misterium of the church), Bible cathiang (Sacred Scripture) tiah thil hna thawng in kan nih nih kan hngalh khawh. Kan cohlan i kan zumh.
“Khamhnak timi tu cu Pathian Veel le minung i Pathian cung kan chiah mi zumhnak a pahnih fonh i a rak chuakmi thil a si. Pathian nih veelthluahchuah a pek peng. Kannih leikap nih zumhnak ah lung awtawm, lunghrinhrenh nak aa tel ahcun khamhnak cu asi kho lai lo.” Ahleice in hneksak nak hna kan in tikah Pathian cung kan ngeih mi zumh nak cu a zor ttheo tawn. Sipuazi (tthachonak) kan chambau tikah, kan rianuan mi thlan a tling lo tikah kan nunnak ah Pathian hmunhma a tlau thiam tawn. Hi konglam hna he pehtlaih in Pope Francis nih a mah i Christus Visit timi cathluan ah hitin a cawnpiak. (N-117)
“Kannih cut harnak hna kan ton kan intuarh, nunnak i zuamcawh nak hna he kan hmaitonh timi cu, Pathian cu kan nunnak chungah a mah caah hmunhma pakhat an ka pe hnga maw? timi ruahchannak kha a ngei. Kha hmun ah kannih cu Pathian he bia kan i ruah lai.” Kan in tuarhnak kha kan phuan lai. Zeicaah Keimah/nu cung thengah hi bantuk thilhi a cang tiin biahalnak kan tuah hmanhah Pathian cu lungrawk loin a kan ngeihpiak ko lai. Kannih leikap nih Pathian kha hmuhma pek lo, biaruah loin kan um ca tuah a si. Kha hmunhma teah khan Pathian cu, fapa pakhat kha lam kalning a cawnpiak mi pa pakhat bantukin kan `hawnnak ding, kan ke cungah dir i lam kan kal khawhnak ding, kan tluk kan rilh lio caan ah bawmtu kut sinak an um piak a kan duh caah a si. Cucaah kan nih sinin a mah caah hmunhma pakhat te a kan halnak cu asi.
Genesis 32:25-31 ah Jacob cu Pathian he an i paihnak kong kha kan rel. Isaiah 1:18 ah Pathain nih, “Ra u, bia kan i el hna lai” tiah a kan sawm kha kan hmuh. Cucaah Pathian hmaiah kannih in tuarhnak hna kha hlangfang tein kan chimh khawh lai; Lungretheihnak kan tthumh khawh lai. Zeicaah keimah cung theng ah hi bantuk thil a cang hnga timi biahalnak hna he biahal nak le lehnak kan tuah khawh lai i bia i el khawh a si lai. A dikmi Dawtnak he a kan dawtu Bawipa Pathian cu kan nih kha bia ruah ding a kan sawm peng ko. Tthawnnak thazaang veel thluahchauah hna pek ding ah, zeitindah na lomh lai timi ning cang hna pekdingah a kan hngah peng ko.”
Cucaah Pathian nih a kan pek ding mi ningcang hna kha hman buin sifah harnak, zawtnak, zawtfahnak, hneksaknak hna kan in tikah kan nunnak chung in Pathin tlauter lo ding kha kan zuam awk a si. Pathian ah kan zumhnak a fehnak ding caah kan i zuam awk a si. Zumhnak kan ngeih lawng lawng ah khamh kan si lai. Pathian i veel thluachuah le minung i zumhnak aa fonh lawng lawng ah khamh nak timi a theipar kha kan co, kan hmuh ding a si.
“A dongh tiang in a fek mi cu khamh an si lai” (Matthai 24:13) …
A lettu; Norbert Ca Ling (OSC)