KOKEK PAWNGKAM ZOHKHENH KILVENNAK LE NIFATE NUNNAK
An si a faktuk hringhran i hawikomh pehtlaihnak ah a chiatuk mi peng le ram hna, pakpalawng zeihmanh a um lonak hmun hna, tlaihchan tein umnak lam a um lomi hmun hna ah chiatnak le nawl buarnak a tuahmi hna i chiachia hruhru hremnak, thil chuh le hrawh piaknak hna an intuar.
A dai lomi innpa lopa hna le khualipi hna ah minung milu an chahnak, pakhat le pakhat aho a si ti an hngalh lonak hna ruangah, minung hna cu hlan i an rak umnak pawngkam in ṭhenchuah bangin an intuar caah, mah hna karlak ah zatlang nunphung he aa ralchanhmi tuahser ning hna le ṭhihphaihnak hna kha kan hmuh. Asinain dawtnak cu hi thil vialte hna nakin ṭhawnnak thazaang a ngan deuhnak kong kha biapi ah chim ka duh.
Hi thil sining ah a ummi tam-uak cu chungkhat bantukin tlaihchannak, ngeihnak, hmunkhat in um khawhnak hna thawng cun minung milu a chahmi umtu ningcang in innchungkhar khat a simi minung phu hna an ser caah, mah ca lawng ti duhnak lungthin a lomi hauhruang pi cu an rawk an tlu i mah ca lawng timi donkhantu hna kha an tei i an lonh khawh.
A phu in tlaihchan le daw tein umthiamnak, khamhnak hmunhtonnak cu innchungkhar thinlung a tling cikcekmi zatlang nunphung phu hna kha ser (tuah) nak, thil umtu ningcang ṭhancho ternak hna caah thilthar serchuahnak lungchung saduh thah hna a chuahter.
Minung umnak peng le hmun pawngkam le minung hna i umtu ziaza kong theih hngalh hnuah khuate le khuapi inn lo hna, innpa inn hna, mipi hmunrawn hna caah pungsan a suaitu hna cu minung hna khuaruat tuaktannak pungsan, annih an hmanmi ca holh le hmelchunhnak hna, umtu ziaza hna kha sikaan (zulhphung) a pe dingmi konglam hna ruah ṭhan hnuah pungsan suai awk a si.
Inn le lo aa dawhnak pakhatte lawng kha ruat in, inn pungsan suaimi cu tlam a tling kho lo. A dang a simi dawtnak pakhat caah bawmhchanhnak cu man a ngei deuh. Minung hna a thianghlim a sangmi nunnak in umṭhutnak, kokek pawngkam he aa tlak tein umṭhut thiamnak, minung pakhat le pakhat i daw le tlaihchanh tein um i, bawmhchanh thiamnak hna a ṭhat deuhnak kha telh chih in ruah a hau. Khuapi khuate saknak timhtuahnak (simanking) suainak ah, cu khuate khuapi ah rat in a um dingmi hna i hmuhnak zong telh chih in khuaruah tuaktannak cu a biapimi a si, tiah kan theih awk a si.
Mi tampi he pehtlaimi (a saingmi) hna zong zohkhenh kilven piak an herh ve. Mit in hmuh khawhmi hmatthahnak hna, kokek ram vuaksak (suhkhing) hna cu kannih i pehtlaihnak, chuahkehnak a sinak, nu le pa inn kan phanh ni in tuarnak hna a chuahter i, kan rak hrin kan ṭhanlianhnak hmun, kannih hna kha hmunkhat ah a kan funtom piakmi khuapi khuate hna a sinak cohlannak kha a siter.
Khuapi chungah a ummi sang le veng kip i pehtlaihnak hna langhternak thawng cun khuapi mipi hna cu sang le veng pakhatte lawngah tet ngaiin kan um timi intuarnak ngeih loin, khuapi dihlak he pehtlaihnak, khuanu khuapa dihlak he lungrual tein kan um timi intuarnak a ngaihter caah hi kong cu cu khuapi khuate timhtuahnak ah telh chih in a biapi ah ruah a herhmi a si.